ଖଣ୍ଡପଡ଼ା,୨୦।୧୦(ସ୍ବ.ପ୍ର.): ଖଣ୍ଡପଡ଼ା ବ୍ଲକ୍ ଅଧୀନ ସିଧାମୂଳା ନିକଟସ୍ଥ ମହାନଦୀ ଉପରେ ନିର୍ମାଣ ହୋଇଥିବା ସେତୁ ନୟାଗଡ଼ ସହ କଟକ ଜିଲାକୁ ସଂଯୋଗ କରୁଛି । ୧୫୬୮ ମିଟର ଲମ୍ବର ଏହି ସେତୁ ନୟାଗଡ ଜିଲା ସିଧାମୂଳା ଓ କଟକ ଜିଲା ଏକଡାଳ ସୀମାକୁ ଛୁଇଁଛି । ଏହି ସେତୁ ଦେଇ ପ୍ରତ୍ୟେହ ଶତାଧିକ ଯାନବାହନ ଚଳାଚଳ କରୁଛି । ହଜାର ହଜାର ଲୋକେ ଏହି ସେତୁ ଉପରେ ପ୍ରତିଦିନ ଯାତାୟତ କରୁଛନ୍ତି । ମହାନଦୀ କୂଳରେ ଥିବା ପର୍ଯ୍ୟଟନସ୍ଥଳୀ ଗୋକୁଳାନନ୍ଦ ଜୀଉ ପୀଠକୁ ରାଜ୍ୟ ତଥା ରାଜ୍ୟ ବାହାରୁ ଶତାଧିକ ପର୍ଯ୍ୟଟକ ଏହି ସେତୁ ଦେଇ ଆସିଥାଆନ୍ତି । ହେଲେ ସେହି ସେତୁରେ କୌଣସି ଆଲୋକର ବ୍ୟବସ୍ଥା ନାହିଁ । ସୂର୍ଯ୍ୟ ନଇଁଲେ ସେତୁ ଦେଇ ଯାତାୟତ କରିବାକୁ ଲୋକେ ଉଚିତ୍ ମଣୁ ନାହାନ୍ତି ।
ଅନ୍ଧକାର ରାତିର ସୁଯୋଗ ନେଇ ଅପରାଧୀମାନେ ପ୍ରତିଦିନ ଛୋଟ ବଡ଼ ଅପରାଧ ଘଟାଉଛନ୍ତି । ସ୍କୁଟର,ବାଇକ୍ ପରି ୨ଚକିଆ ଯାନରେ ଯାତାୟତ କରୁଥିବା ଲୋକମାନେ ଲୁଟେରାମାନଙ୍କ ଶିକାର ହେଉଥିବା ଅଭିଯୋଗ ହୋଇ ଆସୁଛି । ଏପରି କି ଲୋକମାନଙ୍କୁ ଦୁର୍ବୃତ୍ତମାନେ ଆକ୍ରମଣ କରିବାକୁ ପଛାଉ ନାହାନ୍ତି । ଏମିତି କି ଅପରାଧୀମାନେ ଏହି ସେତୁ ଉପରେ ହତ୍ୟା କରି ମୃତହେଦକୁ ନଦୀରେ ଫିଙ୍ଗି ଦେଇଥିବା ନଜିର ରହିଛି ।
ସୂଚନା ଅନୁଯାୟୀ, କଟକ ଜିଲା ଅଧୀନ ନରସିଂହପୁର ଅଞ୍ଚଳର ଜଣେ ବ୍ୟକ୍ତି ପ୍ରତିଶୋଧ ପରାୟଣ ହୋଇ ତାଙ୍କ ଭାଇଙ୍କ ଶିଶୁପୁତ୍ରକୁ ବିଭିନ୍ନ ପ୍ରଲୋଭନ ଦେଖାଇ ଗୋକୁଳାନନ୍ଦ ଜୀଉଙ୍କୁ ଦର୍ଶନ କରାଇବା ଆଳରେ ଆଣି ଏହି ସେତୁ ଉପରୁ ନଦୀ ଗର୍ଭକୁ ଭିଙ୍ଗି ଦେଇଥିବା ଅଭିଯୋଗ ହୋଇଥିଲା । ସେହିଭଳି ୨ ଜଣ ମହିଳା ପାରିବାରିକ ଅଶାନ୍ତି ଯୋଗୁ ସେତୁ ଉପରୁ ଡେଇଁ ଆମତ୍ହତ୍ୟା କରିବାକୁ ପ୍ରୟାସ କରିଥିଲେ । ମାତ୍ର ସେମାନଙ୍କୁ ଉଦ୍ଧାର କରାଯାଇଥିଲା । ଅନ୍ୟ ଜଣେ ମହଳା ବି ଆମତ୍ହତ୍ୟା କରିବା ପାଇଁ ସେତୁ ଉପରୁ ନଦୀ ଗର୍ଭକୁ ଡେଇଁ ପଡିଥିଲେ । ପ୍ରଖର ସ୍ରୋତରେ ଭାସି ଯାଇ ନଦୀ ଅପରପାର୍ଶ୍ୱ ବାଣେଶ୍ୱର ପାହାଡ଼ ନିକଟରେ ଅଚେତ ଅବସ୍ଥାରେ ଲାଗିଥିବାରୁ ସ୍ଥାନୀୟ ବାସିନ୍ଦା ତାଙ୍କୁ ଉଦ୍ଧାର କରିଥିଲେ । ଏହି ସେତୁରେ ସୁରକ୍ଷା ବ୍ୟବସ୍ଥାକୁ ନେଇ ସିଧାମୂଳା ଗ୍ରାମର ସାମାଜିକ କର୍ମୀ ତଥା ଅବସରପ୍ରାପ୍ତ ଶିକ୍ଷକ ମହେଶ୍ୱର ରଣା ବିଭିନ୍ନ ଫୋରମରେ ଦାବି ଉପସ୍ଥାପନ କରିଛନ୍ତି । ସେହିପରି ଖଣ୍ଡପଡ଼ା ବ୍ଳକ ବିଜେଡି ସଭାପତି ସୁଶାନ୍ତ କୁମାର ମିଶ୍ରଙ୍କ ସମେତ ବହୁ ବୁଦ୍ଧିଜୀବି ଉକ୍ତ ସେତୁର ଉଭୟ ପାର୍ଶ୍ୱରେ ତାରବାଡ ଦିଆଯିବା ସହ ଆଲୋକୀକରଣ ବ୍ୟବସ୍ଥା କରିବାକୁ ଦାବି କରିଛନ୍ତି । ଉକ୍ତ ସେତୁରରେ ସୋଲାର ଲାଇଟ ବ୍ୟବସ୍ଥା କରିବାକୁ ଜିଲା ପରିଷଦ ସଭ୍ୟା ଉଜ୍ୱଳ ମହାରଣା ଗତ ସେପ୍ଟେମ୍ବର ୨୨ରେ ନୟାଗଡ ଜିଲା ପରିଷଦ ବୈଠକରେ ପ୍ରସ୍ତାବ ଉପସ୍ଥାପନ କରିଥିବା ସୂଚନା ମିଳିଛି ।
