ଓସ୍ଲୋ,୧୭ା୮: ଉତ୍ତର ମେରୁ ଠାରୁ ପ୍ରାୟ ୬୨୦ ମାଇଲ (୧,୦୦୦ କିଲୋମିଟର) ଦୂରରେ ଅବସ୍ଥିତ ନରୱେର ସୁଦୂର ଦ୍ୱୀପପୁଞ୍ଜ ‘ସ୍ବାଲବାର୍ଡ’ ଉପକୂଳରେ ଜାହାଜର ବିକଟାଳ ଫଗ୍ହର୍ନ ବଜାଇ ଶୋଇଥିବା ଧଳା ଭାଲୁକୁ ଉଠାଇବା ଏବଂ ବିରକ୍ତ କରିବା ଅପରାଧରେ ଜଣେ ବୋଟ୍ ଅପରେଟରଙ୍କୁ ୫୦,୦୦୦ ନରୱେଜିଆନ କ୍ରୋନର (ପ୍ରାୟ ୫ ଲକ୍ଷ ଟଙ୍କା) ଜରିମାନା କରାଯାଇଛି।
ଚଳିତ ମାସ ପ୍ରାରମ୍ଭରେ ସ୍ବାଲବାର୍ଡର ଏକ ସ୍ଥାନୀୟ ଫିଓର୍ଡ (ସମୁଦ୍ରର ପ୍ରଣାଳୀ) ଦେଇ ଜାହାଜଟି ଯାଉଥିବା ସମୟରେ କୂଳରେ ଏକ ଧଳା ଭାଲୁ ଶୋଇଥିବା ଦେଖିବାକୁ ମିଳିଥିଲା। ଭାଲୁଟିର ଗତିବିଧି ଦେଖିବା ଉଦ୍ଦେଶ୍ୟରେ ଜାହାଜରେ ଥିବା ଜଣେ ବ୍ୟକ୍ତି ଉଦ୍ଦେଶ୍ୟମୂଳକ ଭାବେ ଉଚ୍ଚ ଶବ୍ଦରେ ଫଗ୍ହର୍ନ ବଜାଇଥିଲେ। ହର୍ନ ଶବ୍ଦରେ ଭାଲୁଟି ଭୟଭୀତ ହୋଇ ହଠାତ୍ ଉଠିପଡ଼ି ସେହି ସ୍ଥାନ ଛାଡ଼ି ପଳାଇଥିଲା। ଘଟଣା ସମ୍ପର୍କରେ ଖବର ପାଇବା ପରେ ସ୍ବାଲବାର୍ଡର ଗଭର୍ନର ଲାର୍ସ ଫସେ ତୁରନ୍ତ ଆଇନଗତ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ‘ସ୍ବାଲବାର୍ଡ ପରିବେଶ ସୁରକ୍ଷା ଆଇନ’ ଅନୁଯାୟୀ ଏହି ଅଞ୍ଚଳରେ ବନ୍ୟଜନ୍ତୁ, ବିଶେଷକରି ଧଳା ଭାଲୁମାନଙ୍କୁ ବିନା କାରଣରେ ବିରକ୍ତ କରିବା, ପଛରେ ପଡ଼ିବା କିମ୍ବା ଆକର୍ଷିତ କରିବା ସମ୍ପୂର୍ଣ୍ଣ ବେଆଇନ। ଅଭିଯୁକ୍ତ ବ୍ୟକ୍ତିଜଣକ ନିଜର ଦୋଷ ସ୍ବୀକାର କରିବା ସହ ଜରିମାନା ରାଶି ଦେବାକୁ ସମ୍ମତି ପ୍ରକାଶ କରିଛନ୍ତି।
ସୂଚନାଯୋଗ୍ୟ, ସ୍ବାଲବାର୍ଡରେ ୧୯୭୨ ମସିହାରୁ ଧଳା ଭାଲୁମାନଙ୍କୁ ସଂରକ୍ଷିତ ପ୍ରଜାତି ଭାବେ ଘୋଷଣା କରାଯାଇଛି। ଏହି ପ୍ରତିକୂଳ ପରିବେଶକୁ ଆସୁଥିବା ପର୍ଯ୍ୟଟକ ଓ ନୌଚାଳକମାନେ ବନ୍ୟଜନ୍ତୁଙ୍କଠାରୁ ନିରାପଦ ଦୂରତା ବଜାୟ ରଖିବା ବାଧ୍ୟତାମୂଳକ, ଯେପରି ସେମାନଙ୍କର ପ୍ରାକୃତିକ ଆଚରଣରେ କୌଣସି ବ୍ୟାଘାତ ନ ଉପୁଜେ। ପୂର୍ବରୁ ୨୦୨୪ରେ ମଧ୍ୟ ଜଣେ ପର୍ଯ୍ୟଟକ ‘ୱାଲରସ’ର ଅତି ନିକଟତର ହୋଇଥିବାରୁ ୧୧,୫୦୦ କ୍ରୋନର ଜରିମାନା ଗଣିଥିଲେ।
