ଆବଶ୍ୟକ ସାମଗ୍ରୀ: ୨୫୦ ଗ୍ରାମ୍ ପାଳଙ୍ଗ ଶାଗ, ଅଧା କପ୍ ବୁଟ ଡାଲି, ୨ଟି ଲବଙ୍ଗ, ୧ ଇଞ୍ଚ ଡାଳଚିନି, ୪-୫ଟି ଗୋଲମରିଚ, ୨ ଟେବୁଲ୍ ସ୍ପୁନ୍ ଚାଉଳ ଅଟା, ଅଧା କପ୍ ବ୍ରେଡ୍ ଗୁଣ୍ଡ, ତେଲ, ଲୁଣ, କୋରା ବା ରମ୍ପା ଯାଇଥିବା ୧୦୦ ଗ୍ରାମ୍ ପନିର, କିସ୍ମିସ୍ ୧ ଟେବୁଲ୍ ସ୍ପୁନ୍, କାଜୁ ୧ ଟେବୁଲ୍ ସ୍ପୁନ୍, ଗୋଲମରିଚ ଗୁଣ୍ଡ ଅଧା ଚାମଚ।
ପ୍ରସ୍ତୁତି ପ୍ରଣାଳୀ: ପ୍ରଥମେ ବୁଟଡାଲିକୁ ଏକ ଘଣ୍ଟା ପର୍ଯ୍ୟନ୍ତ ପାଣିରେ ଭିଜାଇ ଦିଅନ୍ତୁ। ପାଳଙ୍ଗ ଶାଗକୁ ଭଲ ଭାବେ ଧୋଇ ଛୋଟ ଛୋଟ କାଟି ଦିଅନ୍ତୁ। ପ୍ରେସର କୁକର ଚୁଲାରେ ବସାଇ ସେଥିରେ ପାଳଙ୍ଗ, ଭିଜା ଡାଲି, ଲବଙ୍ଗ, ଡାଳଚିନି, ଗୋଲମରିଚ, ଏକ କପ୍ ପାଣି, ସ୍ବାଦାନୁସାରେ ଲୁଣ ପକାଇ ଗୋଟିଏ ହ୍ବିସିଲ୍ ଆସିବା ପର୍ଯ୍ୟନ୍ତ ରଖନ୍ତୁ। ଏହା ପରେ ଚୁଲାକୁ ସିମ୍ରେ ରଖି ୫-୬ ମିନିଟ୍ ରଖିବା ପରେ ବନ୍ଦ କରି ଦିଅନ୍ତୁ। କୁକର୍ ଥଣ୍ଡା ହୋଇଯିବା ପରେ ପାଳଙ୍ଗ, ଡାଲି ଆଦିକୁ କାଢି ବହଳ ଗ୍ରାଇଣ୍ଡିଂ କରି ଦିଅନ୍ତୁ।
ଅନ୍ୟ ଏକ ପାତ୍ରରେ କୋରା ଯାଇଥିବା ପନିର, ଲୁଣ, ଗୋଲମରିଚ ଗୁଣ୍ଡ, କିସ୍ମିସ୍, କାଜୁ ନେଇ ଭଲ ଭାବେ ମିଶାଇ ଦିଅନ୍ତୁ। ପାଳଙ୍ଗ ବଟାକୁ ମଧ୍ୟମ ଆକାରର ଗୁଳା କରି ମଝିରେ ପନିର ପୁର ଦେଇ ଟିକି ପ୍ରସ୍ତୁତ କରନ୍ତୁ। ଏକ ପ୍ଲେଟ୍ରେ ବ୍ରେଡ୍ ଗୁଣ୍ଡ ରଖନ୍ତୁ ଏବଂ ସମସ୍ତ ପାଳଙ୍ଗ ଟିକିଗୁଡିକୁ ଏହା ଉପରେ ଗଡାଇ ଦିଅନ୍ତୁ। ଚୁଲାରେ ଏକ ତାଓ୍ବା ବସାଇ ତେଲ ଗରମ କରନ୍ତୁ ଏବଂ ପାଳଙ୍ଗ ଟିକିଗୁଡିକୁ ଏଥିରେ ଭଲ ଭାବେ ଏପଟ ସେପଟ କରି ଭାଜି ଦିଅନ୍ତୁ। ପ୍ରସ୍ତୁତ ହୋଇଗଲା ପାଳଙ୍ଗ ଟିକି, ଏହାକୁ ଚଟଣି, ସସ୍ କିମ୍ବା କଟା ପିଆଜ ସହିତ ଗରମ ଗରମ ଖାଇବାର ଆନନ୍ଦ ନିଅନ୍ତୁ।
