ନୂଆଦିଲ୍ଲୀ,୧୭।୧୧: ରାଇଜିଂ ଷ୍ଟାର୍ସ ଏସିଆ କପ ୨୦୨୬ ପାଇଁ ଟିମ ଇଣ୍ଡିଆ କାତାରରେ ପହଞ୍ଚିଛି। ତିଲକ ବର୍ମାଙ୍କ ଅଧିନାୟକତ୍ୱରେ ଖେଳିବାକୁ ଥିବା ଏହି ଦଳରେ ବୈଭବ ସୂର୍ଯ୍ୟବଂଶୀ ଓ ଅଭିଷେକ ଶର୍ମା ମଧ୍ୟ ସାମିଲ ଅଛନ୍ତି। ନଭେମ୍ବର ୧୯ରୁ ରାଇଜିଂ ଷ୍ଟାର୍ସ ଏସିଆ କପ ଆରମ୍ଭ ହେବ। ଏହି ଟୁର୍ନାମେଣ୍ଟ ଦିନିକିଆ ଫର୍ମାଟରେ ଖେଳାଯିବ। ମଙ୍ଗଳବାର, ନଭେମ୍ବର ୧୭ରେ BCCI ଅପଡେଟ ଦେଇ ସୂଚନା ଦେଇଛି ଯେ ଭାରତୀୟ ଦଳ ଦୋହା (କାତାର)ରେ ପହଞ୍ଚିଛି।
ଭାରତୀୟ ଦଳରେ ରିଙ୍କୁ ସିଂହଙ୍କଠାରୁ ଆରମ୍ଭ କରି ପ୍ରିନ୍ସ ଯାଦବ, ସୂର୍ଯ୍ୟାଂଶ ଶେଡଗେ ଓ ହର୍ଷିତ ରାଣା ମଧ୍ୟ ସାମିଲ ଅଛନ୍ତି। ତିଲକ ବର୍ମା ଏହି ଦଳର ଅଧିନାୟକ ରହିବେ। ରଜତ ପାଟିଦାର ମଧ୍ୟ ଏହି ଟୁର୍ନାମେଣ୍ଟ ଖେଳିବାକୁ ଥିଲେ, କିନ୍ତୁ ଆହତ ସମସ୍ୟା କାରଣରୁ ତାଙ୍କୁ ନିଜ ନାଁ ପ୍ରତ୍ୟାହାର କରିବାକୁ ପଡ଼ିଛି।
ଦୀର୍ଘ ସମୟ ପରେ ହର୍ଷିତ ରାଣା ପୁଣିଥରେ କ୍ରିକେଟ ମଇଦାନକୁ ଓହ୍ଲାଇବେ। ଟିମ ଇଣ୍ଡିଆକୁ ଫେରିବା ଦୃଷ୍ଟିରୁ ଏହି ଟୁର୍ନାମେଣ୍ଟ ହର୍ଷିତ ରାଣାଙ୍କ ପାଇଁ ବେଶ ଗୁରୁତ୍ୱପୂର୍ଣ୍ଣ ହେବ। ସେହିପରି ପ୍ରଭସିମରନ ସିଂହ ଓ ସୂର୍ଯ୍ୟାଂଶ ଶେଡଗେଙ୍କ ପ୍ରଦର୍ଶନ ଉପରେ ମଧ୍ୟ ସମସ୍ତଙ୍କ ନଜର ରହିବ।
ରାଇଜିଂ ଷ୍ଟାର୍ସ ଏସିଆ କପ କାତାରର ରାଜଧାନୀ ଦୋହାରେ ଆୟୋଜିତ ହେଉଛି। ଏହି ଟୁର୍ନାମେଣ୍ଟରେ ମୋଟ ୮ଟି ଦଳ ଭାଗ ନେଉଛନ୍ତି। ଇଣ୍ଡିଆ ଏକୁ ଗ୍ରୁପ-ବିରେ ନେପାଳ, UAE ଓ ପାକିସ୍ତାନ ଏ ସହ ରଖାଯାଇଛି।
ଭାରତୀୟ ଦଳ ନଭେମ୍ବର ୨୦ରେ ନେପାଳ ବିପକ୍ଷରେ ନିଜର ପ୍ରଥମ ମ୍ୟାଚ ଖେଳିବ। ନଭେମ୍ବର ୨୨ରେ ଇଣ୍ଡିଆ ଏ ଓ ପାକିସ୍ତାନ ଏ ମଧ୍ୟରେ ମୁକାବିଲା ହେବ। ସେହିପରି ନଭେମ୍ବର ୨୪ରେ ଭାରତ ନିଜର ଶେଷ ଗ୍ରୁପ ମ୍ୟାଚ UAE ବିପକ୍ଷରେ ଖେଳିବ। ନଭେମ୍ବର ୨୬ରେ ପ୍ରଥମ ସେମିଫାଇନାଲ, ୨୭ ନଭେମ୍ବରରେ ଦ୍ୱିତୀୟ ସେମିଫାଇନାଲ ଏବଂ ୨୯ ନଭେମ୍ବରରେ ଫାଇନାଲ ମ୍ୟାଚ ଖେଳାଯିବ।
ରାଇଜିଂ ଷ୍ଟାର୍ସ ଏସିଆ କପ ପାଇଁ ଇଣ୍ଡିଆ ଏର ଦଳ
ତିଲକ ବର୍ମା (ଅଧିନାୟକ)
ବୈଭବ ସୂର୍ଯ୍ୟବଂଶୀ
ରିଙ୍କୁ ସିଂହ
ଅଭିଷେକ ଶର୍ମା
ସୂର୍ଯ୍ୟାଂଶ ଶେଡଗେ
ଆୟୁଷ ବଡୋନି
ଶାହବାଜ ଅହମ୍ମଦ
ବିପ୍ରଜ ନିଗମ
ହର୍ଷ ଦୁବେ
ତନୁଷ କୋଟିଆନ
ଅର୍ଶଦ ଖାନ
ପ୍ରଭସିମରନ ସିଂହ
କୁମାର କୁଶାଗ୍ର
ହର୍ଷିତ ରାଣା
ପ୍ରିନ୍ସ ଯାଦବ

