ବଇଣ୍ଡା, ୧୯ା୭(ଡି.ଏନ.ଏ.): ପେଟ୍ରୋଲ, ଡିଜେଲ ଭଳି ଦହନଶୀଳ ସାମଗ୍ରୀ ବହୁଳ ପରିମାଣରେ ଗଚ୍ଛିତ ବିପଦପୂର୍ଣ୍ଣ ହୋଇଥିଲେ ହେଁ ଏହାକୁ ଖାତିର କରୁନାହାନ୍ତି ଚୋରା ବ୍ୟବସାୟୀ। ବ୍ୟାରେଲ ବ୍ୟାରେଲ ତେଲକୁ ଅନେକେ ଘରେ ରଖି ବେପାର ଚଳାଇ ଏହାର ସମ୍ଭାବ୍ୟ ଭୟଙ୍କର ପରିଣତି ପ୍ରତି ଆଖି ବୁଜିଦେଉଛନ୍ତି। ନିଜ ସହ ଅନ୍ୟମାନଙ୍କ ଜୀବନକୁ ବାଜିରେ ରଖି ସେମାନେ ମୋଟା ଅଙ୍କର ଅର୍ଥ କାରବାର କରୁଛନ୍ତିି। ଅନ୍ୟପକ୍ଷରେ ବହୁମାତ୍ରାରେ ତୈଳ ଗଚ୍ଛିତ ବେଆଇନ ହୋଇଥିଲେ ମଧ୍ୟ ଏପରି କାରବାର ବଢୁଛି। ଅନୁଗୋଳ ଜିଲା ହଣ୍ଡପା ଥାନା ବଡଡଙ୍ଗିଆଣୀ ଗ୍ରାମରେ ଶୁକ୍ରବାର ରାତିରେ ପୋଲିସ ଚଢ଼ାଉ ବେଳେ ୨ ହଜାର ଲିଟର ପେଟ୍ରୋଲ ଜବତ ଘଟଣା ଏହାର ସଦ୍ୟତମ ଉଦାହରଣ। ଏକକାଳୀନ ଏତେ ପରିମାଣର ପେଟ୍ରୋଲ ରଖାଯିବା ଘଟଣା ଏବେ ଚର୍ଚ୍ଚାର ବିଷୟ ପାଲଟିଥିବାବେଳେ ଏହା ପଛରେ ଅପମିଶ୍ରିତ ତୈଳ କାରବାରର ଲିଙ୍କ୍ ରହିଥିବା ଅଞ୍ଚଳବାସୀଙ୍କ ମଧ୍ୟରେ ଆଲୋଚନା ହେଉଛି।
ଗ୍ରାମ ମଝିରେ ଥିବା ମଙ୍ଗୁଳୁ ବେହେରାଙ୍କ ଘରେ ଦୀର୍ଘ ଦିନରୁ ଚୋରା ପେଟ୍ରୋଲ ଓ ଡିଜେଲ କାରବାର ହୋଇଆସୁଥିଲା। କୌଣସି ସୂତ୍ରରୁ ଅଭିଯୋଗ ପାଇ ଶୁକ୍ରବାର ରାତିରେ ହଣ୍ଡପା ଆଇଆଇସି ଲବ ବୋଡା, ଏଏସ୍ଆଇ ପ୍ରମୋଦ ଆଇଚ, କୁନି ବାରିକ ସେଠାରେ ଚଢ଼ାଉ କରିଥିଲେ। ଏଥିରେ ୯ ବ୍ୟାରେଲ ଜାରକିନରୁ ୧୮ଶହ ଲିଟର ଓ ୪ ଜାରକିନରୁ ୨ ଶହ ଲିଟର ପେଟ୍ରୋଲ ଜବତ ହୋଇଥିଲା। ଘର ଅଗଣାରୁ ପେଟ୍ରୋଲ ଜବତ ବେଳେ ପୁଅ ଦେବାଶିଷ ବେହେରା ଫେରାର ହୋଇଯାଇଥବା ପୋଲିସ ସୂଚନା ଦେଇଛି। ମଙ୍ଗୁଳୁଙ୍କୁ ଗିରଫ କରାଯାଇ ନଂ. ୧୫୭/୨୦ରେ ମାମଲା ରୁଜୁ ହୋଇଛି। ଏ ନେଇ ଆଇଆଇସି ବୋଡା କୁହନ୍ତି, ଏତେ ପରିମାଣର ତେଲ କେଉଁଠୁ ଆସିଲା ତାହା ଜଣାପଡିନାହିଁ। ପୋଲିସ ପକ୍ଷରୁ ବିଭିନ୍ନ ଢାବାରେ ଚଢ଼ାଉ କରାଯାଇ ତଦନ୍ତ ଚାଲିଛି। ଖୁବ୍ଶୀଘ୍ର ଦେବାଶିଷଙ୍କୁ ଗିରଫ କରାଯିବ। ତେବେ ଏହା ପଛରେ ଏକ ର଼୍ୟାକେଟ କାମ କରୁଥିବା ସାଧାରଣରେ ଅଭିଯୋଗ ହୋଇଛି।
ଜାତୀୟ ରାଜପଥ ପେଣ୍ଠସ୍ଥଳୀ
ଅନୁଗୋଳ ଦେଇ ଯାଇଥିବା କଟକ-ସମ୍ବଲପୁର ୫୫ ନମ୍ବର ଜାତୀୟ ରାଜପଥ ଏବେ ଚୋରା ବ୍ୟବସାୟୀଙ୍କ ପେଣ୍ଠସ୍ଥଳୀ ପାଲଟିଛି। ଜାମୁନାଳୀଠାରୁ ଭାଙ୍ଗମୁଣ୍ଡା ପର୍ଯ୍ୟନ୍ତ ରାଜପଥ ଥିବାବେଳେ କେତେକ ଢାବା, ନିଛାଟିଆ ତଥା ପରିତ୍ୟକ୍ତ ଘରେ ଚୋରା ପେଟ୍ରୋଲ ଓ ଡିଜେଲ କାରବାର ହେଉଛି। ପାରାଦୀପରୁ ସମ୍ବଲପୁର, ଝାରସୁଗୁଡା ଅଭିମୁଖେ ଯାଉଥିବା ବିଭିନ୍ନ କମ୍ପାନୀର ତେଲ ଟ୍ୟାଙ୍କର ଚାଳକଙ୍କ ସହ ଚୋରା ବ୍ୟବସାୟୀମାନେ ସଲାସୁତୁରା କରି ପେଟ୍ରୋଲ, ଡିଜେଲ ଅନ୍ଲୋଡ କରୁଥିବା ଅଭିଯୋଗ ହୋଇଆସୁଛି। ଏପରିକି ଉକ୍ତ ଟ୍ୟାଙ୍କରଗୁଡିକୁ ଚୋରା ବ୍ୟବସାୟୀମାନେ କିରୋସିନ ଯୋଗାଇବା ସହ ଅଳ୍ପ କିଛି ଟଙ୍କା ବଦଳରେ ତେଲ ରଖୁଛନ୍ତି। ସେହି କିରୋସିନ ଟ୍ୟାଙ୍କରରେ ଅପମିଶ୍ରଣ କରାଯାଉଥିବା ଜଣାଯାଇଛି।
ଆବଶ୍ୟକତାଠାରୁ ଅଧିକ ରଖିବା ଦଣ୍ଡନୀୟ
ପେଟ୍ରୋଲ ଜବତ ଘଟଣାରେ ବାମୁର ଅଗ୍ନିଶମ ବିଭାଗ ଇନ୍ଚାର୍ଜ ପ୍ରକାଶ କୁମାର ବେହେରା କୁହନ୍ତି, ପେଟ୍ରୋଲ ଏକ ବିସ୍ଫୋରକ ଓ ଜାଳେଣି ସାମଗ୍ରୀ। ଏହା ବହୁ ପରିମାଣର ଘରେ ରଖିବା ବେଆଇନ। ଯେଉଁମାନଙ୍କର ବାଇକ୍ କିମ୍ବା କାର୍ ଅଛି, ସେଗୁଡିକ ଚଳାଇବା ପାଇଁ ଯେତିକି ଆବଶ୍ୟକ ସେତିକି ମାତ୍ରାରେ ତେଲ ଲୋକେ ରଖିପାରିବେ। ହେଲେ ବ୍ୟାରେଲ ବ୍ୟାରେଲ ପେଟ୍ରୋଲ ରଖିବା ବେଆଇନ ତଥା ଦଣ୍ଡନୀୟ କାର୍ଯ୍ୟ। ନିରାପଦ ସ୍ଥାନ, ଜନବସତି ଦୂରରେ କେବଳ ସ୍ବୀକୃତିପ୍ରାପ୍ତ ସଂସ୍ଥା ହିଁ ପେଟ୍ରୋଲ ରଖିପାରିବେ। ଏଥିପାଇଁ ପ୍ରଶାସନର ଅନୁମତି ସହ ଅଗ୍ନିନିର୍ବାପକ ଯନ୍ତ୍ର ରଖିବା ନିହାତି ଆବଶ୍ୟକ।
