କେନ୍ଦୁଝର, ୨୦ା୫(ସ୍ବ.ପ୍ର.): କେନ୍ଦୁଝର ଟାଉନ ଥାନା ଅଧୀନ ଗୁମୁରା ଗ୍ରାମରେ ଗୁରୁବାର ଏକ ଅଭାବନୀୟ ଘଟଣା ଘଟିଛି। ୧୪ଦିନର ଶିଶୁକନ୍ୟାଙ୍କ ମୃତ୍ୟୁରେ ମର୍ମାହତ ହୋଇ ମା’ ବାପା ବିଷ ପିଇ ଦେଇଥିଲେ। ଉଭୟଙ୍କୁ ମେଡିକାଲରେ ଭର୍ତ୍ତି କରାଯାଇଥିବା ବେଳେ ସେଠାରେ ସ୍ବାମୀଙ୍କ ମୃତ୍ୟୁ ହୋଇଛି। ସ୍ତ୍ରୀଙ୍କ ଅବସ୍ଥା ଗୁରୁତର ରହିଛି।
ଗତ ୬ ତାରିଖରେ ମଦନମୋହନ ପିଙ୍ଗୁଆଙ୍କ ଏକ ଶିଶୁ କନ୍ୟା ଜନ୍ମ ହୋଇଥିଲା। ଝିଅ ଜନ୍ମ ପରେ ପରିବାର ଲୋକେ ବେଶ୍ ଖୁସିରେ ଥିଲେ। ହେଲେ ଏହି ଖୁସି ବେଶୀ ଦିନ ରହି ନ ଥିଲା। ଗତ ୧୭ ତାରିଖରେ ନବଜାତ ଶିଶୁର ଦେହ ଖରାପ ହେବାରୁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା। ସେଠାରେ ତାର ମୃତ୍ୟୁ ହୋଇଯାଇଥିଲା। ଝିଅଙ୍କ ମୃତ୍ୟୁରେ ଉଭୟ ମା’ ବାପା ମଦନମୋହନ ଓ ଟିକି ଦୁଃଖରେ ଭାଙ୍ଗିପଡିଥିଲେ। ଗୁରୁବାର ଅପରାହ୍ନରେ ଦମ୍ପତି ଘରେ କବାଟ ବନ୍ଦ କରି ବିଷ ପିଇ ଦେଇଥିଲେ। କବାଟ ଭାଙ୍ଗି ପରିବାର ଲୋକେ ଉଭୟଙ୍କୁ ଉଦ୍ଧାର କରି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ। ମଦନମୋହନ ଏମ୍ପି ଚନ୍ଦ୍ରାଣୀ ମୁର୍ମୁଙ୍କ ଘରୋଇ ଡ୍ରାଇଭର ଭାବେ କାର୍ଯ୍ୟ କରୁଥିଲେ। ଖବରପାଇ ଏମ୍ପି ମୁଖ୍ୟ ଚିକିତ୍ସାଳୟରେ ପହଞ୍ଚି ଡାକ୍ତରଙ୍କଠାରୁ ପଚାରି ବୁଝିଥିଲେ।
