ଗଞ୍ଜାମ,୨୩।୭(ଡି.ଏନ୍.ଏ.): ଗଞ୍ଜାମ ସହରରେ ବୁଲାଗୋରୁଙ୍କ ଉପଦ୍ରବ ଦିନକୁଦିନ ବୃଦ୍ଧି ପାଇବାରେ ଲାଗିଛି। ଏହାର ସ୍ଥାୟୀ ପ୍ରତିକାର ନିମନ୍ତେ ଅଞ୍ଚଳବାସୀ ବାରମ୍ବାର ଦାବି କରି ଆସୁଥିଲେ ମଧ୍ୟ କୌଣସି ସୁଫଳ ମିଳୁ ନ ଥିଲା । ତେବେ ବିଳମ୍ବରେ ହେଲେ ମଧ୍ୟ ଏନ୍ଏସି କାର୍ଯ୍ୟନିର୍ବାହୀ ଅଧିକାରୀ ଦାୟିତ୍ୱରେ ଥିବା ତହସିଲଦାର ଅରୁଣ କୁମାର ନାୟକ ଏଥିପାଇଁ ପଦକ୍ଷେପ ଗ୍ରହଣ କରିଛନ୍ତି। ତହସିଲଦାରଙ୍କ ନିର୍ଦ୍ଦେଶରେ ଏନ୍ଏସି ସାନିଟେଶନ ଏକ୍ସପର୍ଟ ଅଫିସର ସୁମିତ କୁମାର ବେହେରା ସ୍ବିପରଙ୍କ ଦ୍ୱାରା ଶୁକ୍ରବାର ରାତିରେ ବଡ଼ ବଜାର ଓ ସାନ ବଜାରଠାରେ ଥିବା ବୁଲା ଗାଈଗୋରୁଙ୍କୁ ନେଇ ଷ୍ଟାଡିୟମରେ ଭର୍ତ୍ତି କରିଥିଲେ। ଏଥିପାଇଁ ହିଞ୍ଜିଳିକାଟୁରୁ ଏକ ଗୋରୁବୁହା ଗାଡ଼ି ଅଣାଯାଇଥିଲା। ଉକ୍ତ ଗାଡ଼ିରେ ଗାଈଗୋରୁଙ୍କୁ କଇଁଛପୁରସ୍ଥିତ ମାଳିଜଗନ୍ନାଥପୁରଠାରେ ଥିବା କାଓଶେଡ୍ରେ ଭର୍ତ୍ତି କରାଯିବ ବୋଲି ତହସିଲଦାର ସୂଚନା ଦେଇଛନ୍ତି । ଗାଈ ମାଲିକ ୫୦୦ ଟଙ୍କା ଜରିମାନା ଦେବା ସହ ଆଉ କେବେ ମାର୍କେଟକୁ ଛାଡ଼ିବେ ନାହିଁ ବୋଲି ଲିଖିତ ଭାବେ ଦରଖାସ୍ତ ଦେଇ ଗାଈ ନେବେ ବୋଲି ଏନ୍ଏସି ପ୍ରଶାସନ ପକ୍ଷରୁ କୁହାଯାଇଛି ।
