ବେଜିଂ,୬ ।୨: ବିଶ୍ୱର ସବୁଠାରୁ ଅଧିକ ଜନସଂଖ୍ୟା ଥିବା ଦେଶ ଚାଇନା ଏବେ ଜନସଂଖ୍ୟା କମାଇବାକୁ ଯାଇ ଅଡୁଆରେ ପଡିଯାଇଛି । ଏଠାରେ ଏବେ ପ୍ରତିବର୍ଷ ବିବାହର ସଂଖ୍ୟାହ୍ରାସ ପାଇବାରେ ଲାଗିଛି । ବାର୍ଷିକ ରିପୋର୍ଟ ଅନୁଯାୟୀ, ୨୦୨୨ରେ ସମ୍ପୂର୍ଣ୍ଣ ଚାଇନାରେ ମୋଟ ୧.୧୬ କୋଟି ଲୋକ ପ୍ରଥମ ବିବାହ କରିଥିଲେ । ତେବେ ୨୦୨୧ ତୁଳନାରେ ଏହି ସଂଖ୍ୟା ପ୍ରାୟ ୭ ଲକ୍ଷ କମ, ସେହିପରି ୨୦୧୩ର ୨.୩୯ କୋଟି ତୁଳନାରେ ଅଧା । ଏହି ସଂଖ୍ୟାରେ ହ୍ରାସକୁ ଦେଖି ଏହାକୁ ଜନସଂଖ୍ୟା ସହ ଯୋଡିଲେ ଏହା ଏକ ନୂଆ ବିପଦ ବୋଲି କୁହାଯାଉଛି । ଚାଇନାର ଯୁବକମାନେ ବିବାହ କାହିଁକି କରୁ ନାହାନ୍ତି ତାହା ଏବେ ଏକ ଚର୍ଚ୍ଚାର ବିଷୟ ପାଲଟି ଯାଇଛି ।
ଏହାର ଦୁଇଟି କାରଣ ଦର୍ଶାଯାଉଛି । ଗୋଟିଏ ହେଲା ଜାନୁୟାରୀ ୨୦୨୧ରୁ ଚାଇନାରେ ତଲାକ ପାଇଁ ୩୦ ଦିନର କୁଲିଂ ଅଫ ପିରିୟଡର ପ୍ରାବଧାନ କରାଯାଇଛି । ଏହାଦ୍ୱାରା ତଲାକର ସଂଖ୍ୟା ବି କମ ହେଲା । ଏହା ସ୍ୱାଧିନତାର ବିରୋଧରେ ବୋଲି କୁହାଗଲା, କାରଣ ଏବେ ତଲାକ ନେବା ଏତେ ସହଜ ନୁହେଁ ।
ଅନ୍ୟ କାରଣଟି ହେଉଛି, ଚାଇନାର ସମାଜଶାସ୍ତ୍ରୀଙ୍କ ମତରେ, ଏବେ ଯୁବକଙ୍କ ଜୀବନ ବହୁ ଚାପ ମଧ୍ୟ ଦେଇ ଗତି କରୁଛି । ମହଙ୍ଗା ବିବାହ ଖର୍ଚ୍ଚ, ଘର କିଣିବା, ପିଲାଙ୍କ ଲାଳନପାଳନ ଖର୍ଚ୍ଚ ଏସବୁ ଅଡୁଆରେ ପକାଉଛି ଯୁବପିଢିଙ୍କୁ । ଭାରତ ତୁଳନାରେ ଚାଇନାରେ ଖାଦ୍ୟ ୧୧୭ ପ୍ରତିଶତ, ଘରର ଭଡା ଓ ରକ୍ଷଣାବେକ୍ଷଣ ୧୧୧ ପ୍ରତିଶତ ମହଙ୍ଗା ।
