କେନ୍ଦୁଝର/ଆନନ୍ଦପୁର,୧୬ା୬(ସ୍ବ.ପ୍ର.): ଏକ ପ୍ରେମ ବିବାଦର ସମାଧାନ କରିବାକୁ ଯାଇ କେନ୍ଦୁଝର ଜିଲା ଘଷିପୁରା ନିର୍ବାଚନ ମଣ୍ଡଳୀର ବିଧାୟକ ତଥା ପୂର୍ବତନ ମନ୍ତ୍ରୀ ବଦ୍ରୀ ନାରାୟଣ ପାତ୍ରଙ୍କ ପୁଅ ଦେବାଶିଷ ପାତ୍ର ଅଡୁଆରେ ପଡ଼ିଛନ୍ତି। ମାମଲା ଚପାଇ ଦେବା ପାଇଁ ପ୍ରତାରଣାର ଶିକାର ହୋଇଥିବା ଜଣେ ଯୁବତୀଙ୍କୁ ସେ ଧମକଚମକ ଦେଇଥିବା ଏକ ଅଡିଓ ଭାଇରାଲ ହେବା ପରେ ଏହି ଘଟଣା ପଦାକୁ ଆସିଛି।
ସୂଚନା ଅନୁଯାୟୀ, ରାମଚନ୍ଦ୍ରପୁର ଥାନା ଅଞ୍ଚଳର ଜଣେ ଯୁବତୀଙ୍କ ସହିତ ପଦନପୁର ଗ୍ରାମର ସୁଜିତ ଜେନାଙ୍କ ସହ ୩ ବର୍ଷ ହେଲା ପ୍ରେମସମ୍ପର୍କ ରହିଥିଲା। ସୁଜିତ ବିବାହିତ ଜାଣିବା ପରେ ଯୁବତୀ ଜଣକ ଏହାର ପ୍ରତିବାଦ କରିଥିଲେ। ଯୁବତୀଙ୍କଠାରୁ ସୁଜିତ ୬୦ହଜାର ଟଙ୍କା ଧାର ନେଇଥିବା ଅଭିଯୋଗ ହୋଇଛି ା ସୁଜିତ ଉକ୍ତ ଯୁବତୀ ଓ ତାଙ୍କ ପରିବାର ଲୋକଙ୍କୁ ମାରିଦେବାକୁ ଧମକ ଦେବା ଘଟଣାକୁ ନେଇ ଗତ ୧୪ ତାରିଖରେ ଯୁବତୀ ରାମଚନ୍ଦ୍ରପୁର ଥାନାରେ ଲିଖିତ ଏତଲା ଦେଇଥିଲେ। ପୋଲିସ ଏକ ମାମଲା(ନଂ.୯୯/୨୧) ରୁଜୁ କରି ବୁଧବାର ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଥିଲା। ତେବେ ଏତଲା ଦେବା ସମୟରେ ସୁଜିତଙ୍କ ଭାଇ ଓ ବିଜେଡିର କେତେଜଣ ନେତା ଆପୋଷ ସମାଧାନ କରିବା ପାଇଁ ଯୁବତୀଙ୍କ ପରିବାର ଲୋକଙ୍କୁ ପ୍ରବର୍ତ୍ତାଇଥିବା ଅଭିଯୋଗ ହୋଇଛି। ସମାଧାନ ନ ହେବାରୁ ବିଧାୟକଙ୍କ ପୁଅ ଦେବାଶିଷ ୧୫ ତାରିଖରେ ସମ୍ପୃକ୍ତ ଯୁବତୀଙ୍କ ଘରକୁ ଯାଇ ବୁଝାଶୁଝା କରି ସମାଧାନ କରିବାକୁ କହିଥିଲେ। ଏହାର ସମାଧାନ ନ କଲେ ଭବିଷ୍ୟତରେ ଅସୁବିଧା ହେବ ବୋଲି ଧମକ ଦେଇଥିବା ଭାଇରାଲ ଅଡିଓରୁ ଜଣାପଡ଼ିଛି।
ଅନ୍ୟପକ୍ଷରେ ସୁଜିତଙ୍କ ସ୍ତ୍ରୀ ସମ୍ପୃକ୍ତ ଯୁବତୀଙ୍କ ବିରୋଧରେ ପାଲଟା ଅଭିଯୋଗ କରିଛନ୍ତି। ସେ ଏତଲାରେ ଦର୍ଶାଇଛନ୍ତି, ଯୁବତୀ ଜଣକ ତାଙ୍କ ସ୍ବାମୀଙ୍କୁ ଫସାଇ ଏଭଳି ଘଟଣା ଘଟାଉଛନ୍ତି। ଏ ସଂକ୍ରାନ୍ତରେ ବିଧାୟକଙ୍କ ପୁଅ ଦେବାଶିଷଙ୍କୁ ପଚାରିବାରୁ ସେ ଘଟଣା ସମ୍ପର୍କରେ ବୁଝାଇବାକୁ ଯୁବତୀଙ୍କ ଘରକୁ ଯାଇଥିଲେ, କାହାରିକୁ ଧମକଚମକ ଦେଇ ନାହାନ୍ତି କିମ୍ବା ଅଡିଓରେ ମଧ୍ୟ ସେଭଳି ଉକ୍ତି ନାହିଁ ା ରାଜନୈତିକ ଉଦ୍ଦେଶ୍ୟ ରଖି ତାଙ୍କ ବିରୋଧରେ ଏଭଳି ଅପପ୍ରଚାର କରାଯାଉଛି ବୋଲି କହିଛନ୍ତି।
