ବାରିପଦା ଅଫିସ/ବୈଶିଙ୍ଗା,୯ା୭(ଡି.ଏନ.ଏ.): ମୟୂରଭଞ୍ଜ ଜିଲା ବେତନଟୀ ରେଞ୍ଜ ଅଧୀନ ଫୁଲଝରୀ ଗ୍ରାମରେ ଶିମିଳିପାଳରୁ ଆସିଥିବା ଦନ୍ତା ଉତ୍ପାତରେ ଗୋଟିଏ ପରିବାର ସର୍ବସ୍ବାନ୍ତ ହୋଇଛନ୍ତି। ହାତୀ ଯୋଗୁ ନିଆଁ ଲାଗି ତାଙ୍କର ୨ ବଖରା ଘର ସମ୍ପୂର୍ଣ୍ଣ ଜଳିଯାଇଛି। ଘରେ ନିଆଁ ଜଳୁଥିବା ବେଳେ ବାହାରେ ହାତୀ ଜଗି ରହିଥିଲା। ବିପଦରୁ ବର୍ତ୍ତିବା ପାଇଁ ପରିବାରର ୪ ସଦସ୍ୟ ପଛପଟ ଝରକା ତାଡ଼ି ବାହାରକୁ ବାହାରିବା ସହ ଜୀବନ ବଞ୍ଚାଇବାକୁ ସକ୍ଷମ ହୋଇଥିଲେ।
ସୂଚନା ଅନୁଯାୟୀ, ଗୁରୁବାର ବିଳମ୍ବିତ ରାତିରେ ହାତୀପଲ ଗଁାରେ ପଶି ବ୍ୟାପକ ତାଣ୍ଡବ ରଚିଥିଲେ। ଗ୍ରାମର ସୁରାଇ ମୁର୍ମୁଙ୍କ ଘର ଚାଳରୁ ଏକ ଦନ୍ତା ନଡ଼ା ଟାଣି ଖାଇଥିଲା। ରୋଷେଇ ଘର ଚୁଲିରୁ ନିଆଁ ଲିଭି ନ ଥିବା ଯୋଗୁ ଛପରରୁ ନଡ଼ା ଖସି ଘରେ ନିଆଁ ଲାଗି ଯାଇଥିଲା। ଘରେ ନିଆଁ ଜଳୁଥିବା ବେଳେ ବାହାରେ ଦନ୍ତା ଜଗି ରହିବା ଦେଖି ପରିବାରର ୪ ସଦସ୍ୟ ଜୀବନ ବଞ୍ଚାଇବା ପାଇଁ କବାଟ ବନ୍ଦ କରି ରହିଥିଲେ। ତେବେ ବାହାରକୁ ବାହାରିବା ପାଇଁ ବାରମ୍ବାର ଚେଷ୍ଟା କରିଥିବା ବେଳେ ହାତୀ ଭୟରେ ବାହାରି ପାରି ନ ଥିଲେ। ସେମାନଙ୍କ ଚିତ୍କାର ଶୁଣି ପଡ଼ୋଶୀମାନେ ପହଞ୍ଚି ହାତୀକୁ ଘଉଡ଼ାଇବାକୁ ଚେଷ୍ଟା କରିଥିଲେ। ମାତ୍ର ହିଂସ୍ର ହୋଇଥିବା ଦନ୍ତାଟି ସେଠାରୁ ଯାଇ ନ ଥିଲା। ଫଳରେ ଘରର ପଛପଟ ଝରକା ତାଡ଼ି ସୁରାଇଙ୍କ ସହ ଝିଅ ହିସୀ, ଭାଇ ରାମଚନ୍ଦ୍ର ଓ ଭାଉଜ ଲକ୍ଷ୍ମୀ ବାହାରକୁ ଆସିଥିଲେ। ନିଆଁ ଲାଗି ସୁରାଇଙ୍କ ଘରେ ଥିବା ସମସ୍ତ ଆସବାବପତ୍ର, ଦରକାରୀ କାଗଜପତ୍ର ଓ ଧାନଚାଉଳ ପୋଡ଼ି ନଷ୍ଟ ହୋଇଯାଇଛି। ବିପନ୍ନ ପରିବାରକୁ ଆର୍ଥିକ ସହାୟତା ପ୍ରଦାନ ପାଇଁ ଅଞ୍ଚଳବାସୀ ଦାବି କରିଛନ୍ତି। ବେତନଟୀ ରେଞ୍ଜର କର୍ମଚାରୀମାନେ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି। ତେବେ ଦୀର୍ଘ ଦିନ ଧରି ଏହି ହାତୀପଲ ଗାଁ ଜଙ୍ଗଲ ଛାଡ଼ି ଶିମିଳିପାଳକୁ ଯାଉ ନ ଥିବାରୁ ଅଞ୍ଚଳରେ ଅସନ୍ତୋଷ ତେଜିବାରେ ଲାଗିଛି। ବନବିଭାଗ ହାତୀର ଗତିବିଧି ଉପରେ ନଜର ରଖିଥିବା ସୂଚନା ଦେଇଛି।
