ଭୁବନେଶ୍ୱର(ବ୍ୟୁରୋ)/ନରସିଂହପୁର (ସ୍ବ.ପ୍ର.)୨୯।୭: ଆଠଗଡ଼ ବନଖଣ୍ଡ ନରସିଂହପୁର ଜଙ୍ଗଲରେ ଗତ ୬ଦିନ ହେଲା ବୁଲୁଥିବା ଗୁଳିବିଦ୍ଧ ଦନ୍ତାକୁ ବନ ବିଭାଗ ଗୁରୁବାର ଠାବ କରି ଚିକିତ୍ସା ଆରମ୍ଭ କରିଛି। ନରସିଂହପୁର ପ୍ରାଣୀଧନ ଚିକିତ୍ସକ ବିଜୟ କୁମାର ସେନାପତି, ନନ୍ଦନକାନନ ଏବଂ ସାତକୋଶିଆର ବନ୍ୟପ୍ରାଣୀର ଏକ ଟିମ୍ ହାତୀର ଚିକିତ୍ସା କରୁଥିବା ଜଣାପଡ଼ିଛି। ହାତୀର ବୟସ ୨୫ରୁ ୩୦ବର୍ଷ ମଧ୍ୟରେ ହୋଇଥିବା ଅନୁମାନ କରାଯାଉଥିବାବେଳେ ତାର ଅବସ୍ଥା ଗୁରୁତର ରହିଛି। ତାକୁ ଟ୍ରାଙ୍କୁଲାଇଜ କରି ଚିକିତ୍ସା କରାଯାଉଥିବା ଆଠଗଡ଼ ବନଖଣ୍ଡ ଅଧିକାରୀ ସୁଦର୍ଶନ ଗୋପୀନାଥ ଯାଦବ କହିଛନ୍ତି। ସବୁଠାରୁ ଗୁରୁତ୍ୱପୂର୍ଣ୍ଣ କଥା ହେଉଛି, ହାତୀଟି ଗୁଳିର ଶିକାର ହୋଇଥିବା ସମ୍ପର୍କରେ ଗ୍ରାମବାସୀ ପୂର୍ବରୁ କହୁଥିବାବେଳେ ବନ ବିଭାଗ ଏହାକୁ ଖଣ୍ଡନ କରି ଆସୁଥିଲା। ଅନ୍ୟ ହାତୀଙ୍କ ସହ ଲଢ଼େଇରେ ଆହତ ହୋଇଥିବା ବନ ବିଭାଗ ସଫେଇ ଦେଉଥିଲା। ହେଲେ ଗୁରୁବାର ବାରିସିଂଗା ଜଙ୍ଗଲରେ ହାତୀଟି ଗୁରୁତର ଅବସ୍ଥାରେ ପଡ଼ିଥିବା ଦେଖିବାକୁ ମିଳିଥିଲା। ହାତୀର ବାମ କାନ, ଶୁଣ୍ଢ, ଗୋଡ଼ ଏବଂ ଶରୀରର ୨ଟି ସ୍ଥାନରେ ଛେର୍ରା(ଗୁଳି) ବାଜିଥିବା ଜଣାପଡ଼ିଛି। ଉକ୍ତ ସ୍ଥାନଗୁଡ଼ିକରେ ଗଭୀର କ୍ଷତ ହୋଇ ଘା’ ହୋଇଯାଇଥିବାରୁ ହାତୀର ଅବସ୍ଥା ସଙ୍କଟାପନ୍ନ ରହିଥିବା ଜଣାପଡ଼ିଛି।
ଉଲ୍ଲେଖଯୋଗ୍ୟ, ଗତ ମାସରେ ଏହି ଅଞ୍ଚଳରେ ଏକ ଗୁଳିବିଦ୍ଧ ଦନ୍ତାହାତୀ ବୁଲୁଥିଲା। ବଡ଼ମ୍ବା ବିଧାୟକ ଦେବୀପ୍ରସାଦ ମିଶ୍ର ଏସମ୍ପର୍କରେ ନିଜ ଫେସ୍ବୁକ ଆକାଉଣ୍ଟରେ ପୋଷ୍ଟ କରିବା ପରେ ବନ ବିଭାଗ ତତ୍ପରତା ଦେଖାଇଥିଲା। ସେତେବେଳେ ମଧ୍ୟ ହାତୀ ଶରୀରରେ ଗୁଳି ବାଜି ନ ଥିବା ବନ ବିଭାଗ କହିଥିଲା। ପରେ ତା’ ଶରୀରରେ ୬ଟି ଗୁଳି ବାଜିଥିବା ଜଣାପଡ଼ିଥିଲା। ଗୁଳିବିଦ୍ଧ ଅବସ୍ଥାରେ ହାତୀଟି କିଛି ଦିନ ରହିବା ପରେ ଦୁର୍ବଳ ହୋଇପଡ଼ିଥିଲା। ଚିକିତ୍ସା ବିଳମ୍ବରେ ଆରମ୍ଭ ହୋଇଥିବାରୁ ତାକୁ ବଞ୍ଚାଇବା ସମ୍ଭବ ହୋଇପାରି ନ ଥିଲା। ବନ ବିଭାଗର ଖାମ ଖିଆଲ ମନ୍ତବ୍ୟ ଏବଂ ତତ୍ପରତାର ଅଭାବ ଯୋଗୁ ହାତୀ ଶିକାରୀଙ୍କ ଦୌରାତ୍ମ୍ୟ ବୃଦ୍ଧି ପାଉଥିବା ସହ ନିରୀହ ହାତୀ ବଂଶ ଲୋପ ପାଇବାରେ ଲାଗିଛି। ହାତୀ ମୃତ୍ୟୁ ଏବଂ କଙ୍କାଳ ଉଦ୍ଧାର ଘଟଣାରେ ଫେରାର ଥିବା ଫରେଷ୍ଟର ମନୋଜ ଦାସ ଏବଂ ବଗ ପରିଡ଼ାଙ୍କୁ ଏଯାବତ୍ ବନ ବିଭାଗ ଧରିପାରି ନାହିଁ। ଏପରି କି କ୍ରାଇମ୍ବ୍ରାଞ୍ଚ କିମ୍ବା ଜିଲା ପୋଲିସ ମଧ୍ୟ ଫେରାର ଫରେଷ୍ଟରଙ୍କୁ ଧରିବା ପାଇଁ ଚେଷ୍ଟା କରୁନାହାନ୍ତି। ଅପରପକ୍ଷରେ ପୂର୍ବ ଘଟଣାରେ ଗିରଫ ହୋଇଥିବା ୫ଜଣ ଅଭିଯୁକ୍ତଙ୍କ ସହ ବନ କର୍ମଚାରୀଙ୍କୁ ଅଧିକ ଜେରା କଲେ ପ୍ରକୃତ କାରଣ ଜଣାପଡ଼ିବ ବୋଲି ବନଖଣ୍ଡ ଅଧିକାରୀ ଯାଦବ କହିଛନ୍ତି। ଏହି ଘଟଣାକୁ ନେଇ ବନ୍ୟପ୍ରାଣୀ ବିଶେଷଜ୍ଞମାନେ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି। ଏସମ୍ପର୍କରେ ବନ୍ୟପ୍ରାଣୀ ବିଶେଷଜ୍ଞ ଡ. ବିଶ୍ୱଜିତ୍ ମହାନ୍ତି କହିଛନ୍ତି, ଆହତ ହାତୀ ବିଷୟରେ ଗତ ୨୩ତାରିଖରେ ବନ୍ୟପ୍ରାଣୀ ପିସିସିଏଫ୍ଙ୍କୁ ସୂଚନା ଦେଇଥିଲୁ। ହାତୀଟି ଆହତ ହୋଇ ବୁଲୁଥିବାବେଳେ ଚିକିତ୍ସା କରିବା ବଦଳରେ ଆଠଗଡ଼ର ବିଭିନ୍ନ ରେଞ୍ଜର କର୍ମଚାରୀମାନେ ତାକୁ ନିଜ ରେଞ୍ଜରୁ ତଡ଼ିବାରେ ବ୍ୟସ୍ତ ଥିଲେ। ଏକଥା ସ୍ପଷ୍ଟଭାବେ ପିସିସିଏଫ୍ଙ୍କୁ ଜଣାଇଥିଲେ ସୁଦ୍ଧା କୌଣସି ତତ୍ପରତା ଦେଖିବାକୁ ମିଳି ନ ଥିଲା।ଏବେ ହାତୀ ଗୁରୁତର ଅବସ୍ଥାରେ ଜୀବନ ସହ ସଂଗ୍ରାମ କରୁଛି। ବିଶେଷକରି ସତ ମାନିବାକୁ ବନବିଭାଗ କାହିଁକି ନାରାଜ ହେଉଛି ତାହା ସନ୍ଦେହ ସୃଷ୍ଟି ହେଉଛି। ଗୋଟିଏ ମାସ ବ୍ୟବଧାନରେ ୨ଟି ହାତୀ ଗୁଳିବିଦ୍ଧ ହେବା ଏବଂ ଗୋଟିକର ମୃତ୍ୟୁ ଘଟିଥିବାବେଳେ ଅନ୍ୟଟି ମୁମୂର୍ଷୁ ଅବସ୍ଥାରେ ପଡ଼ିରହିବା ପରେ ମଧ୍ୟ ବନବିଭାଗ କେବେ ଚେତିବ ବୋଲି ବିଶ୍ୱଜିତ୍ ପ୍ରଶ୍ନ କରିଛନ୍ତି।
