ଜଗତ୍ସିଂହପୁର ଅଫିସ,୧୮।୯: ସର୍ବଶିକ୍ଷା ଅଭିଯାନ ଜିଲା ପ୍ରକଳ୍ପ ସଂଯୋଜକ (ଡିପିସି) ସପନ ଜେନାଙ୍କ ପଦୋନ୍ନତି ହୋଇଛି। ସେ ଜିଲା ଶିକ୍ଷା ଅଧିକାରୀ (ଡିଇଓ) ପଦବୀ ଅଳଙ୍କୃତ କରିଛନ୍ତି। ପଦୋନ୍ନତି ପରେ ୮ ତାରିଖରେ ତାଙ୍କୁ ନୟାଗଡ଼ ଡିଇଓ ଭାବେ ଯୋଗଦେବାକୁ ନିର୍ଦ୍ଦେଶ ଦିଆଯାଇଛି। କିନ୍ତୁ ଏଥିମଧ୍ୟରେ ୯ ଦିନ ଅତିକ୍ରାନ୍ତ ହୋଇ ଯାଇଥିଲେ ସୁଦ୍ଧା ସେ ଜଗତ୍ସିଂହପୁର ଛାଡିନାହାନ୍ତି। କାହିଁକି ଛାଡୁନାହାନ୍ତି ତାକୁ ନେଇ ନାନା କଥା ଆଲୋଚନା ଚାଲିଛି। ଏ ସମ୍ପର୍କରେ ସ୍ଥାନୀୟ କେତେଜଣ ବୁଦ୍ଧିଜୀବୀ ପ୍ରତିକ୍ରିୟାରେ କହିଛନ୍ତି, ଜେନା ଜଗତ୍ସିଂହପୁର ଜିଲାରେ ପାଖାପାଖି ୧୨ ବର୍ଷରୁ ଅଧିକ ସମୟ କଟାଇ ସାରିଲେଣି। ୧୯୯୬ରୁ ପାଖାପାଖି ୬/୭ ବର୍ଷ କାଳ ରଘୁନାଥପୁର ପି.ସି. ବିଦ୍ୟାପୀଠର ପ୍ରଧାନଶିକ୍ଷକ ଥିଲେ। ପରେ ଅନ୍ୟତ୍ର ବଦଳି ହୋଇ ଯାଇଥିଲେ। ୨୭ା୬ା୨୦୧୪ରୁ ଡିପିସି ଭାବେ ପୁଣି ଜଗତ୍ସିଂହପୁର ଫେରିଥିଲେ। ସେବେଠାରୁ ୬ ବର୍ଷରୁ ଅଧିକ ସମୟ ହେବ ଜଗତ୍ସିଂହପୁର ଡିପିସି ଭାବେ କାମ କରି ଆସୁଥିଲେ। ଏବେ ପଦୋନ୍ନତି ଓ ବଦଳି ହେଲା ପରେ ସେ ଜଗତ୍ସିଂହପୁର ଡିଇଓ ହେବାକୁ ଚାହୁଁଥିବା ସହରରେ ଚର୍ଚ୍ଚା ଚାଲିଛି। ଏ ସମ୍ପର୍କରେ ଜେନାଙ୍କୁ ପଚାରିବାରୁ ସେ କହିଥିଲେ, ପୂର୍ବରୁ ପ୍ରଧାନଶିକ୍ଷକ ଭାବେ ପାଖାପାଖି ୪ ବର୍ଷ ରହିଥିଲେ। ଏବେ ଡିପିସି ଭାବେ ୬ ବର୍ଷରୁ ଅଧିକ ସମୟ ରହିଲେଣି। ଜଗତ୍ସିଂହପୁର ଡିଇଓଙ୍କ ବଦଳି ହୋଇଛି। ତେଣୁ ତାଙ୍କୁ ଏହି ସ୍ଥାନରେ ରଖିବା ପାଇଁ ସେ ବିଭାଗୀୟ ନିର୍ଦ୍ଦେଶକଙ୍କୁ ଅନୁରୋଧ କରିଛନ୍ତି। ସେ କଟକରେ ରହୁଥିବାରୁ ନୟାଗଡ଼ ଦୂର ହେବ। ତେଣୁ ବଦଳି ବାତିଲ ପାଇଁ ନିର୍ଦ୍ଦେଶକଙ୍କ ନିକଟରେ ନିବେଦନ କରିଥିବା କହିଛନ୍ତି।
