ନୂଆଦିଲ୍ଲୀ,୧୮।୯: ଚଳିତବର୍ଷ ସାରା ବିଶ୍ୱରେ କରୋନା ମହାମାରୀ କାୟା ବିସ୍ତାର କରି ଲକ୍ଷ ଲକ୍ଷ ଲୋକଙ୍କ ଜୀବନ ନେଲାଣି। ଭାରତରେ ମଧ୍ୟ ଏହି ମହାମାରୀ ଯୋଗୁ ଅନେକ ଲୋକଙ୍କ ଜୀବନ ଗଲାଣି। ତେବେ ଭାରତ ପାଇଁ ଆଉ ଏକ ବିପଦ ସାଜିଛି ଭୂକମ୍ପ। ୨୦୨୦ ମସିହାରେ ଦେଶରେ ଅନେକ ଛୋଟ ଏବଂ ବଡ଼ ଭୂକମ୍ପ ଲୋକେ ଅନୁଭବ କରିଲେଣି। ଗତ ୭ ମାସରେ ଦେଶରେ ୪୧୩ଥର ଭୂକମ୍ପ ହୋଇଥିବା ବିଜ୍ଞାନ ଏବଂ ବୈଷୟିକ ମନ୍ତ୍ରୀ ଡା ହର୍ଷବର୍ଦ୍ଧନ ରାଜ୍ୟ ସଭାରେ ସୂଚନା ଦେଇଛନ୍ତି।
୨୦୨୦ ମାର୍ଚ୍ଚରୁ ସେପ୍ଟେମ୍ବର ୮ ପର୍ଯ୍ୟନ୍ତ ଭାରତରେ ସମୁଦାୟ ୪୧୩ ଥର ଭୂକମ୍ପ ଘଟିଛି। ଜାତୀୟ ଭୂକମ୍ପ ବିଜ୍ଞାନ ନେଟୱାର୍କ (ଏନ୍ଏସ୍ଏନ୍)ଦ୍ୱାରା ଏହି ଭୂକମ୍ପ ଆକଳନ ବିଜ୍ଞାନ ମନ୍ତ୍ରଣାଳୟକୁ ଦିଆଯାଇଛି। ଏହି ୪୧୩ ଭୂକମ୍ପ ମଧ୍ୟରୁ ୧୩୫ଟି ଭୂକମ୍ପ ଏଭଳି ସୃଷ୍ଟି ହୋଇଥିଲା ଯାହାର ତୀବ୍ରତା ବହୁତ କମ ଥିଲା। ଏଭଳି ଭୂକମ୍ପକୁ ଲୋକେ ଅନୁଭବ କରିପାରି ନ ଥିଲେ। ୧୫୩ଟି ଭୂକମ୍ପ ଝଟ୍କା ଲୋକେ ଅନୁଭବ କରିପାରିଥିଲେ। କିନ୍ତୁ କୌଣସି ଅଧିତ୍କ କ୍ଷୟକ୍ଷତି ହୋଇ ନ ଥିଲା। ଏହି ସମୟ ମଧ୍ୟରେ ଭୂକମ୍ପ ତୀବ୍ରତା ରିକ୍ଟର ସ୍କେଲରେ ୩ରୁ ୩.୯ ଥିଲା। ୧୧୪ଥର ଭୂକମ୍ପ ୪.୦ରୁ ୪.୯ ତୀବ୍ରତାର ଥିଲା। ଯାହା ଦେଶର ବଡ ବଡ ସହରରେ ଅନୁଭୂତ ହୋଇଥିଲା। ସେହିପରି ୫.୦ରୁ ୫.୯ ତୀବ୍ରତାର ଭୂକମ୍ପ ୧୧ଥର ସୃଷ୍ଟି ହୋଇଥିଲା। ସୌଭାଗ୍ୟବଶତଃ ଏଥିରେ କୌଣସି ଲୋକ ମୃତାହତ ହୋଇ ନ ଥିଲେ। ଅବଶ୍ୟ କିଛି ଦୁର୍ବଳ କୋଠା ଏବଂ ସାଧାରଣ କ୍ଷୟକ୍ଷତି ହୋଇଥିବା ଜଣାପଡିଥିଲା। ଗତ ଏପ୍ରିଲ ଏବଂ ମେ ମାସରେ ଅଧିକଥର ଭୂକମ୍ପ ଅନୁଭୂତ ହୋଇଥିଲା। ୨୦୧୯ରେ ୪.୨ତୀବ୍ରତାର ୩୩୮ଟି ଭୂକମ୍ପ ହୋଇଥିଲା ବୋଲି ମନ୍ତ୍ରୀ ସୂଚନା ଦେଇଛନ୍ତି।
