କୋଲକାତା, ୫।୭- ସ୍ଥାନୀୟ ଐତିହାସିକ ଇଡେନ ଗାର୍ଡେନ୍ସ ଗ୍ରାଉଣ୍ଡର ଜଣେ ଅସ୍ଥାୟୀ କର୍ମଚାରୀ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଫଳରେ କ୍ରିକେଟ୍ ଆସୋସିଏଶନ ଅଫ୍ ବେଙ୍ଗଲ (ସିଏବି) କାର୍ଯ୍ୟାଳୟକୁ ରବିବାରଠାରୁ ୭ ଦିନ ପର୍ଯ୍ୟନ୍ତ ବନ୍ଦ ରଖିବାକୁ ନିଷ୍ପତ୍ତି ନିଆଯାଇଛି। ସିଏବିର ଅଧ୍ୟକ୍ଷ ଅଭିଷେକ ଡାଲମିୟା କହିଛନ୍ତି, ‘ସିଭିଲ୍ ଇଞ୍ଜିନିୟରିଂ ବିଭାଗରେ ଅସ୍ଥାୟୀ ଭାବେ କାମ କରୁଥିବା ଚନ୍ଦନ ଦାସ ନାମକ ଜଣେ ବ୍ୟକ୍ତି କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ତାଙ୍କୁ ସ୍ଥାନୀୟ ଏକ ହସ୍ପିଟାଲରେ ଭର୍ତ୍ତି କରାଯାଇଛି। ଆଶ୍ୱସ୍ତିକର ଖବର ଯେ ସେ ଏକ ସପ୍ତାହ ହେବ ସିଏବି କାର୍ଯ୍ୟାଳୟ ଆସି ନ ଥିଲେ। କିନ୍ତୁ ଡାକ୍ତରଙ୍କ ପରାମର୍ଶକ୍ରମେ ଆଗାମୀ ୭ ଦିନ ସିଏବି କାର୍ଯ୍ୟାଳୟ ନ ଆସିବା ଲାଗି ଆମେ ସମସ୍ତଙ୍କୁ କହିଛୁ। ଏହି ସମୟ ମଧ୍ୟରେ ସିଏବି କାର୍ଯ୍ୟାଳୟକୁ ସାନିଟାଇଜର କରାଯିବ।’
