ଭୁବନେଶ୍ବର, ୧୭।୭(ବ୍ୟୁରୋ): ରାଷ୍ଟ୍ରପତି ପ୍ରାର୍ଥୀ ଯଶଓ୍ବନ୍ତ ସିହ୍ନାଙ୍କୁ ରାଜ୍ୟ କଂଗ୍ରେସ ପକ୍ଷରୁ ସମସ୍ତ ବିଧାୟକ ଏବଂ ଏମ୍ପି ଭୋଟ ଦେବେ। ଏନେଇ ଶନିବାର ପ୍ରଦେଶ କଂଗ୍ରେସ କମିଟି(ପିସିସି) ସଭାପତି ଶରତ ପଟ୍ଟନାୟକ ସୂଚନା ଦେଇଛନ୍ତି। ଦିଲ୍ଲୀରୁ ଫେରିବା ପରେ କଂଗ୍ରେସ ବିଧାୟକମାନଙ୍କୁ ପିସିସି ସଭାପତି ସାକ୍ଷାତ କରିଛନ୍ତି। ଦିଲ୍ଲୀରେ ହାଇକମାଣ୍ଡ ଶୁଣାଇଥିବା ନିଷ୍ପତ୍ତି ସମ୍ପର୍କରେ ସେ ବିଧାୟକମାନଙ୍କୁ ଅବଗତ କରାଇଛନ୍ତି। ଯଶଓ୍ବନ୍ତ ହାରନ୍ତୁ ବା ଜିତନ୍ତୁ ତାଙ୍କୁ ଭୋଟ ଦିଆଯିବ ବୋଲି କଂଗ୍ରେସ ବୈଠକରେ ନିଷ୍ପତ୍ତି ହୋଇଥିବା ଜଣାପଡ଼ିଛି। ନିର୍ବାଚନ ଲାଗି ପୂର୍ବତନ ମନ୍ତ୍ରୀ ଗଣେଶ୍ୱର ବେହେରା ଓ ବିଧାୟକ ସନ୍ତୋଷ ସିଂ ସାଲୁଜାଙ୍କୁ କଂଗ୍ରେସର ଏଜେଣ୍ଟ ଭାବେ ନିଯୁକ୍ତ କରାଯାଇଛନ୍ତି। ତେବେ ଏନ୍ଡିଏ ପ୍ରାର୍ଥୀ ଭାବେ ଓଡ଼ିଆ ଝିଅ ଦ୍ରୌପଦୀ ମୁର୍ମୁଙ୍କୁ ଶାସକ ବିଜେଡି ସମର୍ଥନ କରିଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ସମସ୍ତ ବିଧାୟକ ଏବଂ ଏମ୍ପିଙ୍କୁ ଦ୍ରୌପଦୀଙ୍କୁ ଭୋଟ ଦେବା ନେଇ ନିର୍ଦ୍ଦେଶ ଦେଇସାରିଛନ୍ତି। ଅନ୍ୟପଟେ ଏନେଇ ମୁଖ୍ୟମନ୍ତ୍ରୀ ଶନିବାର ମଧ୍ୟ ଏକ ଗୁରୁତ୍ୱପୂର୍ଣ୍ଣ ବୈଠକ ଲୋକ ସଭା ଏବଂ ରାଜ୍ୟ ସଭା ସଦସ୍ୟମାନଙ୍କ ସହ କରିଛନ୍ତି।
ନିକଟରେ ଓ଼ଡିଶାର ଦୁଇ ଭାଜପା ବିଧାୟକ ମୁକେଶ ମହାଲିଙ୍ଗ ଏବଂ ନାଉରି ନାଏକ ରାଷ୍ଟ୍ରପତି ନିର୍ବାଚନ ପୂର୍ବରୁ ଯେପରି କ୍ରସ୍ ଭୋଟିଂ ନ ହୁଏ ସେନେଇ କେନ୍ଦ୍ରରେ ହୋଇଥିବା ଏକ ଟ୍ରେନିଂ କ୍ୟାମ୍ପରେ ସାମିଲ ହୋଇଥିଲେ। ଶନିବାର ଏବଂ ରବିବାର ଆଉ ଏକ ଟ୍ରେନିଂ କ୍ୟାମ୍ପ ଦିଲ୍ଲୀରେ ଭାଜପା ପକ୍ଷରୁ ଆରମ୍ଭ ହୋଇଛି। ସେଥିରେ ଭାଜପାର ସମସ୍ତ ଏମ୍ପି ସାମିଲ ହେଉଥିବା ଜଣାପଡ଼ିଛି। ଅନ୍ୟପଟେ ଭାଜପା ନେତ୍ରୀ ଲେଖାଶ୍ରୀ ସାମନ୍ତସିଂହାର କହିଛନ୍ତି, ଆସନ୍ତା ୧୮ରେ ରାଷ୍ଟ୍ରପତି ନିର୍ବାଚନ ହେବ। ଏହି ଅବସରରେ ଭାଜପା ଦ୍ରୌପଦୀ ମୁର୍ମୁଙ୍କ ବିଜୟ ପାଇଁ ରବିବାର ଓଡ଼ିଶାର ସମସ୍ତ ମନ୍ଦିର, ଦେବସ୍ଥାନ, ପୂଜାସ୍ଥଳୀରେ ପୂଜା ଅର୍ଚ୍ଚନା କରି ବିଜୟ କାମନା କରିବ। ଦଳର ସମସ୍ତ ବରିଷ୍ଠ ନେତୃବୃନ୍ଦ, ବିଧାୟକ, ଏମ୍ପି, ବିଧାୟକ ପ୍ରାର୍ଥୀ, ଏମ୍ପି ପ୍ରାର୍ଥୀ, ରାଜ୍ୟ ପଦାଧିକାରୀ ଓ କାର୍ଯ୍ୟକର୍ତ୍ତାମାନେ ଏହି କାର୍ଯ୍ୟକ୍ରମରେ ସାମିଲ ହେବା ସହ ପୂଜାର୍ଚ୍ଚନା କରି ଭଗବାନକୁ ପ୍ରାର୍ଥନା କରିବାକୁ ସେ କହିଛନ୍ତି। ଅନ୍ୟପଟେ ଶନିବାର କ୍ରସ୍ ଭୋଟିଂ ନ ହେବା ଲାଗି ଦଳର ରାଜ୍ୟ କାର୍ଯ୍ୟାଳୟଠାରେ ଏକ ମକ୍ଡ୍ରିଲ୍ ଅନୁଷ୍ଠିତ ହୋଇଯାଇଛି। ମୁକେଶ ମହାଲିଙ୍ଗଙ୍କୁ ଭାଜପାର ନିର୍ବାଚନ ଏଜେଣ୍ଟ କରାଯାଇଛି। ସେହିପରି ବିଜେଡ଼ି ମଧ୍ୟ କ୍ରସ ଭୋଟିଂ ରୋକିବାକୁ ବିଧାନସଭାରେ ଏକ ମକ୍ଡ୍ରିଲ କାର୍ଯ୍ୟକ୍ରମ କରିଛି।
