ଚନ୍ଦାହାଣ୍ଡି, ୨୧।୮(ଡି.ଏନ୍.ଏ.): ମଶାଣୀକୁ ଯିବାକୁ ନାହିଁ ରାସ୍ତା। ନାଳରେ କମ୍ ଉଚ୍ଚତା ପୋଲ। ତେଣୁ ଛାତିଏ ପାଣିରେ ପଶି ମୃତଦେହକୁ ସତ୍କାର ପାଇଁ ନେଇଛନ୍ତି ପରିବାର ଲୋକେ। ଏପରି ଦୃଶ୍ୟ ନବରଙ୍ଗପୁର ଜିଲା ଚନ୍ଦାହାଣ୍ଡି ବ୍ଲକ ଅନକାବେଡା ପଞ୍ଚାୟତ ଅଧୀନ ଚକାମାଲ ଗ୍ରାମରେ ଦେଖିବାକୁ ମିଳିଛି। ଏହାକୁ ନେଇ ଅସନ୍ତୋଷ ଦେଖାଦେଇଛି।
ସୂଚନାନୁସାରେ ଚକାମାଲ ଗ୍ରାମ ହରିଜନ ସାହିର ମନିରାମ ସୁନାନୀ (୫୮)ଙ୍କ ଶନିବାର ମୃତ୍ୟୁ ହୋଇଛି। ଗାଁ ନାଳ ପାରିହେଲେ ମଶାଣୀ ପଡେ। ଏପଟେ ଲଗାଣ ବର୍ଷା ରେ ନାଳରେ ବନ୍ୟା ପାଣି ଛାତିଏ ଜମି ରହିଛି। ନାଳରେ ଥିବା ପୋଲ କମ ଉଚତା ବିଶିଷ୍ଟ ହୋଇ ଥିବାରୁ ଏହା ଉପରେ ଦୁଇଫୁଟ ପାଣି। କିନ୍ତୁ ଅନ୍ୟ ଉପାୟ ନ ପାଇ ପରିବାର, ସମ୍ପର୍କୀୟ ଓ ଗ୍ରାମବାସୀ ମୃତଦେହକୁ ଛାତିଏ ପାଣିରେ କାନ୍ଧ ରେ ବୋହି ନାଳ ସେପଟେ ଥିବା ମଶାଣୀକୁ ନେଇ ସତ୍କାର କରି ଥିଲେ। ମଶାଣୀରେ ଘର ନ ଥିବାରୁ ବର୍ଷାରେ ଭିଜିଭିଜି ମୃତଦେହ ସତ୍କାର କରାଯାଇଛି। ଏହାକୁ ନେଇ ଗ୍ରାମବାସୀ ମାନଙ୍କ ମଧ୍ୟରେ ତିବ୍ର ଅସନ୍ତୋଷ୍ଟ ଦେଖାଦେବା ସହ ତୁରନ୍ତ ପ୍ରଶାସନ ଦ୍ରୁଷ୍ଟି ଦେଇ ପଦକ୍ଷେପ ନେବାକୁ ଦାବି କରିଛନ୍ତି। ପ୍ରକାଶ ଥାଉକି ଚକାମାଳ, ଏବଂ ଅନକାବେଡା ପଞ୍ଚାୟତ ସଦର ମଝିରେ ଏକ ନାଳ ରହିଛି । ୮୦ ଦଶକରେ ତତ୍କାଳୀନ ଅନକାବେଡା ସରପଞ୍ଚ ସ୍ବର୍ଗତ ମୁକୁନ୍ଦ ପାଣ୍ଡେଙ୍କ ପ୍ରଚେଷ୍ଟାରେ ଏକ କମ ଉଚ୍ଚତାର ପୋଲ ନିର୍ମାଣ କରା ଯାଇଥିଲା। ବର୍ତ୍ତମାନ ଏହା ଭଗ୍ନ ଅବସ୍ଥାରେ। ଏହାରି ଭିତରେ ଅନକାବେଡାରୁ କୋନ୍ଦିଓଡା ଛକ ପ୍ରର୍ଯ୍ୟନ୍ତ ଆର୍ଡି ରୋଡ ତିଆରି ହୋଇଛି। ଆର୍ ଡି ରୋଡ ତିଆରି ହୋଇ ଥିଲେ ମଧ୍ୟ ପୁରୁଣା ପୋଲକୁ ଉଚ୍ଚା କରା ନ ଯାଇ ଏହାରି ଉପରେ ପିଚୁ ପକାଇ କାମ ସାରି ଦେଇଛନ୍ତି । ବର୍ଷା ମାସରେ ନାଳ ବନ୍ୟାପାଣିରେ ଫୁଲିବା ସହ ପୋଲ ଉପରେ ୩ ରୁ ୪ ଫୁଟ ପାଣି ଆସିବାରୁ ଅନକାବେଡା ଏବଂ ଚକାମାଳର ଯୋଗାଯୋଗ ବିଛିନ୍ନ ହୋଇ ପଡିଥାଏ। ସେ ପଟେ ଥିବା ବିଲକୁ କିମ୍ବା ପଞ୍ଚାୟତ କାର୍ଯ୍ୟଳୟକୁ ଗଲେ ଲୋକଙ୍କୁ ୫ କି ମି ବରିଗୁଡା ଛକ ଦେଇକି ଯିବାକୁ ପଡିଥାଏ ବୋଲି ଗ୍ରାମବାସୀ କହିଛନ୍ତି। ଏ ବାବଦ ରେ ପ୍ରଶାସନିକ ଅଧିକାରୀ ଏବଂ ଜନପ୍ରତିନିଧିଙ୍କୁ ଗୁହାରି କଲେ ହଁ ରେ ହଁ ମାରି କେବଳ ମାପ ନେଇ ସେମାନେ ଉଭାନ ହୋଇ ଯାଉଥିବା ଗ୍ରାମବାସୀ କହିଛନ୍ତି। ଏ ନେଇ ଗ୍ରାମ୍ୟ ଉନ୍ନୟନ ବିଭାଗର କନିଷ୍ଠ ଯନ୍ତ୍ରୀ ରାଜେଶ ସୋରେନଙ୍କୁ ପଚାରିବାରୁ ଏହାକୁ ଉଚ୍ଚତା ବିଶିଷ୍ଟ କରି ନିର୍ମାଣ କରା ଯିବା ପାଇଁ ପଦକ୍ଷେପ ନିଆଯିବ ବୋଲି କହିଛନ୍ତି।
