ବରଗଡ଼ ଅଫିସ୍,୧୭।୭: ସୋନପୁରରୁ ଛତିଶଗଡ଼ ଚାଲାଣ ହେଉଥିବା ବେଳେ ୨ଟି ଗଞ୍ଜେଇ ବୋଝେଇ କାର୍କୁ ବରଗଡ଼ ଜିଲା ସୋହେଲା ପୋଲିସ ଜବତ କରିଛି। ଜବତ ଗଞ୍ଜେଇର ପରିମାଣ ୨୩୩ କି.ଗ୍ରା ହେବ। ଘଟଣାରେ ସମ୍ପୃକ୍ତ ୪ଜଣଙ୍କୁ ପୋଲିସ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ ଛତିଶଗଡ଼ ରାଜ୍ୟ ଧନ୍ତରୀ ଜଲା କୁରୁଡ଼ ଥାନା ଡର୍ବା ଗ୍ରାମର ହେମରାଜ ନିଶାଦ(୨୩), କଙ୍କେର ଜିଲା ଚାର୍ମା ଗ୍ରାମର ସଞ୍ଜୟ ତ୍ରିପାଠୀ(୨୪), ଅଜୟ ତ୍ରିପାଠୀ(୩୦) ଏବଂ ଗୌରବ ଖପାର୍ଡ଼େ(୨୬)। ସେମାନଙ୍କ ପାଖରୁ ଗଞ୍ଜେଇ ବୋଝେଇ ୨ଟି କାର୍ (ନଂ.ସିଜି୦୪ଏନଏଚ/୯୯୯୮ ଏବଂ ନଂ.ସିଜି୦୪ଏଲଡି/୫୬୬୫) ସମେତ ୬ଟି ମୋବାଇଲ, ନଗଦ ୧୩ହଜାର ୧୨୦ଟଙ୍କା, ଆଧାର କାର୍ଡ଼ ଆଦି ଜବତ ହୋଇଛି। ଏ ନେଇ ସୋହେଲା ଥାନାରେ ଏକ ମାମଲା (ନଂ.୧୨୪/୨୧) ରୁଜୁ ହୋଇଛି। ଗିରଫ ଅଭିଯୁକ୍ତମାନଙ୍କୁ ଶନିବାର ସୋହେଲା କୋର୍ଟକୁ ଚାଲାଣ କରାଯାଇଛି। ଅଭିଯୁକ୍ତମାନେ କାର୍ ସମ୍ମୁଖ କାଚରେ ପ୍ରେସ୍ ଲେଖି ଗଞ୍ଜେଇ ଚାଲାଣ କରୁଥିଲେ ବୋଲି ଶନିବାର ଜିଲା ପୋଲିସ ମୁଖ୍ୟାଳୟରେ ଅନୁଷ୍ଠିତ ଖବରଦାତା ସମ୍ମିଳନୀରେ ଏସ୍ପି ରାହୁଲ ଜୈନ ସୂଚନା ଦେଇଛନ୍ତି ।
ଏସ୍ପି ଜୈନ କହିଥିଲେ, ଶୁକ୍ରବାର ସୋନପୁରରୁ ବରଗଡ଼ ଦେଇ ଛତିଶଗଡ଼ ଅଞ୍ଚଳକୁ ବିପୁଳ ପରିମାଣରେ ଗଞ୍ଜେଇ ଚାଲାଣ ହେଉଥିବା ନେଇ ସୋହେଲା ପୋଲିସକୁ ସୂଚନା ମିଳିଥିଲା। ଏହି ସୂଚନାକୁ ଆଧାର କରି ସୋହେଲା ଥାନା ଅଧିକାରୀ ଏଚ.ବି ଗଡ଼ତିଆଙ୍କ ନେତୃତ୍ୱରେ ଏକ ପୋଲିସ ଟିମ୍ ସୋହେଲା ବ୍ଲକ ଅଫିସ ଛକକୁ ନାକାବନ୍ଦୀ କରିଥିଲେ। ସେତେବେଳେ ଉକ୍ତ ଦୁଇଟି କାର୍ ଯୋଗେ ଅଭିଯୁକ୍ତମାନେ ଗଞ୍ଜେଇ ଚାଲାଣ କରୁଥିବା ବେଳେ ଧରାପଡ଼ିଥିଲେ। ଖବରଦାତା ସମ୍ମିଳନୀରେ ପଦ୍ମପୁର ଏସ୍ଡ଼ିପିଓ ପ୍ରଦୀପ କୁମାର ସାହୁ ଉପସ୍ଥିତ ଥିଲେ ।
