କଟକ ଅଫିସ, ୯ା୧: କଟକ ଜିଲା ମାହାଙ୍ଗା ବ୍ଲକର ପୂର୍ବତନ ଅଧ୍ୟକ୍ଷ ତଥା ଭାଜପା ନେତା କୁଳମଣି ବରାଳ ଓ ତାଙ୍କ ସହଯୋଗୀ ଦିବ୍ୟସିଂହ ବରାଳଙ୍କୁ ଗତ ୨ ତାରିଖରେ ହତ୍ୟା କରାଯାଇଥିଲା। ଏହି ହତ୍ୟାକାଣ୍ଡକୁ ନେଇ ଭାଜପା ପୂର୍ବରୁ ରାଜ୍ୟର ସମସ୍ତ ଏସ୍ପି କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ କରିଥିଲାବେଳେ ଶୁକ୍ରବାର କଟକସ୍ଥିତ ଡିଜିପି ଅଫିସ ଘେରାଉ କରିଥିଲା। ଭାଜପାର ୨୦ରୁ ଊର୍ଦ୍ଧ୍ୱ ନେତୃବୃନ୍ଦ କାର୍ଯ୍ୟାଳୟ ଭିତରେ ଡିଜିପିଙ୍କ ସହ ଦୀର୍ଘ ସମୟ ଧରି ଆଲୋଚନା କରୁଥିବାବେଳେ ବାହାରେ ଅପ୍ରିତିକର ପରିସ୍ଥିତି ଦେଖିବାକୁ ମିଳିଥିଲା। ବାହାରେ ଭାଜପା କର୍ମୀ ଓ ପୋଲିସ କର୍ମଚାରୀ ଠେଲାପେଲା ହେବା ସହ ଧସ୍ତାଧସ୍ତି ହୋଇଥିଲେ। ମାହାଙ୍ଗା ଡବଲ ମର୍ଡର ଘଟଣାରେ ଆଇନ ମନ୍ତ୍ରୀ ପ୍ରତାପ ଜେନା ଓ ଅନ୍ୟ ଯେଉଁମାନଙ୍କ ନଁାରେ ଏତଲା ଦିଆଯାଇଛି, ତୁରନ୍ତ ସମସ୍ତଙ୍କୁ ଗିରଫ କରିବା ପାଇଁ ଭାଜପା ନେତାମାନେ ଦାବି କରିଥିଲେ। ଏନେଇ ଡିଜିପି ଅସହାୟ ପ୍ରକାଶ କରିଥିଲେ ବୋଲି ଭାଜପା ପକ୍ଷରୁ କୁହାଯାଇଛି। ଆଗାମୀ ଦଶଦିନ ମଧ୍ୟରେ ଜଣେ ଡିଆଇଜି ର଼୍ୟାଙ୍କ୍ର ଅଫିସର ଉକ୍ତ ଘଟଣାର ତଦନ୍ତ କରି ରିପୋର୍ଟ ଦେବେ ବୋଲି ଡିଜିପି ଅଭୟ ପ୍ରତିଶ୍ରୁତି ଦେଇଛନ୍ତି।
ଶୁକ୍ରବାର ପୂର୍ବାହ୍ନରେ କଟକ ମାତାମଠଠାରୁ ଶତାଧିକ ଭାଜପା କର୍ମୀ ବିରାଟ ଶୋଭାଯାତ୍ରାରେ ବାହାରି ଡିଜିପିଙ୍କ କାର୍ଯ୍ୟାଳୟ ସମ୍ମୁଖରେ ପହଞ୍ଚିଥିଲେ। ସେଠାରେ କଟକ ଜିଲା ସଭାପତି ପ୍ରକାଶ ବେହେରାଙ୍କ ପୌରୋହିତ୍ୟରେ ପ୍ରତିବାଦ ସଭା ଅନୁଷ୍ଠିତ ହୋଇଥିଲା। ମାହାଙ୍ଗା ଡବଲ୍ ମର୍ଡର ଘଟଣାର ଉପଯୁକ୍ତ ତଦନ୍ତ ହେବା ସହ ସେମାନଙ୍କ ପରିବାରକୁ ନ୍ୟାୟ ନ ମିଳିବା ପର୍ଯ୍ୟନ୍ତ ଭାଜପା ଲଢେଇ ଜାରି ରଖିବ ବୋଲି ସଭାରେ ମତପ୍ରକାଶ ପାଇଥିଲା। ଏହି ଡବଲ ମର୍ଡର ଘଟଣାରେ ଆଇନମନ୍ତ୍ରୀ ପ୍ରତାପ ଜେନାଙ୍କ ସମେତ ୧୩ ଜଣଙ୍କ ନାମରେ ମାମଲା ରୁଜୁ ହୋଇଛି। ତେଣୁ ନୈତିକତା ଦୃଷ୍ଟିରୁ ମନ୍ତ୍ରୀପଦରୁ ତାଙ୍କୁ ବହିଷ୍କାର କରାଯିବା ସହିତ ଏତଲାରେ ଉଲ୍ଲେଖ ଥିବା ସମସ୍ତ ଅଭିଯୁକ୍ତଙ୍କୁ ଗିରଫ କରାଯାଉ ବୋଲି ବକ୍ତାମାନେ ଦାବି କରିଥିଲେ। ଏହି ହତ୍ୟା ପଛରେ ଶାସକ ଦଳର ଲୋକଙ୍କ ସହିତ ସ୍ଥାନୀୟ ଅତିରିକ୍ତ ଏସ୍ପିଙ୍କ ସମ୍ପୃକ୍ତି ରହିଛି। ପୋଲିସ ସରକାରଙ୍କ ଗୁଣ୍ଡାଭଳି ଆଚରଣ କରୁଛି ବୋଲି ଭାଜପା ଅଭିଯୋଗ କରିଛି।
୨୦୧୭ରୁ ଏପର୍ଯ୍ୟନ୍ତ ରାଜ୍ୟରେ ୧୫ଟି ରାଜନୈତିକ ହତ୍ୟାକାଣ୍ଡ ଘଟିଛି। ୧୫ ଜଣ ଭାଜପା ନେତା ଓ କର୍ମୀଙ୍କୁ ହତ୍ୟା କରାଯାଇଛି। ହେଲେ ପୋଲିସ ଅଧିକାଂଶ ମାମଲାରେ ଚାର୍ଜଶିଟ୍ ଦାଖଲ କରିନାହିଁ। ଏ ନେଇ ଭୁବନେଶ୍ୱର ଏମ୍ପି ଅପରାଜିତା ଷଡଙ୍ଗୀ ପୂର୍ବରୁ ଡିଜିପି ଅଭୟଙ୍କୁ ଏକ ଚିଠି ଲେଖିଥିଲେ। ଏବେ କୁଳମଣି ଓ ଦିବ୍ୟସିଂହଙ୍କୁ ହତ୍ୟା କରାଯାଇଛି। ସମସ୍ତ ଅଭିଯୁକ୍ତଙ୍କୁ ଗିରଫ କରାଯାଉ ବୋଲି ଏମ୍ପି ଷଡଙ୍ଗୀ ସଭାରେ ଦାବି କରିଥିଲେ। ନାରୀ ନିର୍ଯାତନା କ୍ଷେତ୍ରରେ ଓଡ଼ିଶା ଦ୍ୱିତୀୟ ଓ ଚାଇଲ୍ଡ ପନୋଗ୍ରାଫିରେ ପ୍ରଥମ ବୋଲି ଏମ୍ପି ଷଡଙ୍ଗୀ କହିଛନ୍ତି। ସମଗ୍ର ରାଜ୍ୟରେ ଏବେ ହାଜତମୃତ୍ୟୁ ଠାରୁ ଆରମ୍ଭ କରି ଶିଶୁ ନିଖୋଜ ଓ ଅପହରଣ, ବଳାତ୍କାର, ହତ୍ୟା, ନୟାଗଡ ନାବାଳିକାଙ୍କୁ ନ୍ୟାୟ ପ୍ରଦାନରେ ଚଞ୍ଚକତା, ଚୋରି, ଡକାୟତି, ରାହାଜାନି, ନିଶା ଓ ବେଆଇନ ବନ୍ଧୁକ କାରବାର ଏବଂ ବଟି ଆଦାୟ ଭଳି ଅସାମାଜିକ କାର୍ଯ୍ୟକଳାପ ବୃଦ୍ଧି ପାଇଛି। ଏ କ୍ଷେତ୍ରରେ ପୋଲିସ ସ୍ଥାଣୁ ପାଲଟି ଯାଇଛି ବୋଲି ଭାଜପା ନେତୃବୃନ୍ଦମାନେ କହିଥିଲେ।
ଆନ୍ଦୋଳନକାରୀମାନେ ଡିଜିପି ଅଫିସ ଘେରାଉ କରିବା ପରେ ୨୦ରୁ ଊର୍ଦ୍ଧ୍ୱ ନେତୃବୃନ୍ଦ ଡିଜିପିଙ୍କୁ ସାକ୍ଷାତ କରିଥିଲେ। ଡିଜିପିଙ୍କୁ ସ୍ମାରକପତ୍ର ଦେବା ସହ ପ୍ରାୟ ୩ ଘଣ୍ଟା କାଳ ଆଲୋଚନା କରିଥିଲେ। ଏହି ଘେରାଉରେ ଭାଜପା ରାଜ୍ୟ ସଭାପତି ସମୀର ମହାନ୍ତି, ବିଜୟପାଲ ସିଂହ ତୋମାର, ରାଜ୍ୟ ସାଧାରଣ ସମ୍ପାଦକ ପୃଥୀରାଜ ହରିଚନ୍ଦନ, ରାଜ୍ୟ ଯୁବମୋର୍ଚ୍ଚା ସଭାପତି ଇରାଶିଷ ଆଚାର୍ଯ୍ୟ, ଭାଜପା ରାଜ୍ୟ ଉପସଭାପତି ପ୍ରଭାତୀ ପରିଡ଼ା, ପୂର୍ବତନ ମନ୍ତ୍ରୀ ମନମୋହନ ସାମଲ, ପୂର୍ବତନ ମନ୍ତ୍ରୀ କନକବର୍ଦ୍ଧନ ସିଂଦେଓ, ରାଜ୍ୟ ଉପସଭାପତି ଭୃଗୁ ବକ୍ସି ପାତ୍ର, ରାଜ୍ୟ ସମ୍ପାଦକ ଟଙ୍କଧର ତ୍ରିପାଠୀ, ଅମର ନାୟକ,ଗୌତମ ରାୟ, ରାଜ୍ୟ ଯୁବମୋର୍ଚ୍ଚା ସଂଯୋଜକ ଦେବାଶିଷ ରାୟ, ରାଜ୍ୟ ଅନୁସୂଚିତ ଜାତି ସଭାପତି ବିଭୁ ପ୍ରସାଦ ତରାଇ, ପୂର୍ବତନ ମନ୍ତ୍ରୀ ସୁରମା ପାଢୀ, ବିଧାୟକ ଜୟନ୍ତ ଷଡଙ୍ଗୀ, ପ୍ରକାଶ ସୋରେନ୍, ରାଜ୍ୟ ମୁଖପାତ୍ର ଠାକୁର ରଞ୍ଜିତ ଦାସ, ସୁଦୀପ୍ତ ରାୟ, ଅନୁ ଚୌଧୁରୀ, ରାଜ୍ୟ ସମ୍ପାଦିକା ପିଙ୍କି ପ୍ରଧାନ, ନୟନ କିଶୋର ମହାନ୍ତି, ସଂଖ୍ୟାଲଘୁ ସେଲ୍ର ମୁଖ୍ୟ ସିକନ୍ଦର ଅଲ୍ଲି, ଲଲାଟେନ୍ଦୁ ଦାସ, ବାବୁ ସିଂହ ପ୍ରମୁଖ ଯୋଗଦେଇଥିଲେ।
