ଅନୁଗୋଳ ଅଫିସ, ୩୧ା୮ ଆଖି ଝଲସାଇ ଦେବ ଅନୁଗୋଳ ସହର। କୌଣସି ମେଟ୍ରୋ ସିଟିଠାରୁ ସୌନ୍ଦର୍ଯ୍ୟରେ ଏହା କମ୍ ଦିଶିବନି। ପରିମଳଠାରୁ ଆଲୋକୀକରଣ, ଅତ୍ୟାଧୁନିକ ପାର୍କ ନିର୍ମାଣ, ଶୌଚାଳୟ, ହେଲ୍ଥ କରିଡର, ଫୁଡ୍ କୋର୍ଟ, ସେଲ୍ଫି ପଏଣ୍ଟର ନିର୍ମାଣ ଶେଷ ହେଲେ ଏହା ସୁନ୍ଦରତାରେ ସହରମାନଙ୍କ ମଧ୍ୟରେ ଶ୍ରେଷ୍ଠ ସ୍ଥାନ ହାସଲ କରିବ। ଅନୁଗୋଳର ଏପରି ଢାଞ୍ଚା ବଦଳାଇବା ପାଇଁ ପୌରପାଳିକା ଓ ପ୍ରଶାସନ ପକ୍ଷରୁ ଜୋରଦାର ଉଦ୍ୟମ କରାଯାଉଛି। କିଛି କାର୍ଯ୍ୟ ଆଗେଇ ଯାଇଥିବା ବେଳେ ଆଉ କେତୋଟିର ନିର୍ମାଣ ବାକି ରହିଛି।
ଅନୁଗୋଳବାସୀଙ୍କ ଆମୋଦ ପ୍ରମୋଦ ପାଇଁ ତାମ୍ରିତ କଲୋନୀଠାରେ ସ୍ମାର୍ଟ ପାର୍କ ନିର୍ମାଣ କରାଯିବ। ମେଟ୍ରୋ ସିଟି ପରି ଏହି ପାର୍କରେ ସମସ୍ତ ଅତ୍ୟାଧୁନିକ ସୁବିଧା ଉପଲବ୍ଧ ରହିବ। ହେଲଥ୍ କରିଡର ବ୍ୟବସ୍ଥା ଲୋକଙ୍କ ଶରୀରରେ ନୂଆ ଶକ୍ତିର ସଞ୍ଚାର କରିବ। ଅଦରକାରୀ ସାମଗ୍ରୀରେ ରାସ୍ତା ପାର୍ଶ୍ୱରେ ନିର୍ମାଣ ହେବାକୁ ଥିବା କଳାକୃତି ସଭିଙ୍କ ମନ ମୋହିବ। ବିଜୁ ମଇଦାନ ନିକଟରେ ଫୁଡ୍ କୋର୍ଟ ସହ ‘ଆଇ ଲଭ ୟୁ ଅନୁଗୋଳ’ ସେଲ୍ଫି ପଏଣ୍ଟ କରାଯିବ। ସମସ୍ତ ଛୋଟ ବଡ଼ ପାର୍କର ସୌନ୍ଦର୍ଯ୍ୟକରଣ ହେବ। ସାଜସଜ୍ଜା ସହ ଆଲୋକୀକରଣ ରାସ୍ତାକୁ ନୂଆ ରୂପ ଦେବ। ପରିମଳକୁ ସୁବ୍ୟବସ୍ଥିତ କରାଯିବା ସହ ପୁଷ୍କରିଣୀଗୁଡ଼ିକର ପୁନରୁଦ୍ଧାର କରାଯିବ। କମାଣ୍ଡ କଣ୍ଟ୍ରୋଲ ରୁମ୍ରୁ ସହରର ସଲିଡ୍ ୱେଷ୍ଟ ମ୍ୟାନେଜମେଣ୍ଟ, ଇଲିସ୍ କାର୍ଯ୍ୟକ୍ରମ ଓ ସିସିଟିଭି ପରିଚାଳନା କରାଯିବ। କେଉଁ ଅଞ୍ଚଳରୁ ଅଳିଆ ଉଠିଲା ଓ କେଉଁଠି ସମସ୍ୟା ରହିଲା, ତାହା ତୁରନ୍ତ ଜଣାପଡ଼ିବ। ସହରୀ ଲୋକମାନେ ଏଣିକି ଅନ୍ଲାଇନ୍ରେ ଟ୍ୟାକ୍ସ ପ୍ରଦାନ ଓ ଅଭିଯୋଗ ଦାଖଲ କରିପାରିବେ। ପିଲାଙ୍କ ଖେଳକୁଦ ପାଇଁ ଏକ ମିନି ଷ୍ଟାଡିୟମ ନିର୍ମାଣ କାର୍ଯ୍ୟ ଆରମ୍ଭ ହୋଇଛି। ବସ୍ଷ୍ଟାଣ୍ଡ ନିକଟରେ ଅତ୍ୟାଧୁନିକ ଶୌଚାଳୟ ହେବ। କରଡ଼ାଗାଡ଼ିଆରେ ଭଲ ବ୍ୟବସ୍ଥା ଥିବା ଶଶ୍ମାନ ତିଆରି କରାଯିବ। ସେହିପରି ଅତ୍ୟାବଶ୍ୟକ ସାମଗ୍ରୀ ଦୋକାନ ଓ ଏଟିଏମ୍ ଗୋଟିଏ ସ୍ଥାନରେ ରଖାଯିବ। ଏହାକୁ ମହିଳା ସ୍ବୟଂ ସହାୟକ ଗୋଷ୍ଠୀ ପରିଚାଳନା କରିବ। ଏହାବ୍ୟତୀତ ପୌରପାଳିକାର ସୌନ୍ଦର୍ଯ୍ୟକରଣ ଓ ସମସ୍ୟାର ସମାଧାନ ନିମନ୍ତେ ଅଧିକ କି ପଦକ୍ଷେପ ନିଆଯିବ, ସେ ନେଇ ୱାର୍ଡର ମୁଖ୍ୟ ଲୋକମାନଙ୍କ ନିକଟରୁ ପ୍ରସ୍ତାବ ଆହ୍ବାନ କରାଯିବ ବୋଲି ପୌର କର୍ତ୍ତୃପକ୍ଷ ସୂଚନା ଦେଇଛନ୍ତି।
ଲୋକେ ଅଧିକ ଅଂଶଗ୍ରହଣ କରନ୍ତୁ
ଜିଲାରେ ଥିବା ଦୁଇଟି ପୌରପାଳିକା ଓ ଗୋଟିଏ ବିଜ୍ଞାପିତ ଅଞ୍ଚଳ ପରିଷଦରେ ଉନ୍ନୟନ କାର୍ଯ୍ୟ ଚାଲିଛି। ଏବେ ସହରାଞ୍ଚଳର ପ୍ରତ୍ୟକ ୱାର୍ଡରେ ମୋ ୱାର୍ଡ କାର୍ଯ୍ୟକ୍ରମ ଆରମ୍ଭ ହୋଇଛି। ଏଥିରେ ଲୋକେ ଅଧିକରୁ ଅଧିକ ଅଂଶଗ୍ରହଣ କଲେ ସହରର ଉନ୍ନତି ହେବ। କୌଣସି ୱାର୍ଡରେ ସମସ୍ୟା ରହିବ ନାହିଁ।
-ସିଦ୍ଧାର୍ଥ ଶଙ୍କର ସ୍ବାଇଁ, ଜିଲାପାଳ ତଥା ପୌର ପ୍ରଶାସକ, ଅନୁଗୋଳ
ସହରବାସୀ ଗର୍ବ ଅନୁଭବ କରିବେ
ଅନୁଗୋଳ ପୌରାଞ୍ଚଳକୁ ନୂଆ ରୂପ ଦିଆଯିବ। ସୌନ୍ଦର୍ଯ୍ୟକରଣ ଏପରି ହେବ ଯେ, ଲୋକେ ଯେମିତି ଗର୍ବ ଅନୁଭବ କରିବେ। ଏଥିପାଇଁ ଅନେକ କାର୍ଯ୍ୟ ଜାରି ରହିଛି। କୋଭିଡ୍ ପାଇଁ ବିଳମ୍ବ ହୋଇଥିବା କାର୍ଯ୍ୟ ଏବେ ଆଗଉଛି। ସହରବାସୀଙ୍କ ସହଯୋଗ ରହିଲେ ଅନୁଗୋଳ ମେଟ୍ରୋ ସିଟି ଭଳି ପରିଚୟ ସୃଷ୍ଟି କରିପାରିବ।
-ଗିରିଜା ଶଙ୍କର ମଲ୍ଲିକ, ନିର୍ବାହୀ ଅଧିକାରୀ, ଅନୁଗୋଳ ପୌରପାଳିକା
ପୁରୁଣାର ରକ୍ଷଣାବେକ୍ଷଣ କରାଯାଉ
ପୂର୍ବରୁ ସହରରେ ଅନେକ ଉନ୍ନୟନ କାର୍ଯ୍ୟ କରାଯାଇଛି। କିନ୍ତୁ ଉପଯୁକ୍ତ ରକ୍ଷଣାବେକ୍ଷଣ ହେଉନାହିଁ। ଇକୋ ପାର୍କ ଜରାଜୀର୍ଣ୍ଣ ହୋଇପଡ଼ିଲାଣି। ବିଭିନ୍ନ ପାନୀୟ ଜଳ ପ୍ରକଳ୍ପ ଅଚଳ ହୋଇପଡ଼ିଛି। ସହରକୁ ଅଧିକ ସୁନ୍ଦର କରାଯିବା ଯେତିକି ଗୁରୁତ୍ୱପୂର୍ଣ୍ଣ, ଅନ୍ୟ ନିର୍ମାଣର ଯତ୍ନ ନିଆଯିବା ସେତିକି ଦାୟିତ୍ୱର କଥା।
-ଅକ୍ଷୟ କୁମାର ସାମନ୍ତ, ପୂର୍ବତନ ନଗରପାଳ
ରାସ୍ତା ଅବସ୍ଥାରେ ପରିବର୍ତ୍ତନ ହେଉ
ପୌର ପ୍ରଶାସନ ପକ୍ଷରୁ ସହରର ସୌନ୍ଦର୍ଯ୍ୟକରଣ କରାଯିବା ସ୍ବାଗତଯୋଗ୍ୟ ପଦକ୍ଷେପ। କିନ୍ତୁ ଅନେକ ସ୍ଥାନରେ ରାସ୍ତା ଅବସ୍ଥା ଭଲ ନାହିଁ। ଏପରି କି ସ୍ଥାନେ ସ୍ଥାନେ ଆବର୍ଜନା ଠୁଳ କରାଯାଇଥିବା ଦେଖାଯାଉଛି। ସେହିପରି ସହରରେ ବୁଲା ଗୋରୁଙ୍କ ସଂଖ୍ୟା ବୃଦ୍ଧି ପାଉଥିବାରୁ ଦୁର୍ଘଟଣା ବଢ଼ୁଛି। ଏଥିପ୍ରତି ଦୃଷ୍ଟି ଦିଆଯାଉ।
-ଅଭୟ ରାୟ,
ବୁଦ୍ଧିଜୀବୀ
