ଅନୁଗୋଳ ଅଫିସ, ୪।୧୨: କଟକ-ସମ୍ବଲପୁର ୫୫ନଂ. ଜାତୀୟ ରାଜପଥର ସମ୍ପ୍ରସାରଣ ଶେଷ ହେଉନାହିଁ। ଏପରି କି କାର୍ଯ୍ୟ ତ୍ୱରାନ୍ବିତ ହେଉ ନ ଥିବାରୁ ରାସ୍ତା ଶୋଚନୀୟ ହୋଇପଡ଼ିଛି। ଫଳରେ ଏହି ରାଜପଥ ଦେଇ ଦୈନିକ ଅନୁଗୋଳରୁ କଟକ ଓ ଭୁବନେଶ୍ୱର ଯାଉଥିବା ବସ୍ଗୁଡ଼ିକରେ ବାରମ୍ବାର ଯାନ୍ତ୍ରିକ ତ୍ରୁଟି ଦେଖାଦେଉଛି। ଏପରି ଅବସ୍ଥାରେ କୋଭିଡ୍ କଟକଣା ଅନୁଯାୟୀ ଯାତ୍ରୀ ପରିବହନ କରିବା ବସ୍ ମାଲିକଙ୍କ ପକ୍ଷେ ସମ୍ଭବ ନୁହେଁ। ବାରମ୍ବାର ସରକାରଙ୍କ ସହ ବୈଠକ, ସମ୍ପ୍ରସାରଣ କାର୍ଯ୍ୟ କରୁଥିବା ଠିକା ସଂସ୍ଥା ସହ ଆଲୋଚନା ହୋଇଥିଲେ ମଧ୍ୟ ସୁଫଳ ମିଳୁନାହିଁ। ତେଣୁ ଆସନ୍ତା ୨୩ରେ ଅନୁଗୋଳରୁ କଟକ ଓ ଭୁବନେଶ୍ୱରକୁ ବସ୍ ଚଳାଚଳ ବନ୍ଦ ରଖାଯିବ। ୨୪ରୁ ବସ୍ ଚାଲୁ କରାଗଲେ ମଧ୍ୟ କଳା ବ୍ୟାଜ ଲଗାଯିବ। ଦାବିପୂରଣ ନ ହେଲେ ୨୦୨୨ ଜାନୁୟାରୀ ୧ରୁ ଅନୁଗୋଳରୁ କଟକ ଓ ଭୁବନେଶ୍ୱରକୁ କୌଣସି ବସ୍ ଗଡ଼ିବ ନାହିଁ ବୋଲି ଅଲ୍ ଓଡ଼ିଶା ବସ୍ ମାଲିକ ସଂଘ ସଭାପତି ଲୋକନାଥ ପାଣି କହିଛନ୍ତି।
