ଓ୍ବାଶିଂଟନ,୨୯ା୬: ସୂର୍ଯ୍ୟଙ୍କ ଉପରେ ୧୦ ବର୍ଷ ଧରି କ୍ରମାଗତ ନଜର ରଖିଥିଲା ଆମେରିକୀୟ ମହାକାଶ ସଂସ୍ଥା ‘ନାସା’ର ସୋଲାର ଡାଇନାମିକ୍ସ ଅବଜରଭେଟୋରି (ଏସ୍ଡିଓ)। ସେହି ୧୦ବର୍ଷିଆ ଟାଇମ୍-ଲାପ୍ସ୍ ଭିଡିଓକୁ ନେଇ ନାସା ପ୍ରସ୍ତୁତ କରିଛି ୬୧ ମିନିଟ୍ର ଭିଡିଓ। ନାସା ଉକ୍ତ ଭିଡିଓକୁ ସୋସିଆଲ ମିଡିଆରେ ଶେୟାର କରିବା ପରେ ତାହା ଭାଇରାଲ ହୋଇଛି। ୧୦ ବର୍ଷ ମଧ୍ୟରେ ଏସ୍ଡିଓ ସୂର୍ଯ୍ୟଙ୍କ ୪୨କୋଟି ୫୦ ଲକ୍ଷ ହାଇ-ରିଜୋଲ୍ୟୁଶନ ଚିତ୍ର ସଂଗ୍ରହ କରିଥିବା ନାସା ପକ୍ଷରୁ କୁହାଯାଇଛି।
ସୂର୍ଯ୍ୟଙ୍କ ୧୧ ବର୍ଷିଆ ସୌରଚକ୍ର ସମୟର ଗତିବିଧିରେ ବୃଦ୍ଧି ଏବଂ ହ୍ରାସ ହେଉଥିବା ଟାଇମ୍-ଲାପ୍ସ ଭିଡିଓ ଫୁଟେଜ୍ରୁ ଦେଖିବାକୁ ମିଳିଛିି ବୋଲି ନାସା ପକ୍ଷରୁ କୁହାଯାଇଛି। ଏଥିତ୍ରୁ ଆମ ନିକଟତମ ନକ୍ଷତ୍ର ସମ୍ପର୍କରେ କାର୍ଯ୍ୟ କରୁଥିବା ବୈଜ୍ଞାନିକମାନଙ୍କୁ ଅଧିକ ଜାଣିବାକୁ ମିଳିବ। ଏହାସହିତ ସୌର ପ୍ରଣାଳୀ ଉପରେ ଏହାର କିପରି ପ୍ରଭାବ ପଡ଼ୁଛି ତାହା ଜାଣିବାରେ ସହାୟକ ହେବ ବୋଲି କୁହାଯାଇଛି। ନାସା ଅନୁଯାୟୀ, ସୂର୍ଯ୍ୟଙ୍କ ଚୁମ୍ବକୀୟ କ୍ଷେତ୍ର ଏକ ଚକ୍ର ଦେଇ ଗତି କରେ, ଯାହାକୁ ସୌର ଚକ୍ର କୁହାଯାଏ। ପ୍ରତି ୧୧ ବର୍ଷରେ ସୂର୍ଯ୍ୟଙ୍କ ଚୁମ୍ବକୀୟ କ୍ଷେତ୍ର ସମ୍ପୂର୍ଣ୍ଣ ବଦଳିଯାଏ ଏବଂ ଏହାର ଉତ୍ତର ଓ ଦକ୍ଷିଣ ପୋଲଗୁଡ଼ିକ ସ୍ଥାନ ପରିବର୍ତ୍ତନ କରେ।
ନାସା ୬୧ ମିନିଟର ଭିଡିଓ ମାଧ୍ୟମରେ ୧୦ ବର୍ଷର ସୂର୍ଯ୍ୟଙ୍କୁ ଦେଖାଇଛି। ଏହି ସମୟ ମଧ୍ୟରେ ପ୍ରତି ଘଣ୍ଟାର ଗୋଟିଏ ଚିତ୍ରକୁ ବ୍ୟବହାର କରାଯାଇଛି। ଭିଡିଓଟି ଗୋଟିଏ ସେକେଣ୍ଡରେ ଗୋଟିଏ ଦିନ ଦେଖାଉଛି। ଭିଡିଓର ଶୀର୍ଷକ ରହିଛି ‘ଏ ଡିକେଡ୍ ଅଫ୍ ସନ୍’ ଅର୍ଥାତ୍ ‘ଏକ ଦଶନ୍ଧିର ସୂର୍ଯ୍ୟ’। ଏହା ବୁଧବାର ରିଲିଜ୍ ହେବା ପରଠାରୁ ୟୁଟ୍ୟୁବ୍ରେ ୮.୪ ଲକ୍ଷରୁ ଊର୍ଦ୍ଧ୍ୱ ଥର ଦେଖାସରିଲାଣି। ନାସା କହିଛି ଯେ, ବାହ୍ୟ ବାତାବରଣକୁ କାବୁ କରିବା ପାଇଁ ୧୭.୧ ନାନୋମିଟର ବିଶିଷ୍ଟ ଅତ୍ୟଧିକ ଅତିବାଇଗଣୀ ତରଙ୍ଗଦୈର୍ଘ୍ୟରେ ଟାଇମ-ଲାପ୍ସ ଚିତ୍ରଗୁଡ଼ିକ ଉତ୍ତୋଳନ କରାଯାଇଛି। ଏଥିସହ ନାସା ସ୍ପଷ୍ଟ କରିଛି ଯେ, ପୃଥିବୀ କିମ୍ବା ଚନ୍ଦ୍ର ଦେଇ ଯାଉଥିବା ଏସ୍ଡିଓ ଯୋଗୁ ଭିଡିଓରେ କଳା ଫ୍ରେମ ଦେଖାଯାଉଛି। ୨୦୧୬ରେ ଏକ ଉପକରଣ ବିଫଳତାର ପରିଣାମସ୍ବରୂପ ଲମ୍ବା ବ୍ଲାକଆଉଟ୍ ହୋଇଗଲା।
ସୂଚନାଥାଉ କି, ସୂର୍ଯ୍ୟଙ୍କୁ ପାର କରିବା ସମୟରେ ବୁଧଙ୍କ ଏକ ଟାଇମ୍-ଲାପ୍ସ ନାସା ପକ୍ଷରୁ ୨୦୧୬ରେ ଜାରି କରାଯାଇଥିଲା।
