ପୁରୁଷୋତ୍ତମପୁର,୬ା୫(ସିମାଞ୍ଚଳ ମିଶ୍ର): ପୁରୁଷୋତ୍ତମପୁରର ପ୍ରସିଦ୍ଧ ଐତିହାସିକ ମା କନଳା ଠାକୁରାଣୀଙ୍କ ସମେତ କାଳୁଆ, ତାରାତାରିଣୀ, କାଳୀ ଓ ଫୁଲସୁନ୍ଦରୀ ଆଦି ପଞ୍ଚ ଠାକୁରାଣୀଙ୍କ ଦ୍ୱିବାର୍ଷିକ ଯାତ୍ରା ବୁଧବାରଠାରୁ ଆରମ୍ଭ ହେବ। ଏଥିଲାଗି ସମଗ୍ର ସହର ଚଳଚଞ୍ଚଳ ହୋଇଉଠିଛି । ଜୁନ ୮ ତାରିଖ ପର୍ଯ୍ୟନ୍ତ ଏକ ମାସ ଧରି ହେବାକୁ ଥିବା ଏହି ଯାତ୍ରା ଲାଗି ସମସ୍ତ ପ୍ରସ୍ତୁତି ଶେଷ ହୋଇଛି। ଯାତ୍ରା ଅଧିକାରୀ ରମାକାନ୍ତ ଦାଶଙ୍କ ତତ୍ତ୍ୱାବଧାନରେ ସମସ୍ତ ପ୍ରସ୍ତୁତି ଚୂଡାନ୍ତ କରାଯାଇଛି। ମା’ଙ୍କ ଅବସ୍ଥାନ ନିମନ୍ତେ ବଡବଜାରସ୍ଥିତ ଗାନ୍ଧୀ ଛକଠାରେ ଅସ୍ଥାୟୀ ମନ୍ଦିର ନିର୍ମାଣ ଶେଷ ହୋଇଛି। ମଙ୍ଗଳବାର ଏଠାରେ ମହିଳା ମାନେ ଲିପାପୋଛା କରି ଝୋଟି ପକାଇଛନ୍ତି। ବୁଧବାର ସନ୍ଧ୍ୟା ୭ଟାରେ ବଡବଜାରସ୍ଥିତ ଅସ୍ଥାୟୀ ମନ୍ଦିର ଠାରୁ ବିରାଟ ଶୋଭାଯାତ୍ରା ବାହାରି ଠାକୁରାଣୀମାନଙ୍କ ମଖ୍ୟମନ୍ଦିରଗୁଡିକୁ ଯାଇ ମା’ଙ୍କୁ ଆମନ୍ତ୍ରଣ କରାଯିବ। ରାତି ୧ଟା ୩୦ ରେ ଅସ୍ଥାୟୀ ମନ୍ଦିରରେ ଠାକୁରାଣୀମାନଙ୍କୁ ପ୍ରବେଶ କରାଇବାକୁ ସମୟ ଧାର୍ଯ୍ୟ ହୋଇଛି । ପରମ୍ପରା ଅନୁଯାୟୀ ୫ ଜଣ ଗୋପାଳ ସମ୍ପ୍ରଦାୟର ପୁରୁଷ ଫୁଲଚାଙ୍ଗୁଡି ନେଇ ପ୍ରଥମେ କନକା ଠାକୁରାଣୀ ମନ୍ଦିରକୁ ଯାଇ ପୂଜାର୍ଚ୍ଚନା କରି ଆମନ୍ତ୍ରଣ କରି ଆଜ୍ଞାମାଳ ଆଣିବା ପରେ କାଳୁଆ, ତାରା ତାରିଣୀ, କାଳୀଙ୍କ ମୁଖ୍ୟ ମନ୍ଦିରଗୁଡିକୁ ଯାଇ ଆଜ୍ଞାମାଳ ଆଣିବେ। ଅସ୍ଥାୟୀ ମନ୍ଦିରରେ ପ୍ରସ୍ତୁତ ହୋଇ ରହିଥିବା ମାଠିଆରେ ଆଜ୍ଞାମାଳ ଫୁଲର ଘଟକୁ ସ୍ଥାପନ କରାଇବେ। ଅସ୍ଥାୟୀ ମନ୍ଦିରରେ ମା’ଙ୍କ ଘଟ ଥିବା ପର୍ଯ୍ୟନ୍ତ ଯାତ୍ରା ଚାଲିବ। କିପରି ଶାନ୍ତିଶୃଙ୍ଖଳାରେ ଯାତ୍ରା ସମାପନ ହେବ ସେଥିନେଇ ଏସଡିପିଓ ଡ.ଦୀପକ କୁମାର ମିଶ୍ର ଓ ଆଇଆଇସି ରାଜେଶ କୁମାର ନାୟକଙ୍କ ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି।
