ନୂଆଦିଲ୍ଲୀ,୬।୧୦: IPL ୨୦୨୭ ପୂର୍ବରୁ ଦିଲ୍ଲୀ କ୍ୟାପିଟାଲ୍ସରେ ବଡ଼ ପରିବର୍ତ୍ତନ ହୋଇଛି । ପୂର୍ବତନ ଭାରତୀୟ କ୍ରିକେଟର୍ ତଥା ପୂର୍ବତନ BCCI ସଭାପତି ସୌରଭ ଗାଙ୍ଗୁଲିଙ୍କୁ ଦିଲ୍ଲୀ କ୍ୟାପିଟାଲ୍ସର ନୂଆ ହେଡ୍ କୋଚ୍ ଭାବେ ନିଯୁକ୍ତ କରାଯାଇଛି । IPL ୨୦୨୭ରେ ପ୍ରଥମ ଥର ପାଇଁ ଗାଙ୍ଗୁଲି ଦିଲ୍ଲୀ ଟିମ୍ର ହେଡ୍ କୋଚ୍ ଭୂମିକାରେ ନଜର ଆସିବେ।
ଗାଙ୍ଗୁଲି ପୂର୍ବରୁ ମଧ୍ୟ ଦିଲ୍ଲୀ କ୍ୟାପିଟାଲ୍ସ ଫ୍ରାଞ୍ଚାଇଜ୍ ସହ ଜଡ଼ିତ ରହିଛନ୍ତି । ସେ ପୁରୁଷ ଓ ମହିଳା ଦଳର ଡାଇରେକ୍ଟର୍ ଭୂମିକା ମଧ୍ୟ ତୁଲାଇଛନ୍ତି । ୨୦୧୯ରୁ ସେ ଦିଲ୍ଲୀ ଫ୍ରାଞ୍ଚାଇଜ୍ ସହ ଜଡ଼ିତ ଥିବା ଜଣାପଡ଼ିଛି। ଗାଙ୍ଗୁଲି ଦିଲ୍ଲୀ କ୍ୟାପିଟାଲ୍ସର ପୂର୍ବତନ ହେଡ୍ କୋଚ୍ ହେମଙ୍ଗ ବଦାନୀଙ୍କ ସ୍ଥାନ ନେବେ। ବଦାନୀ ଗତ ଦୁଇ ସିଜନ୍ ଧରି ଦଳର ହେଡ୍ କୋଚ୍ ଥିଲେ।
ତେବେ ଦିଲ୍ଲୀ ଫ୍ରାଞ୍ଚାଇଜ୍ କୋଚିଂ ଷ୍ଟାଫ୍ରେ ମଧ୍ୟ ବଡ଼ ପରିବର୍ତ୍ତନ କରିଛି । ବୋଲିଂ କୋଚ୍ ମୁନାଫ ପଟେଲ, ଆସିଷ୍ଟାଣ୍ଟ କୋଚ୍ ଇଆନ୍ ବେଲ୍ ଏବଂ ଟିମ୍ ଡାଇରେକ୍ଟର୍ ବେଣୁଗୋପାଳ ରାଓଙ୍କୁ ରିଟନ ନ କରିବାକୁ ଦିଲ୍ଲୀ ନିଷ୍ପତ୍ତି ନେଇଛି। ଗାଙ୍ଗୁଲି ନିଜ ପସନ୍ଦର ସପୋର୍ଟ ଷ୍ଟାଫ୍ ସହ ଦଳ ଗଢ଼ିବାକୁ ଚାହୁଁଥିବା କୁହାଯାଉଛି। ଦିଲ୍ଲୀ କ୍ୟାପିଟାଲ୍ସର ନୂଆ କୋଚିଂ ଷ୍ଟାଫ୍ରେ ପୂର୍ବତନ ଭାରତୀୟ ଷ୍ଟାର୍ କ୍ରିକେଟର୍ ଯୁବରାଜ ସିଂଙ୍କୁ ମଧ୍ୟ ସାମିଲ କରାଯାଇପାରେ ବୋଲି ଚର୍ଚ୍ଚା ହେଉଛି । ତେବେ ଏନେଇ ଏପର୍ଯ୍ୟନ୍ତ କୌଣସି ଅଧିକାରିକ ସ୍ପଷ୍ଟୀକରଣ ମିଳିନାହିଁ।
ଗାଙ୍ଗୁଲିଙ୍କ ପାଇଁ କୋଚିଂ ଭୂମିକା ନୂଆ ନୁହେଁ। ଗତ ବର୍ଷ SA20ରେ ସେ ପ୍ରିଟୋରିଆ କ୍ୟାପିଟାଲ୍ସର ହେଡ୍ କୋଚ୍ ଦାୟିତ୍ୱ ନେଇଥିଲେ ଏବଂ ତାଙ୍କ ଦଳ ଫାଇନାଲ୍ ପର୍ଯ୍ୟନ୍ତ ଯାଇଥିଲା। ଦିଲ୍ଲୀ କ୍ୟାପିଟାଲ୍ସର ହେଡ୍ କୋଚ୍ ଦାୟିତ୍ୱ ମିଳିବା ପରେ ସୌରଭ ଗାଙ୍ଗୁଲି ଖୁସି ପ୍ରକାଶ କରିଛନ୍ତି। IPLରେ ଦିଲ୍ଲୀ କ୍ୟାପିଟାଲ୍ସର ହେଡ୍ କୋଚ୍ ହେବାକୁ ନେଇ ସେ ଉତ୍ସାହିତ ବୋଲି କହିଛନ୍ତି। ଗାଙ୍ଗୁଲି କହିଛନ୍ତି ଯେ, ଦିଲ୍ଲୀ କ୍ୟାପିଟାଲ୍ସ ଫ୍ରାଞ୍ଚାଇଜ୍ ତାଙ୍କ ହୃଦୟର ଅତି ନିକଟତର। ଗତ କିଛି ବର୍ଷ ଧରି ଫ୍ରାଞ୍ଚାଇଜ୍ ସହ ତାଙ୍କ ସମ୍ପର୍କ ଆହୁରି ମଜବୁତ ହୋଇଛି। ଏବେ ଏକ ଶକ୍ତିଶାଳୀ ଓ ନିର୍ଭୀକ ଦଳ ଗଢ଼ିବା ତାଙ୍କର ଲକ୍ଷ୍ୟ ବୋଲି ସେ କହିଛନ୍ତି।
ଦିଲ୍ଲୀ କ୍ୟାପିଟାଲ୍ସ ଗତ ଦୁଇଟି IPL ସିଜନ୍ରେ ପ୍ଲେଅଫ୍ରେ ପହଞ୍ଚି ପାରିନଥିଲା। IPL 2025ରେ ଦଳ ପଞ୍ଚମ ସ୍ଥାନରେ ରହିଥିବା ବେଳେ 2026 ସିଜନ୍ରେ ଷଷ୍ଠ ସ୍ଥାନରେ ରହିଥିଲା। ଏବେ ଗାଙ୍ଗୁଲିଙ୍କ ଆଗମନ ପରେ ଦଳ ପୁଣିଥରେ ପ୍ଲେଅଫ୍କୁ ଫେରିବା ଲକ୍ଷ୍ୟରେ ନୂଆ ଯୋଜନା ସହ ଆଗକୁ ବଢ଼ିବ।
