କାବୁଲ, ୨୦।୬ : ଆଫଗାନିସ୍ତାନରେ ଗୁରୁଦ୍ୱାର ଆତଙ୍କବାଦୀ ଆକ୍ରମଣ ଘଟିଛି। ପାଜୋକ ନ୍ୟୁଜର ଏକ ରିପୋର୍ଟ ସୋସିଆଲ ମିଡିଆରେ ଉଲ୍ଲେଖ କରିଛି ଯେ, ଆକ୍ରମଣ ପରେ ଗୁରୁ ଗ୍ରନ୍ଥ ସାହେବ ସୁରକ୍ଷିତ ଭାବେ ଉଦ୍ଧାର କରାଯାଇ ଗୁରୁଦ୍ୱାରା କମିଟିର ଅଧ୍ୟକ୍ଷ ଗୁରୁନାମ ସିଂଙ୍କ ଘରକୁ ନିଆଯାଇଛି।
ଗୁରୁଦ୍ୱାରା ନିକଟରେ ରହୁଥିବା କୁଲଜିତ ସିଂ ଖାଲସା କହିଛନ୍ତି ଯେ ତାଙ୍କ ଘର ଗୁରୁଦ୍ୱାରା ସାମ୍ନାରେ ଅଛି। ଗୁଳିର ଶବ୍ଦ ଶୁଣିବା ମାତ୍ରେ ସେ ଝରକା ବାହାରକୁ ଚାହିଁଥିଲେ। ସେଠାରେ ଆତଙ୍କବାଦୀଙ୍କ ପକ୍ଷରୁ ଆକ୍ରମଣ ହେଉଥିଲା। ଆକ୍ରମଣକାରୀ ତାଲିବାନ ଚେକପୋଷ୍ଟ ନିକଟରେ ପାର୍କିଂ ହୋଇଥିବା କାର ଭିତରେ ଲୁଚି ରହିଥିଲେ। ଏହା ପରେ ଏକ କାର ବିସ୍ଫୋରଣରେ ସେଠାରେ ଥିବା ତାଲିବାନ ସୁରକ୍ଷାକର୍ମୀଙ୍କ ମୃତ୍ୟୁ ଘଟିଥିଲା। ବିସ୍ଫୋରଣ ଯୋଗୁ ନିକଟସ୍ଥ ଦୋକାନ ଏବଂ ଘର ନଷ୍ଟ ହୋଇଯାଇଥିଲା।
ଗୁରୁଦ୍ୱାରାରେ ସକାଳର ପ୍ରାର୍ଥନା ଆରମ୍ଭ ହେବାର ପ୍ରାୟ ଅଧ ଘଣ୍ଟା ପୂର୍ବରୁ ଏହି ଆକ୍ରମଣ ହୋଇଥିଲା। ଆକ୍ରମଣ ସମୟରେ ଗୁରୁଦ୍ୱାରାରେ ପ୍ରାୟ ୩୦ ଜଣ ଉପସ୍ଥିତ ଥିଲେ। ଯଦି ପ୍ରାର୍ଥନା ଆରମ୍ଭ ହେବା ପରେ ଏହି ଆକ୍ରମଣ ହୋଇଥାନ୍ତା, ତେବେ ଅଧିକ ଲୋକ ମୃତାହତ ହେବାର ଆଶଙ୍କା ଥିବା ସେ କହିଛନ୍ତି।
ଶିଖ ସମ୍ପ୍ରଦାୟର ନେତାମାନେ କହିଛନ୍ତି ଯେ ତାଲିବାନ ଶାସିତ ଆଫଗାନିସ୍ତାନରେ କେବଳ ୨୦ଟି ଶିଖ ପରିବାର ରହିଛନ୍ତି। ସେମାନଙ୍କର ସମସ୍ତ ସଦସ୍ୟଙ୍କୁ ଅନ୍ତର୍ଭୁକ୍ତ କରି ସମଗ୍ର ଦେଶରେ କେବଳ୧୪୦ରୁ ୧୫୦ ଜଣ ଶିଖ ରହିଛନ୍ତି। ସେମାନଙ୍କ ମଧ୍ୟରୁ ଅଧିକାଂଶ ପୂର୍ବ ସହର ଜାଲାଲାବାଦ ଏବଂ ରାଜଧାନୀ କାବୁଲରେ ବାସ କରୁଛନ୍ତି।
ଗତ ବର୍ଷ ଆଫଗାନିସ୍ତାନରେ ତାଲିବାନ କ୍ଷମତାକୁ ଆସିବା ପରେ ଦେଶର ଶିଖ ଏବଂ ଅନ୍ୟାନ୍ୟ ସଂଖ୍ୟାଲଘୁ ସମ୍ପ୍ରଦାୟଙ୍କ ଉପରେ ଆକ୍ରମଣ ବଢ଼ିବାରେ ଲାଗିଛି। ଏହି ଆକ୍ରମଣ ପରେ ଶିଖ ସମ୍ପ୍ରଦାୟ ଆତଙ୍କିତ ଅବସ୍ଥାରେ ଅଛନ୍ତି। ଏହି ଆକ୍ରମଣର ଶିକାର ହୋଇଥିବା ବ୍ୟକ୍ତିମାନେ କହିଛନ୍ତି ଯେ ସମସ୍ତେ ଶୀଘ୍ର ଆଫଗାନିସ୍ତାନ ଛାଡିବାକୁ ଚାହାଁନ୍ତି, କିନ୍ତୁ ଭାରତ ସରକାର ସେମାନଙ୍କୁ ଭିସା ଦେଉନାହାଁନ୍ତି। ଏହି କାରଣରୁ ସେମାନେ ଅସୁବିଧାରେ ପଡ଼ିଛନ୍ତି। ଭାରତ ସରକାରଙ୍କୁ ସେମାନେ ସହାୟତରା ପାଇଁ ଅନୁରୋଧ କରିଛନ୍ତି।
ସରକାରୀ ସୂତ୍ରରୁ ଜଣାପଡିଛି ଯେ ଭାରତୀୟ ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ ସଂଖ୍ୟାଲଘୁ ସମ୍ପ୍ରଦାୟର ଲୋକଙ୍କୁ ଇ-ଭିସା ପ୍ରଦାନ କରାଯାଇଛି।
