ଆବୁଧାବି,୧୬।୬: ଚଳିତ ପାକିସ୍ତାନ ସୁପର ଲିଗ୍ (ପିଏସ୍ଏଲ୍)ରେ ମଙ୍ଗଳବାର କୁଏଟା ଗ୍ଲାଡିଏଟର୍ସ ଓ ଲାହୋର କ୍ୱାଲାଣ୍ଡର୍ସ ମଧ୍ୟରେ ଖେଳାଯାଇଥିବା ମ୍ୟାଚ୍ରେ ମୁହାଁମୁହିଁ ହୋଇଥିଲେ ପାକିସ୍ତାନର ଦୁଇ ଖେଳାଳି। ପୂର୍ବତନ ଅଧିନାୟକ ସର୍ଫରାଜ ଅହମ୍ମଦ ଓ ସ୍ପିଡ୍ ଷ୍ଟାର ଶାହିନ ଶାହ ଆଫ୍ରିଦୀ ମଧ୍ୟରେ ଯୁକ୍ତିତର୍କ ହୋଇଥିଲା। ଏହାପରେ ପୂର୍ବତନ ଅଧିନାୟକ ସର୍ଫରାଜଙ୍କୁ ଗାଳି ଗୁଲଜ କରିଥିଲେ ଶାହିନ। ପରିସ୍ଥିତି ବିଗୁଡ଼ୁ ଥିବା ଦେଖି ସାଥି ଖେଳାଳି ଓ ଅମ୍ପାୟରଙ୍କୁ ମଧ୍ୟସ୍ଥି କରିବାକୁ ପଡ଼ିଥିଲା।
ପ୍ରଥମ ଇନିଂସର ୧୯ତମ ଓଭରରେ ଆଫ୍ରିଦୀ ଏକ ବାଉନ୍ସର ମାରିଥିଲେ, ଯାହାକି ସର୍ଫରାଜଙ୍କ ହେଲମେଟରେ ବାଜିଥିଲା। ବଲ ଥାର୍ଡମ୍ୟାନ ଅଞ୍ଚଳକୁ ଚାଲିଯିବାରୁ ସିଙ୍ଗଲ ନେଇଥିଲେ ଗ୍ଲାଡିଏଟର୍ସ ଅଧିନାୟକ। ରନ୍ ନେବା ବେଳେ ସର୍ଫରାଜ ପ୍ରଥମେ ବାମହାତୀ ପେସରଙ୍କୁ କିଛି କହିଥିଲେ। ଏହାର ଜବାବରେ ଆଫ୍ରିଦୀ ହାତ ଦେଖାଇ ଗାଳିଗୁଲଜ କରିଥିଲେ। ଲାହୋର ଅଧିନାୟକ ସୋହେଲ ଆଖତର, ମହମ୍ମଦ ହାଫିଜ ଓ ଅମ୍ପାୟରଙ୍କ ହସ୍ତକ୍ଷେପ ପରେ ପରିସ୍ଥିତି ନିୟନ୍ତ୍ରଣକୁ ଆସିଥିଲା। ତେବେ ପୂର୍ବତନ ଅଧିନାୟକଙ୍କ ପ୍ରତି ଏଭଳି ଆଚରଣ ପାଇଁ ଆଫ୍ରିଦୀଙ୍କୁ ସୋସିଆଲ ମିଡ଼ିଆରେ ପ୍ରବଳ ସମାଲୋଚନା କରାଯାଉଛି।
