ନୂଆଦିଲ୍ଲୀ,୪।୧୦: ଶନିବାର ନୂଆ ଚଣ୍ଡିଗଡ଼ରେ ଖେଳାଯାଇଥିବା ତୃତୀୟ ଦିନିକିଆ ମ୍ୟାଚରେ ଭାରତୀୟ କ୍ରିକେଟ ଦଳ ୱେଷ୍ଟଇଣ୍ଡିଜ ଠାରୁ ପରାଜିତ ହୋଇଛି। ଶାଇ ହୋପଙ୍କ ଚମତ୍କାର ଶତକ ବଳରେ ୱେଷ୍ଟଇଣ୍ଡିଜ ଏହି ମ୍ୟାଚକୁ ପାଞ୍ଚ ୱିକେଟରେ ଜିତି ଇତିହାସ ସୃଷ୍ଟି କରିଛି। ଜିତିବା ପାଇଁ ୱେଷ୍ଟଇଣ୍ଡିଜକୁ ୩୫୨ ରନର ଆବଶ୍ୟକତା ଥିଲା; ସେମାନେ ଏହି ଲକ୍ଷ୍ୟ ହାସଲ କରିବା ସହ ଦିନିକିଆ କ୍ରିକେଟରେ ସେମାନଙ୍କର ସର୍ବାଧିକ ସଫଳ ରନ-ଚେଜ (ଲକ୍ଷ୍ୟ ପୂରଣ)ର ରେକର୍ଡ ସ୍ଥାପନ କରିଛନ୍ତି। ଯଦିଓ ଅନେକ ଲୋକ ଭାରତର ଏହି ପରାଜୟ ପାଇଁ ହୋପଙ୍କ ପ୍ରଦର୍ଶନକୁ ଦାୟୀ କରିଥିଲେ, ତଥାପି ଏହି ଫଳାଫଳ ପାଇଁ ପ୍ରକୃତରେ ଏମ.ଏସ. ଧୋନି ହିଁ ଦାୟୀ ଥିଲେ।
ମ୍ୟାଚ ପରେ ଖୋଦ ହୋପ ଏକଥା ପ୍ରକାଶ କରି କହିଥିଲେ ଯେ ଧୋନିଙ୍କ ଠାରୁ ସେ ଯେଉଁ ଶିକ୍ଷା ପାଇଥିଲେ, ତାହା ତାଙ୍କୁ ଭାରତ ବିପକ୍ଷରେ ମ୍ୟାଚ-ଜିତାଇବା ଭଳି ଇନିଂସ ଖେଳିବାରେ ସାହାଯ୍ୟ କରିଥିଲା। ପ୍ରଥମେ ବ୍ୟାଟିଂ କରି ଭାରତ ୭ ୱିକେଟ ହରାଇ ୩୫୧ ରନ ସଂଗ୍ରହ କରିଥିଲା। ୱେଷ୍ଟଇଣ୍ଡିଜ ୪୮.୨ ଓଭରରେ ଏହି ଲକ୍ଷ୍ୟ ହାସଲ କରିନେଇଥିଲା।
ୱେଷ୍ଟଇଣ୍ଡିଜର ବିଜୟରେ ହୋପ ଏକ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ। ସେ ୧୪୩ଟି ବଲ ଖେଳି ୧୭ଟି ଚୌକା ଓ ୩ଟି ଛକା ସହାୟତାରେ ଅପରାଜିତ ୧୬୨ ରନ ସଂଗ୍ରହ କରିଥିଲେ। ଏହି ଇନିଂସ ପାଇଁ ୱେଷ୍ଟଇଣ୍ଡିଜ ଅଧିନାୟକଙ୍କୁ ‘ପ୍ଲେୟର୍ ଅଫ ଦି ମ୍ୟାଚ’ ଭାବେ ବିବେଚିତ କରାଯାଇଥିଲା। ମ୍ୟାଚ ପରେ ହୋପ ପ୍ରକାଶ କରିଥିଲେ ଯେ ଏକ ବିଶାଳ ଲକ୍ଷ୍ୟର ପିଛା କରୁଥିବା ସମୟରେ ସେ ଧୋନିଙ୍କର କିଛି ପରାମର୍ଶ ମନେ ପକାଇଥିଲେ। ହୋପ କହିଥିଲେ, ‘ମୁଁ ମହାନ ଏମ.ଏସ. ଧୋନିଙ୍କ ସହ କଥା ହୋଇଥିଲି। ସେ ମୋତେ କହିଥିଲେ ଯେ ତୁମେ ଯାହା ଭାବୁଛ, ତା’ଠାରୁ ତୁମ ପାଖରେ ସର୍ବଦା ଅଧିକ ସମୟ ଥାଏ। ତେଣୁ, ଆମେ ଲକ୍ଷ୍ୟ ହାସଲ ପ୍ରକ୍ରିୟାକୁ ଛୋଟ ଛୋଟ ଭାଗରେ ବିଭକ୍ତ କରି ଖେଳିବାକୁ ଚେଷ୍ଟା କଲୁ। ମୁଁ ଜାଣିଥିଲି ଯେ ପେନାଲ୍ଟି କାରଣରୁ ଭାରତକୁ ଫିଲ୍ଡରମାନଙ୍କୁ ସର୍କଲ ଭିତରକୁ ଆଣିବାକୁ ବାଧ୍ୟ ହେବାକୁ ପଡ଼ିବ, ତେଣୁ ମୁଁ ଧୈଯ୍ୟର ସହ ଖେଳିଲି।’
ମ୍ୟାଚ ପରେ, ୱେଷ୍ଟଇଣ୍ଡିଜ ଅଧିନାୟକ ହୋପ ସିରିଜରେ ତାଙ୍କ ଖେଳାଳିମାନଙ୍କ ପ୍ରଦର୍ଶନ ନେଇ ସନ୍ତୋଷ ବ୍ୟକ୍ତ କରିଥିଲେ। ସେ କହିଥିଲେ, ‘ମୁଁ ଭାବୁଛି ଆମେ ମଝିରେ ମଝିରେ ଭଲ କ୍ରିକେଟ ଖେଳିଲୁ। ବ୍ୟାଟରମାନେ ଚମତ୍କାର ପ୍ରଦର୍ଶନ କରିଥିଲେ। ଆମେ ନିରନ୍ତରତା ବଜାୟ ରଖିବାକୁ ଚାହୁଁଥିଲୁ ଏବଂ ଆମର ବ୍ୟାଟରମାନେ ସେହି ନିରନ୍ତରତା ପ୍ରଦର୍ଶନ କରିଥିଲେ। ବୋଲିଂ ଦୃଷ୍ଟିକୋଣରୁ, ଆଶା କରାଯାଉଛି ଯେ ଆମେ ଆଗକୁ ଆହୁରି ଭଲ ପ୍ରଦର୍ଶନ କରିବୁ।’
