ନୂଆଦିଲ୍ଲୀ/କାବୁଲ,୨୯।୯: ଆଫଗାନିସ୍ତାନରେ କ୍ଷମତା ଦଖଲ ପରେ ତାଲିବାନ୍ ପ୍ରଥମ ଥର ପାଇଁ ଭାରତ ସରକାରଙ୍କ ସହିତ ଆଲୋଚନା ପାଇଁ ପ୍ରୟାସ କରିଛି। ତାଲିବାନ୍ ଭାରତ ସରକାରଙ୍କ ସହିତ ଔପଚାରିକ ଭାବେ କଥାବାର୍ତ୍ତା ଆରମ୍ଭ ପାଇଁ ଚିଠି ଲେଖିଛି। ଦୁଇ ଦେଶ ମଧ୍ୟରେ ବିମାନ ସେବା ପୁଣି ଆରମ୍ଭ କରିବାକୁ ଚିଠିରେ ଅନୁରୋଧ କରାଯାଇଛି।
ଆଫଗାନିସ୍ତାନ ବେସାମରିକ ବିମାନ ଚଳାଚଳ କର୍ତ୍ତୃପକ୍ଷ ଏନେଇ ଅପିଲ୍ କରିଥିବା ଚିଠିରେ ଉଲ୍ଲେଖ କରାଯାଇଛି। ଭାରତୀୟ ବିମାନ ଚଳାଚଳ ମହାନିର୍ଦ୍ଦେଶକ ଅରୁଣ କୁମାରଙ୍କୁ ଏହି ଚିଠି ଆଫଗାନିସ୍ତାନର ତାଲିବାନ୍ ସରକାରଙ୍କ କାର୍ଯ୍ୟକାରୀ ବିମାନ ଚଳାଚଳ ମନ୍ତ୍ରୀ ଅଲହାଜ୍ ହମିଦୁଲ୍ଲା ଅଖୁନ୍ଦଜାଦା ଲେଖିଛନ୍ତି। କାବୁଲ ବିମାନ ବନ୍ଦର ପୁଣି କାର୍ଯ୍ୟକ୍ଷମ ହୋଇଥିବା ଚିଠିରେ ଦର୍ଶାଯାଇଛି।
