ମୁମ୍ବାଇ,୧୪।୯: ମୁମ୍ବାଇର ଗଣେଶୋତ୍ସବ କଥା ଉଠିଲେ ଲାଲବାଗଚା ରାଜାଙ୍କ ନାଁ ନିଶ୍ଚିତ ଭାବେ ଆସେ। ତେବେ ମାୟାନଗରୀରେ ଆଉ ଜଣେ ଗଣପତି ଅଛନ୍ତି, ଯାହାଙ୍କ ଦରବାରରେ ଭକ୍ତି ସହ ବୈଭବ ମଧ୍ୟ ଲୋକଙ୍କୁ ଆଶ୍ଚର୍ଯ୍ୟ କରୁଛି । କିଙ୍ଗ୍ସ ସର୍କଲ୍ସ୍ଥିତ GSB ସେବା ମଣ୍ଡଳର ଗଣପତିଙ୍କୁ ‘ମୁମ୍ବାଇର ସବୁଠୁ ଧନୀ ବପ୍ପା’ ବୋଲି କୁହାଯାଉଛି । ଏଥର ବପ୍ପାଙ୍କୁ ୬୬ କେଜି ଶୁଦ୍ଧ ସୁନା ଓ ୩୩୫ କେଜି ରୁପାର ଅଳଙ୍କାରରେ ସଜାଯାଇଛି । ଏହା ସହ ଗଣେଶୋତ୍ସବ ପାଇଁ ମଣ୍ଡଳ ପକ୍ଷରୁ ୭୦୩.୨୭ କୋଟି ଟଙ୍କାର ରେକର୍ଡ ବୀମା କଭର କରାଯାଇଛି।
GSB ସେବା ମଣ୍ଡଳ ଚଳିତ ବର୍ଷ ଏହାର ୭୨ତମ ଗଣେଶୋତ୍ସବ ପାଳନ କରୁଛି । ଏଠାରେ ବିରାଜମାନ ମହାଗଣପତିଙ୍କ ଭବ୍ୟ ରୂପ ପ୍ରଥମ ଦୃଷ୍ଟିରେ ହିଁ ଭକ୍ତଙ୍କ ଦୃଷ୍ଟି ଆକର୍ଷଣ କରୁଛି । ଗଣେଶଙ୍କ ପ୍ରତିମାକୁ ୬୬ କେଜି ସୁନା ଓ ୩୩୫ କେଜି ରୁପାର ଅଳଙ୍କାରରେ ସଜାଯାଇଛି। ଏହି ମୂଲ୍ୟବାନ ଅଳଙ୍କାରର ସୁରକ୍ଷା ପାଇଁ ୭୦୩.୨୭ କୋଟି ଟଙ୍କାର ବୀମା କରାଯାଇଛି । କେବଳ ଗଣପତିଙ୍କ ଅଳଙ୍କାର ନୁହେଁ, ଦର୍ଶନ ପାଇଁ ଆସୁଥିବା ଭକ୍ତ, ସ୍ୱେଚ୍ଛାସେବକ ଏବଂ ସମଗ୍ର ଆୟୋଜନକୁ ମଧ୍ୟ ଏହି ବୀମା କଭରରେ ସାମିଲ କରାଯାଇଛି।
ଏଠାରେ ଗଣେଶ ଠାକୁର ମାତ୍ର ୫ ଦିନ ପାଇଁ ବିରାଜମାନ ହୁଅନ୍ତି। ହେଲେ ତାଙ୍କ ସେବା ପାଇଁ ବିଦେଶର ବିଭିନ୍ନ ଦେଶରୁ NRI ସେବାଦାରମାନେ ମୁମ୍ବାଇ ପହଞ୍ଚୁଛନ୍ତି । ସମଗ୍ର ଆୟୋଜନ ସ୍ୱେଚ୍ଛାସେବକଙ୍କ ସହଯୋଗରେ ଚାଲିଥାଏ । ମଣ୍ଡଳ ଅନୁସାରେ, ଏଠାରେ ୧ ଲକ୍ଷରୁ ଅଧିକ ସ୍ୱତନ୍ତ୍ର ପୂଜା ଓ ଅନୁଷ୍ଠାନ ଆୟୋଜିତ ହୋଇଥାଏ । GSB ଗଣେଶୋତ୍ସବର ଅନ୍ୟତମ ବିଶେଷତା ହେଉଛି ‘ତୁଳାଦାନ’ ପରମ୍ପରା। ମନସ୍କାମନା ପୂରଣ ହେବା ପରେ ଅନେକ ଭକ୍ତ ନିଜ ଓଜନ ସମାନ ଦାନ କରିଥାନ୍ତି।
ଏହା ସହ ଉତ୍ସବ ସମୟରେ ୨ ଲକ୍ଷରୁ ଅଧିକ ଭକ୍ତଙ୍କୁ ଭୋଜନ-ପ୍ରସାଦ ବଣ୍ଟନ କରାଯାଏ। ତେଣୁ ଏହି ଗଣେଶୋତ୍ସବ କେବଳ ପୂଜାପାଠରେ ସୀମିତ ନରହି ସେବା ଓ ଦାନର ଏକ ବଡ଼ କେନ୍ଦ୍ରରେ ପରିଣତ ହୋଇଛି।
ଗଣେଶଙ୍କ ଉପରେ ଦେଖାଯାଉଥିବା ୬୬ କେଜି ସୁନା ଓ ୩୩୫ କେଜି ରୁପା କୌଣସି ଜଣେ ବ୍ୟବସାୟୀ କିମ୍ବା ଶିଳ୍ପପତିଙ୍କ ଦାନ ନୁହେଁ । ମଣ୍ଡଳର ଏହି ମୂଲ୍ୟବାନ ସଂଗ୍ରହ ଦଶନ୍ଧି ଦଶନ୍ଧି ଧରି ଭକ୍ତଙ୍କ ଦାନରୁ ଧୀରେ ଧୀରେ ଗଢ଼ିଉଠିଛି । ୧୯୫୦ ଦଶକରେ ଗଣେଶୋତ୍ସବ ଆରମ୍ଭ ହେବା ପରଠାରୁ ମନସ୍କାମନା ପୂରଣ ହେଲେ ଭକ୍ତମାନେ ସୁନା ମୁଦ୍ରା, ଚେନ୍, କଙ୍କଣ, ହାର ଓ ବିଭିନ୍ନ ଅଳଙ୍କାର ଦାନ କରିଆସୁଛନ୍ତି। ସମୟ ସହ ଦେଶ ଓ ବିଦେଶରେ ରହୁଥିବା ଗୌଡ଼ ସାରସ୍ୱତ ସମ୍ପ୍ରଦାୟ ସମେତ ଅନ୍ୟ ଭକ୍ତମାନେ ମଧ୍ୟ ଏହି ପରମ୍ପରା ସହ ଯୋଡ଼ି ହୋଇଛନ୍ତି। ଫଳରେ ପ୍ରତିବର୍ଷ ବଢ଼ୁଥିବା ଦାନ ଓ ଚଢ଼ାଉରେ GSB ଗଣପତି ଦେଶର ଅନ୍ୟତମ ସମୃଦ୍ଧ ଗଣେଶୋତ୍ସବ ଭାବେ ପରିଚିତ ହୋଇଛନ୍ତି।
