ନୂଆଦିଲ୍ଲୀ,୩୦ା୮: ଭାରତୀୟ ଟି-୨୦ ଦଳର ପୂର୍ବତନ ଅଧିନାୟକ ସୂର୍ଯ୍ୟକୁମାର ଯାଦବ ସଞ୍ଜୁ ସାମସନଙ୍କୁ ନେଇ ଏକ ବଡ଼ କଥା କହିଛନ୍ତି । ଦଳରୁ ବାଦ ପଡ଼ିବା ପରେ ସଞ୍ଜୁଙ୍କ ପ୍ରତିକ୍ରିୟା କିଭଳି ଥିଲା, ସେ ବିଷୟରେ କହିବା ସହ ତାଙ୍କ ମାନସିକତାକୁ ସୂର୍ଯ୍ୟକୁମାର ପ୍ରଶଂସା କରିଛନ୍ତି ।
ସଞ୍ଜୁ ସାମସନ ଦୀର୍ଘ ସମୟ ଧରି ଭାରତୀୟ ଟି-୨୦ ଦଳର ଅଂଶ ରହିଛନ୍ତି । ନିଜ ବ୍ୟାଟିଂ ଦ୍ୱାରା ସେ ଅନେକଥର ଦଳକୁ ପ୍ରଭାବିତ କରିଛନ୍ତି । ତେବେ ଟିମ୍ କମ୍ବିନେସନ ଓ ଉପଲବ୍ଧ ବିକଳ୍ପ କାରଣରୁ ଅନେକ ସମୟରେ ତାଙ୍କୁ ପ୍ଲେଇଂ ଇଲେଭେନରୁ ବାଦ ହେବାକୁ ପଡିଛି । ସୂର୍ଯ୍ୟକୁମାର କହିଛନ୍ତି, ସଞ୍ଜୁ ଦଳରୁ ବାଦ ପଡ଼ିବା ପରେ ମଧ୍ୟ କୌଣସି ପ୍ରକାରର ଅସନ୍ତୋଷ ପ୍ରକାଶ କରିନଥିଲେ। ବରଂ ଦଳର ଆବଶ୍ୟକତା ସମୟରେ ସେ ସବୁବେଳେ ପ୍ରସ୍ତୁତ ରହିବେ ବୋଲି କହିଥିଲେ।
ସୂର୍ଯ୍ୟକୁମାରଙ୍କ କହିବା ଅନୁଯାୟୀ, ସଞ୍ଜୁ କହିଥିଲେ ଯେ, ଯେତେବେଳେ ତାଙ୍କର ଆବଶ୍ୟକତା ପଡ଼ିବ, ସେ ସେତେବେଳେ ଉପଲବ୍ଧ ରହିବେ । ଏପରିକି ମ୍ୟାଚ୍ରେ ଖେଳିବାକୁ ଥିବା ଖେଳାଳିଙ୍କ ଭଳି ସେ ନିଜକୁ ପ୍ରସ୍ତୁତ ରଖିବେ। ସଞ୍ଜୁଙ୍କ ଏହି ମନୋଭାବ ସୂର୍ଯ୍ୟକୁମାରଙ୍କୁ ବେଶ୍ ପ୍ରଭାବିତ କରିଥିଲା। ଦଳରୁ ବାଦ ପଡ଼ିବା କୌଣସି ଖେଳାଳିଙ୍କ ପାଇଁ ସହଜ ନୁହେଁ। ବିଶେଷକରି ନିୟମିତ ଭାବେ ଖେଳିବାର ଆଶା ରଖିଥିବା ଖେଳାଳିଙ୍କ ପାଇଁ ଏହା ଅଧିକ କଷ୍ଟକର । ଏହା ସତ୍ତ୍ୱେ ସଞ୍ଜୁ ଯେପରି ଭାବେ ପରିସ୍ଥିତିକୁ ଗ୍ରହଣ କରିଥିଲେ, ତାହା ପ୍ରଶଂସନୀୟ ବୋଲି ସୂର୍ଯ୍ୟକୁମାର କହିଛନ୍ତି।
ସୂର୍ଯ୍ୟକୁମାରଙ୍କ ଏହି ବୟାନରୁ ସ୍ପଷ୍ଟ ହେଉଛି ଯେ, ସଞ୍ଜୁ ସାମସନଙ୍କ ବ୍ୟାଟିଂ କ୍ଷମତା ସହ ତାଙ୍କ ମାନସିକତାକୁ ମଧ୍ୟ ଦଳ ଭିତରେ ସମ୍ମାନ ମିଳିଛି। ଟି-୨୦ କ୍ରିକେଟ୍ରେ ପ୍ଲେଇଂ ଇଲେଭେନ ବାଛିବା ସବୁବେଳେ ସହଜ ନୁହେଁ। ପରିସ୍ଥିତି, ପ୍ରତିପକ୍ଷ ଦଳ ଓ ଖେଳାଳିଙ୍କ ଫର୍ମକୁ ଦେଖି ଟିମ୍ ମ୍ୟାନେଜମେଣ୍ଟକୁ ଅନେକ କଠିନ ନିଷ୍ପତ୍ତି ନେବାକୁ ପଡ଼େ । ଏଭଳି ସ୍ଥିତିରେ ଦଳରୁ ବାଦ୍ ପଡିବା କ୍ରିକେଟ୍ର ଏକ ଅଂଶ। ତେବେ ବ୍ୟକ୍ତିଗତ ନିରାଶାକୁ ପଛରେ ପକାଇ ଦଳର ସ୍ୱାର୍ଥକୁ ଆଗରେ ରଖିବା ହିଁ ଜଣେ ଖେଳାଳିଙ୍କ ବଡ଼ ଗୁଣ ବୋଲି ସୂର୍ଯ୍ୟକୁମାରଙ୍କ କଥାରୁ ଜଣାପଡ଼ିଛି।
