ନୂଆଦିଲ୍ଲୀ,୨୯।୮: ଆଇପିଏଲ୍ ପୂର୍ବରୁ ଚେନ୍ନାଇ ସୁପରକିଙ୍ଗ୍ସକୁ ଆଉ ଏକ ଝଟକା ଲାଗିଛି। ଟିମ୍ର ପ୍ରମୁଖ ବ୍ୟାଟ୍ସମ୍ୟାନ୍ ସୁରେଶ ରାଇନା ଆଇପିଏଲ୍ରୁ ବାହାର ହୋଇଛନ୍ତି। ଦଳ ପାଇଁ ସବୁଠୁ ଅଧିକ ରନ୍ ଏବଂ ଆଇପିଏଲ୍ ଇତିହାସରେ ଦ୍ୱିତୀୟ ସର୍ବାଧିକ ରନ୍ କରିଥିବା ରାଇନା ବ୍ୟକ୍ତିଗତ କାରଣକୁ ନେଇ ଭାରତ ଫେରିଛନ୍ତି। ସିଏସ୍କେ ସିଇଓଙ୍କ ପକ୍ଷରୁ ଶନିବାର ଟୁଇଟ୍ କରି ଏହି ସୂଚନା ଦେଇଛନ୍ତି। ରାଇନା ବ୍ୟକ୍ତିଗତ କାରଣରୁ ଭାରତ ଫେରୁଛନ୍ତି। ସେ ଶେଷ ଆଇପିଏଲ୍ରେ ଖେଳିବେ ନାହିଁ। ଚେନ୍ନାଇ ସୁପରକିଙ୍ଗ୍ସ ସୁରେଶ ଏବଂ ତାଙ୍କ ପରିବାରକୁ ଏହି ସମୟରେ ପୁରା ସମର୍ଥନ କରୁଛି ବୋଲି ସିଇଓ କହିଛନ୍ତି।
ପ୍ରକାଶ ଯେ, ୩୩ ବର୍ଷୀୟ ରାଇନା ଅନ୍ତର୍ଜାତୀୟ କ୍ରିକେଟରୁ ଅଗଷ୍ଟ ୧୫ରେ ସନ୍ୟାସ ନେଇଥିବା ବେଳେ ଚଳିତ ବର୍ଷ ଆଇପିଏଲ୍ରେ ଖେଳିବାକୁ ନେଇ ଉତ୍ସାହିତ ଥିଲେ। ଏପରିସ୍ଥଳେ ଆଇପିଏଲ୍ରୁ ତାଙ୍କୁ ବିଦାୟ ପ୍ରଶଂସକଙ୍କୁ ଧକ୍କା ଦେଇଛି। ଏବେ ରାଇନାଙ୍କ ସ୍ଥାନରେ ଯାହାକୁ ସୁଯୋଗ ମିଳିବ, ସେ ନିୟମ ମୁତାବକ କ୍ୱାରାଣ୍ଟାଇନ୍ରେ ରହିବ। ଏହାପରେ ସେ ଚୟନ ଯୋଗ୍ୟ ହେବେ। ତେବେ ଶୁକ୍ରବାର ସିଏସ୍କେ ଦଳର ଜଣେ ଦ୍ରୁତ ବୋଲରଙ୍କ ସମେତ ୧୩ଜଣ କରୋନାରେ ଆକ୍ରାନ୍ତ ଥିବା ଜଣାପଡ଼ିଛି। ସମସ୍ତଙ୍କୁ ଅଲଗା କରି ରଖାଯାଇଛି।
