ନୂଆଦିଲ୍ଲୀ, ୨୬ା୭: ଆଧାର ସହ ଭୋଟର ପରିଚୟପତ୍ରର ସଂଯୋଗ ପାଇଁ ଉଦ୍ଦିଷ୍ଟ ଆଇନକୁ ଚ୍ୟାଲେଞ୍ଜ କରି କଂଗ୍ରେସ ପକ୍ଷରୁ ହୋଇଥିବା ଆବଦେନର ଶୁଣାଣି କରିବାକୁ ସୁପ୍ରିମକୋର୍ଟ ସୋମବାର ମନା କରିଦେଇଛନ୍ତି। ଆଧାର-ଭୋଟର କାର୍ଡ ସଂଯୋଗୀକରଣ ନେଇ ଅତି ତରବରିଆ ଭାବେ ବିନା କୌଣସି ବିତର୍କରେ ପାର୍ଲାମେଣ୍ଟରେ ଆଇନ ଗୃହୀତ କରାଯାଇଥିବାରୁ ଏହାଦ୍ୱାରା ବହୁ ସଂଖ୍ୟକ ଭୋଟର ମତଦାନ ଅଧିକାରରୁ ବଞ୍ଚତ୍ତ ହେବେ ବୋଲି କଂଗ୍ରେସ ନେତା ରଣଦୀପ ସୂର୍ଯ୍ୟଓ୍ବୋଲା ଏକ ପିଟିଶନ ଦାଏର କରିଥିଲେ। ସୋମବାର ସର୍ବୋଚ୍ଚ ଅଦାଲତରେ ଏହାର ଶୁଣାଣି ହେବାକୁ ଥିବାବେଳେ ସୂର୍ଯଓ୍ବୋଲା ଏହି ମାମଲାରେ ଦିଲ୍ଲୀ ହାଇକୋର୍ଟକୁ ଯାଆନ୍ତୁ ବୋଲି ଜଷ୍ଟିସ୍ ଡି. ଓ୍ବାଇ. ଚନ୍ଦ୍ରଚୂଡ଼ ଏବଂ ଜଷ୍ଟିସ୍ ଏ. ଏସ୍ ବୋପାନ୍ନାଙ୍କ ଖଣ୍ଡପୀଠ କହିଛନ୍ତି।
ଉପରେ ସୁପ୍ରିମକୋର୍ଟ କହିଥିଲେ, ନିର୍ବାଚନ ଆଇନ (ସଂଶୋଧନ), ୨୦୨୧ର ସେକ୍ସନ ୪ ଏବଂ ୫କୁ ସୂର୍ଯଓ୍ବୋଲା ଚ୍ୟାଲେଞ୍ଜ କରିଛନ୍ତି। ଏହା ପୂର୍ବରୁ ଦିଲ୍ଲୀ ହାଇକୋର୍ଟ ଅନୁରୂପ ପିଟିଶନର ବିଚାର କରୁଛନ୍ତି। ଏହାର ପ୍ରଭାବଶାଳୀ ବିକଳ୍ପ ପ୍ରତିକାର ହାଇକୋର୍ଟରେ ଅଛି। ସମ୍ବିଧାନର ଧାରା ୨୨୬ ଏପରି ମାମଲାକୁ ଉଚ୍ଚ ଅଦାଲତକୁ ସ୍ଥାନାନ୍ତର କରିବାର ସ୍ବାଧୀନତା ପ୍ରଦାନ କରିଥାଏ। ଯଦି ବିଭିନ୍ନ ସ୍ଥାନରେ ଏପରି ପିଟିଶନ ଦାଏର କରାଯଏ ତେବେ କେନ୍ଦ୍ର ସରକାର ସେଗୁଡ଼ିକର ସ୍ଥାନାନ୍ତର ପାଇଁ ମଧ୍ୟ ଆବଦେନ କରିପାରିବେ। ସେତେବେଳେ ସୁପ୍ରିମକୋର୍ଟ ସମସ୍ତ ପିଟିଶନକୁ ଏକଜୁଟ କରି କୌଣସି ହାଇକୋର୍ଟରେ ବିଚାର ପାଇଁ କହିପାରିନ୍ତି ବୋଲି ଖଣ୍ଡପୀଠ କହିଥିଲେ। ସୁପ୍ରିମକୋର୍ଟଙ୍କ ଏହି ଟିପ୍ପଣୀ ପରେ ସୂର୍ଯଓ୍ବୋଲା ନିଜ ପିଟିଶନ ଫେରାଇ ନେଇଛନ୍ତି। ସୂଚନାଯୋଗ୍ୟ, ପାର୍ଲାମେଣ୍ଟର ଶୀତ ଅଧିବେଶନ ବେଳେ ୨୦୨୧ ଡିସେମ୍ବର ୨୦ରେ କେନ୍ଦ୍ର ସରକାର ନିର୍ବାଚନ ଆଇନ (ସଂଶୋଧନ), ୨୦୨୧ ବିଲ୍କୁ ଲୋକ ସଭାରେ ଉପସ୍ଥାପନ କରିଥିଲେ। ଆଇନମନ୍ତ୍ରୀ କିରେନ୍ ରିଜିଜୁଙ୍କ ପକ୍ଷରୁ ଆଗତ ଉକ୍ତ ବିଧେୟକକୁ ବିଜେଡି ସମେତ କଂଗ୍ରେସ, ଡିଏମ୍କେ, ଏନ୍ସିପି, ଟିଏମ୍ସି, ଓ୍ବାଇଏସ୍ଆର୍ସିପି, ବିଏସ୍ପି, ଶିବସେନା ପ୍ରମୁଖ ବିରୋଧୀ ଦଳଗୁଡ଼ିକ ବିରୋଧ କରିଥିଲେ। ତେବେ ରିଜିଜୁ ଏହାକୁ ନିର୍ବାଚନ ସଂସ୍କାର ପାଇଁ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ଦର୍ଶାଇ ଭୋଟର ପରିଚୟପତ୍ର ସହ ଆଧାର ବାଧ୍ୟତାମୂଳକ ନୁହେଁ ବୋଲି କହିଥିଲେ। ଏହି ଆଇନକୁ ଅସାମ୍ବିଧାନିକ ତଥା ନାଗରିକଙ୍କ ପ୍ରିଭେସି (ବ୍ୟକ୍ତିଗତ ଅନ୍ତରଙ୍ଗ ତଥ୍ୟ) ଓ ସମାନତା ଅଧିକାର ଉଲ୍ଲଂଘନକାରୀ ଭାବେ ଅଭିହିତ କରି ରଦ୍ଦ ପାଇଁ ସୂର୍ଯ୍ୟଓ୍ବୋଲା ସୁପ୍ରିମକୋର୍ଟରେ ପିଟିଶନ ଦାଏର କରିଥିଲେ।
