ଅମୃତସର,୨୬ ।୭: ପଞ୍ଜାବର ଅମୃତସରରେ ଥିବା ଐତିହାସିକ ଜାଲିଆନାୱାଲାବାଗକୁ ଦେଖିବାକୁ ସାରା ବିଶ୍ୱରୁ ପର୍ଯ୍ୟଟକ ଆସିଥାଆନ୍ତି । ଏଠାରେ ଥିବା କୂଅରେ ପର୍ଯ୍ୟଟକମାନେ କଏନ ପକାଇ ଥାଆନ୍ତି । ହେଲେ ଏବେ ଆଉ କୌଣସି ପର୍ଯ୍ୟଟକ ଏହି ଶହୀଦ କୂଅରେ କଏନ ପକାଇ ପାରିବେ ନାହିଁ ବୋଲି କୁହାଯାଇଛି । କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଶହୀଦ କୂଅରେ ମୁଦ୍ରା ପକାଇବାକୁ ବାରଣ କରିଛି । ଏହାସହ କୂଅର ଉପର ଭାଗକୁ ବନ୍ଦ କରିବାକୁ ମନ୍ତ୍ରଣାଳୟ ପକ୍ଷରୁ ନିର୍ଦ୍ଦେଶ ଦିଆଯାଇଛି । ଏହା ପୂର୍ବରୁ କୂଅର ବାହାରେ ନୋଟିସ ବୋର୍ଡ ବି ଲଗାଇ ଦିଆଯାଇଥିଲା । ହେଲେ ଏହା ପରେ ବି ପର୍ଯ୍ୟଟକ କୂଅରେ ମୁଦ୍ରା ପକାଇ ଚାଲିଥିଲେ । ତେଣୁ ଏହାକୁ ସମ୍ପୂର୍ଣ୍ଣ ବନ୍ଦ କରିବାକୁ ଏବେ କୂଅର ଉପର ଭାଗକୁ ବନ୍ଦ କରିବାକୁ ମନ୍ତ୍ରଣାଳୟ ନିଷ୍ପତ୍ତି ନେଇଛି ।
ସୂଚନାଯୋଗ୍ୟ, ପର୍ଯ୍ୟଟକ ଏଠାରେ ଶହୀଦଙ୍କ ସମ୍ମାନରେ ମୁଦ୍ରା ପକାଇ ଥାଆନ୍ତି । ଦେଶ ବିଦେଶରୁ ଆସୁଥିବା ପର୍ଯ୍ୟଟକ ଜାଲିଆନାୱାଲାବାଗରେ ଶହୀଦଙ୍କୁ ସମ୍ମାନ ଦେବା ସମୟରେ କୂଅକୁ ଦେଖିଥାଆନ୍ତି ଓ ସମ୍ମାନରେ ମୁଦ୍ରା ପକାଇ ଥାଆନ୍ତି । ସୂଚନାଯୋଗ୍ୟ, ୨୦୧୯ରେ ଜାଲିଆନାୱାଲାବାଗ ନରସଂହାରର ଶତାବ୍ଦି ଅବସରରେ କେନ୍ଦ୍ର ସରକାର ଏହାର ନବିକରଣ କରିଥିଲେ ।
