ନୂଆଦିଲ୍ଲୀ, ୧୦।୮: ଆଗାମୀ ଦଶନ୍ଧିଗୁଡ଼ିକରେ ଭାରତରେ ଗ୍ରୀଷ୍ମ ପ୍ରବାହ ବଢ଼ିବା ସହ ଅନାବୃଷ୍ଟି, ଅତିବୃଷ୍ଟି ଦେଖାଦେବ। ଏଥିସହିତ ଦେଶ ଅଧିକ ବାତ୍ୟାର ସମ୍ମୁଖୀନ ହେବ ବୋଲି ଜଳବାୟୁ ପରିବର୍ତ୍ତନ ଉପରେ ଆନ୍ତଃସରକାରୀ କମିଟି (ଆଇପିସିସି) ରିପୋର୍ଟରେ କୁହାଯାଇଛି। ଆଇପିସିସି ଓ୍ବାର୍କିଂ ଗ୍ରୁପ୍-୧ ଏହାର ଷଷ୍ଠ ଆକଳନ ରିପୋର୍ଟ ସୋମବାର ପ୍ରକାଶ ପାଇଛି। ଚଳିତ ଶତାବ୍ଦୀ ଶେଷ ସୁଦ୍ଧା ହାରାହାରି ତାପମାତ୍ରା ବୃଦ୍ଧିକୁ ୧.୫ ଡିଗ୍ରୀ ସେଲ୍ସିୟସ ମଧ୍ୟରେ ସୀମିତ ରଖିବାକୁ ସାରା ବିଶ୍ୱ ଉଦ୍ୟମ ଚଳାଇଥିବାବେଳେ ଜାତିସଂଘ ଜଳବାୟୁ ପରିବର୍ତ୍ତନ କମିଟିର ଏହି ରିପୋର୍ଟ ଚିନ୍ତା ବଢ଼ାଇ ଦେଇଛି। ଉକ୍ତ ରିପୋର୍ଟ ଅନୁଯାୟୀ ଆଗାମୀ ୨୦ ବର୍ଷ ମଧ୍ୟରେ ତାପମାତ୍ରା ୧.୫ ଡିଗ୍ରୀ ବୃଦ୍ଧି ପାଇବ କିମ୍ବା ଏହାକୁ ଟପିଯିବ। ଏହାର ପରିଣାମ ସ୍ବରୂପ ଗ୍ରୀଷ୍ମ ଲହର ବଢ଼ିବା ସାଙ୍ଗକୁ ଗ୍ରୀଷ୍ମଋତୁ ଅବଧି ବୃଦ୍ଧି ପାଇବ ଓ ଶୀତଦିନ କମିଯିବ। ସମୁଦ୍ର ପତ୍ତନ ଦ୍ରୁତ ଗତିରେ ବୃଦ୍ଧି ପାଇବ। ଭାରତର ବିଭିନ୍ନ ଅଞ୍ଚଳରେ ଅନୁରୂପ ପ୍ରଭାବ ଅନୁଭୂତ ହେବ। ହିମାଳୟ ଅଞ୍ଚଳରେ ଗ୍ଲେସିୟର ହ୍ରଦଗୁଡ଼ିକ ଅତ୍ୟଧିକ ତରଳିବ ବୋଲି କୁହାଯାଇଛି।
ଜଳବାୟୁ ପରିବର୍ତ୍ତନ ପଛରେ ଥିବା ବିଜ୍ଞାନସମ୍ମତ କାରଣ ଦର୍ଶାଇବା ସହ ଆଇପିସିସି ପ୍ରଥମ ଥର ପାଇଁ ବିଭିନ୍ନ ଅଞ୍ଚଳରେ ହେବାକୁ ଥିବା ପରିବର୍ତ୍ତନର ସବିଶେଷ ବିବରଣୀ ଦେଇଛି। ସାରା ବିଶ୍ୱକୁ ୧୧ଟି ଅଞ୍ଚଳରେ ବିଭକ୍ତ କରି ଜଳବାୟୁ ପରିବର୍ତ୍ତନର ସବିଶେଷ ତଥ୍ୟ ଦିଆଯାଇଛି। ଫଳରେ ଆଗାମୀ ଦିନରେ କେଉଁ ଅଞ୍ଚଳ କିଭଳି ସମସ୍ୟାର ସମ୍ମୁଖୀନ ହେବ ତାହା ଆକଳନ କରିବା ସହଜ ହେବ ଏବଂ ଏଥିରୁ ରକ୍ଷା ପାଇବା ପାଇଁ ଆବଶ୍ୟକ ପଦକ୍ଷେପ ନିଆଯାଇପାରିବ। ଯଦିଓ ରିପୋର୍ଟରେ ନିର୍ଦ୍ଦିଷ୍ଟ ସହର ଭବିଷ୍ୟତରେ ସମ୍ମୁଖୀନ ହେବାକୁ ଥିବା ସମସ୍ୟା ସମ୍ପର୍କରେ ଉଲ୍ଲେଖ କରାଯାଇନାହିଁ ତେବେ ସମୁଦ୍ର ଜଳସ୍ତର ବୃଦ୍ଧି ଯୋଗୁ ଭାରତର ୭,୫୧୭ କିଲୋମିଟର ଉପକୂଳ ଅଞ୍ଚଳ ଏବଂ ମୁମ୍ବାଇ, ଚେନ୍ନାଇ, କୋଚି, କୋଲକାତା, ସୁରଟ, ବିଶାଖାପାଟଣା ଆଦି ବୃହତ୍ ବନ୍ଦର ନଗରୀ ପ୍ରଭାବିତ ହେବ।
‘କ୍ଲାଇମେଟ୍ ଚେଞ୍ଜ ୨୦୨୧: ଦି ଫିଜିକାଲ ସାଇନ୍ସ ବେସିସ୍’ ନାମରେ ପ୍ରକାଶିତ ଏହି ରିପୋର୍ଟକୁ ଭାରତ ସମେତ ୧୯୫ ସରକାର ଏବଂ ବୈଜ୍ଞାନିକମାନେ ଚୂଡ଼ାନ୍ତ କରିଛନ୍ତି। ରିପୋର୍ଟରେ ଭାରତୀୟ ଉପମହାଦେଶ ଅଞ୍ଚଳ ସମ୍ପର୍କରେ କୁହାଯାଇଛି, ଏଠାରେ ଭୂପୃଷ୍ଠ ତାପମାତ୍ରା ୧୮୫୦-୧୯୦୦ ଆଭ୍ୟନ୍ତରୀଣ ପରିବର୍ତ୍ତନ ରେଞ୍ଜ୍ ତୁଳନାରେ ବଢ଼ିଛି। ଗ୍ରୀଷ୍ମ ଅତ୍ୟଧିକ ବଢ଼ିବା ସହ ଶୀତ କମିଛି। ଆଗାମୀ ଦଶନ୍ଧିଗୁଡ଼ିକରେ ଏହି ଧାରା ଜାରି ରହିବ। ବିଂଶ ଶତାବ୍ଦୀ ଦ୍ୱିତୀୟାର୍ଦ୍ଧରେ ଦକ୍ଷିଣ ଏବଂ ଦକ୍ଷିଣପୂର୍ବ ଏସିଆରେ ମୌସୁମୀ ଦୁର୍ବଳ ହୋଇପଡ଼ିଥିଲା। ମୁଖ୍ୟତଃ ଏରୋସଲ ଏବଂ ପ୍ରଦୂଷଣ ବୃଦ୍ଧି ଯୋଗୁ ଏଭଳି ସମସ୍ୟା ଦେଖାଦେଇଥିଲା। ସବୁଜ ଗୃହ ବାଷ୍ପ ପ୍ରଭାବ ଓ ଏରୋସଲର ଫଳ ସ୍ବରୂପ ପୂର୍ବ ଏସିଆରେ ମୌସୁମୀ ବର୍ଷା ପ୍ରଭାବିତ ହୋଇଥିଲା। ଆଭ୍ୟନ୍ତରୀଣ ପରିବର୍ତ୍ତନର ପ୍ରଭାବ ଯୋଗୁ ଦକ୍ଷିଣ, ଦକ୍ଷିଣପୂର୍ବ ଏସିଆର ମୌସୁମୀ ଏବଂ ପୂର୍ବ ଏସିଆର ଗ୍ରୀଷ୍ମ ମୌସୁମୀ ସ୍ବଳ୍ପ ମିଆଦିରେ କମ୍ ହେବାକୁ ଥିବାବେଳେ ଦୀର୍ଘମିଆଦୀରେ ବୃଦ୍ଧି ପାଇବ। ଏଥିସହିତ ଏହି ଉପମହାଦେଶରେ ଅନାବୃଷ୍ଟି ବୃଦ୍ଧି ପାଇବା ଆଶଙ୍କା କରାଯାଉଛି ବୋଲି ରିପୋର୍ଟରେ କୁହାଯାଇଛି।
ତେବେ ଅଙ୍ଗାରକାମ୍ଳ ଏବଂ ଅନ୍ୟାନ୍ୟ ସବୁଜଗୃହ ବାଷ୍ପ ନିର୍ଗମନକୁ କମାଇପାରିଲେ ଜଳବାୟୁ ପରିବର୍ତ୍ତନକୁ ସୀମିତ କରାଯାଇପାରିବ ବୋଲି ବିଶ୍ୱାସ କରାଯାଉଛି। ଏଥିପାଇଁ ସତାବ୍ଦୀ ମଧ୍ୟଭାଗ ସୁଦ୍ଧା କାର୍ବନ ଡାଇଅକ୍ସାଇଡ୍ ନିର୍ଗମନକୁ ଶୂପରେ ପହଞ୍ଚାଇବାକୁ ହେବ। ଏଥିସହିତ ବାୟୁ ପ୍ରଦୂଷକ ଏବଂ ମିଥେନ ଆଦି ଅନ୍ୟାନ୍ୟ ସବୁଜ ଗୃହ ବାଷ୍ପ ନିର୍ଗମନ ହ୍ରାସ ପାଇଲେ ସ୍ବାସ୍ଥ୍ୟ ଏବଂ ଜଳବାୟୁ ଉପରେ ଏହାର ଅନୁକୂଳ ପ୍ରଭାବ ପଡ଼ିବ ବୋଲି ଆଇପିସିସି କାର୍ଯ୍ୟକାରୀ ଗ୍ରୁପ୍-୧ର ସହ-ଅଧ୍ୟକ୍ଷ ପାନ୍ମାଓ ଝାଇ କହିଛନ୍ତି।
