ଭୋଗରାଇ, ୨।୧୨(ପ୍ରଦୀପ ଦାସ) ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଓଡିଶା ସମେତ ଭିନ୍ନ ରାଜ୍ୟକୁ ୪ ଦିନ ଧରି ଆଳୁ ରପ୍ତାନି ଉପରେ ଅଙ୍କୁଶ ଲଗାଇଥିବାବେଳେ ଆଳୁର ସଙ୍କଟ ଘନୀଭୂତ ହେବାରେ ଲାଗିଛି। ଆଳୁର ଅଭାବ ଯୋଗୁ ଓଡିଶା ହାଟ ବଜାରରେ ଆଳୁର ମୂଲ୍ୟବୃଦ୍ଧି ଘଟିଛି l ବଙ୍ଗୀୟ ଆଳୁ ବ୍ୟବସାୟୀମାନେ ସେମାନଙ୍କର ଶୀତଳ ଭଣ୍ଡାରରୁ ଆଳୁ ବିକ୍ରି କରି ନ ପାରି କ୍ଷତି ଆଶଙ୍କାରେ ସେଠାକାର ସରକାରଙ୍କୁ ଘେରିଛନ୍ତି l
ହୁଗୁଳି ଜିଲା ତାରକେଶ୍ୱରଠାରେ ମିଳିତ ହୋଇ ସରକାରଙ୍କୁ ସୋମବାର ମଧ୍ୟରେ ଅନ୍ତଃରାଜ୍ୟ ସୀମାନ୍ତରେ ପୋଲିସ ଜୁଲୁମ ବନ୍ଦ କରିବା ଓ ଆଳୁ ରପ୍ତାନି କଟକଣାକୁ ହଟାଇ ନ ଦେଲେ ବ୍ୟବସାୟୀମାନେ କର୍ମ ବରତି ଧର୍ମଘଟ କରିବେ ବୋଲି ସରକାରକୁ ଚେତାବନୀ ଦେଇଥିଲେ। ଧର୍ମଘଟକୁ ଆଖିଆଗରେ ରଖି ପଶ୍ଚିମବଙ୍ଗ କୃଷି ମନ୍ତ୍ରୀ ବିଚାରାମ ମାନ୍ନାଙ୍କ ଆମନ୍ତ୍ରଣ କ୍ରମେ କୋଲକାତା ସରକାରୀ କୃଷି ଦପ୍ତରରେ ସୋମବାର ପ୍ରଗତିଶୀଳ ଆଳୁ ବ୍ୟବସୟୀ ସମିତି, ଶୀତଳ ଭଣ୍ଡାରର ମାଲିକ, ଟାସ୍କ ଫୋର୍ସ ଓ ଉଚ୍ଚ ପଦାଧିକାରୀ ଉପସ୍ଥିତ ରହି ଆଳୁ ସମସ୍ୟା ସମ୍ପର୍କରେ ଦୀର୍ଘ ସମୟ ଆଲୋଚନା ପର୍ଯ୍ୟାଲୋଚନା ହୋଇଥିଲେ ମଧ୍ୟ ସମସ୍ୟାର ସମାଧାନ ହୋଇପାରି ନ ଥିଲା। ଆଳୁ ବ୍ୟବସାୟୀମାନେ ବୈଠକ ଛାଡି ଫେରି ଆସି ଥିବାର ସୂଚନା ମିଳିଛି l
ଏଭଳି ସ୍ଥିତିରେ ସୋମବାର ନବାନ୍ନରେ ବିଧାନସଭା ଚାଲୁଥିବାବେଳେ ସଦସ୍ୟଙ୍କ ପ୍ରଶ୍ନତ୍ତୋରରେ ଆଳୁ ଓ ପିଆଜର ମୂଲ୍ୟବୃଦ୍ଧି ଉପରେ ଗର୍ଜିଛନ୍ତି ମୁଖ୍ୟମନ୍ତ୍ରୀ ମମତା ବାନାର୍ଜୀ। ପଶ୍ଚିମବଙ୍ଗରେ ଆଳୁ ଓ ପିଆଜର ଅଭାବ ଏବଂ ବଜାର ଦର ନିୟନ୍ତ୍ରଣ ନ ହେବା ପର୍ଯ୍ୟନ୍ତ ଅନ୍ୟ ରାଜ୍ୟକୁ ଆଳୁ ରପ୍ତାନି ବନ୍ଦ ରହିବ ବୋଲି ପୁଣି ସେ ଦୋହରାଇଛନ୍ତି। ଦିଦିଙ୍କ ଜିଦ୍ ଯୋଗୁ ପଶ୍ଚିମବଙ୍ଗ ପ୍ରଗତିଶୀଳ ଆଳୁ ବ୍ୟବସାୟୀ ସମିତି ଉଦବେଗ ପ୍ରକାଶ କରିବା ସହିତ ବଙ୍ଗୀୟ ଆଳୁ ବ୍ୟବସାୟୀମାନେ ସୋମବାର ମଧ୍ୟରାତ୍ରିରୁ କର୍ମବିରତି ଧର୍ମଘଟ ଡାକ ଦେଇଥିବାର ରାଜ୍ୟ ମହା ସଚିବ ଲାଲୁ ମୁଖାର୍ଜୀ ଧରିତ୍ରୀକୁ ସୂଚନା ଦେଇଛନ୍ତି l
ବଙ୍ଗ ଆଳୁ ଚାଷୀମାନେ ପଞ୍ଜାବ ଓ ଉତ୍ତର ପ୍ରଦେଶରୁ ଆଳୁ ବିହନ କିଣୁଥିଲାବେଳେ ଉତ୍ପନ୍ନ ବଳକା ଆଳୁ ଭିନ୍ନ ରାଜ୍ୟକୁ ରପ୍ତାନି ନ କରିବା ମୁଖ୍ୟମନ୍ତ୍ରୀ ସାମ୍ବିଧାନିକ ବ୍ୟବସ୍ଥାକୁ ଉଲଂଘନ କରିଥିବାର ସେମାନେ ଅଭିଯୋଗ କରିଛନ୍ତି l ନିକଟରେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନ ଶପଥ ଗ୍ରହଣ ଉତ୍ସବକୁ ଦିଦି ସ୍ବତନ୍ତ୍ର ଭାବେ ଯାଇଥିବାବେଳେ ସେଠାକାର ସରକାରଙ୍କୁ ଆଳୁ ରପ୍ତାନି ନ କରିବା ଏ କେଉଁ ପ୍ରକାର ରାଜନୀତି ବୋଲି ବ୍ୟବସାୟୀ ସମିତିର ସଦସ୍ୟ ମାନେ ପ୍ରଶ୍ନ ଉଠାଇଛନ୍ତି l
ଅପରପକ୍ଷରେ ଓଡ଼ିଶାରେ ଆଳୁର ଅଭାବ କିମ୍ବା ସଙ୍କଟ ଦେଖାଦେବନାହିଁ ଓ ୟୁପିରୁ ୩ ଶହ ଆଳୁ ଗାଡି ପହଞ୍ଚିବ ବୋଲି ରାଜ୍ୟ ଖାଦ୍ୟ ଯୋଗାଣ ଓ ଖାଉଟି କଲ୍ୟାଣ ମନ୍ତ୍ରୀ କୃଷ୍ଣ ଚନ୍ଦ୍ର ପାତ୍ର ବୟାନ ଦେଉଥିବାବେଳେ ବାସ୍ତବରେ ତାହା ଓଲଟା ବୋଲି ଖାଉଟିମାନେ ପ୍ରକାଶ କରିଛନ୍ତି l ଦିନକୁ ଦିନ ହାଟ ବଜାରରେ ଆଳୁର ଅଭାବ ପରିଲକ୍ଷିତ ହେଉଥିବା ବେଳେ ବିଭିନ୍ନ ସ୍ଥାନରେ ଆଳୁ କେଜି ପ୍ରତି ୪୦ରୁ ଅଧିକ ଟଙ୍କାରେ ବିକ୍ରୀ ହେଉଥିବାର ନଜରକୁ ଆସୁଛି l ପଶ୍ଚିମବଙ୍ଗ ଆଳୁ ବ୍ୟବସାୟ ସମିତି ଧର୍ମଘଟ ଯୋଗୁ ଓଡିଶା ସୀମାନ୍ତ ଗଳାବାଟ ଦେଇ ଆସୁଥିବା ଆଳୁଗାଡି ସମ୍ପୂର୍ଣ୍ଣ ବନ୍ଦ ହୋଇଗଲେ ଓଡ଼ିଶାରେ ଆଳୁର ଦାମ ଆକାଶ ଛୁଆଁ ହେବାର ସମ୍ଭାବନା ଦେଖାଦେଇଛି l
