ଖୋର୍ଦ୍ଧା ଅଫିସ,୨୧ା୩: ଖୋର୍ଦ୍ଧାରେ ବେଆଇନ ଲଘୁ ଖଣିଜ ଚୋରାଚାଲାଣ ରୋକିବା ପାଇଁ ପ୍ରଶାସନ ପକ୍ଷରୁ ଧରପଗଡ ଜୋରଦାର କରାଯାଇଛି। ପ୍ରଶାସନ ଏବଂ ପୋଲିସ ପକ୍ଷରୁ ଗଠିତ ମିଳିତ ସ୍କ୍ବାଡ୍ ବିଭିନ୍ନ ସ୍ଥାନରେ ଚଢଉ ଜାରି ରଖିଛି। ଶୁକ୍ରବାର କୁମାରବସ୍ତରେ ବେଆଇନ ଭାବେ ଚାଲିଥିବା ମାଙ୍କଡ଼ା ଚାଲାଣ ଖଣିରେ ଟାଉନ ପୋଲିସ ପକ୍ଷରୁ ଏକ ଟିମ ଚଢାଉ କରିଥିଲା। ଘଟଣାସ୍ଥଳରୁ ମାଙ୍କଡା ବୋଝେଇ ଟ୍ରକ(ନଂ. ଓଆର୦୯ଇ୯୫୩୩), ୨ଟି ନମ୍ବର ବିହୀନ ପାୱାର ଟିଲର, ୪ଟି ପଥର କଟିଙ୍ଗ ମେଶିନ ଜବତ କରାଯାଇଛି। ଏହି ଘଟଣାରେ ଚନ୍ଦକା ଥାନା ଗଙ୍ଗପଡା ଗ୍ରାମର ଶ୍ରୀକାନ୍ତ କୁମାର ଯାଦବଙ୍କୁ ଗିରଫ କରାଯାଇଛି। କୌଣସି ସୂତ୍ରରୁ ଖବର ପାଇ ଥାନାଧିକାରୀ ସଞ୍ଜୟ ପଟ୍ଟନାୟକଙ୍କ ନେତୃତ୍ୱରେ ଏକ ଟିମ୍ ବେଆଇନ ଭାବେ ଚାଲିଥିବା ଖଣିରେ ଚଢାଉ କରିଥିଲେ। ପୋଲିସକୁ ଦେଖି ଅଭିଯୁକ୍ତ ଖସିଯିବାକୁ ଉଦ୍ୟମ କରୁଥିଲେ। ତେବେ ପୋଲିସ ତାଙ୍କୁ ମାଡି ବସିଥିଲା। ଏନେଇ ଥାନାରେ ଆରଡବ୍ଲ୍ୟୁ ସେକ୍ସନ-୫୧ ଓଏମ୍ଏମ୍ସିଆର୍ ଆକ୍ଟ ପ୍ରକାରେ ଦଫା ୩୭୯/୩୪ ଆଇପିସିରେ ଏକ ମାମଲା (ନଂ. ୧୮/୨୨) ରୁଜୁ ହୋଇଛି। ପ୍ରକାଶ ଯେ, କୁମାରବସ୍ତ ଅଞ୍ଚଳରେ ବେଆଇନ ଭାବେ ମାଙ୍କଡା ପଥର ଚାଲାଣ ହେଉଛି। ଦୈନିକ ଶହ ଶହ ଟ୍ରକରେ ମାଙ୍କଡ଼ା ପଥର ଭୁବନେଶ୍ୱର ଏବଂ ଅନ୍ୟ ଅଞ୍ଚଳକୁ ଚୋରା ଚାଲାଣ କରାଯାଉଛି।
