ଭୁବନେଶ୍ୱର, ୧୪ା୧୨ (ସ୍ପୋଟର୍ସ ବ୍ୟୁରୋ)- ଓଡ଼ିଶା ରାଜ୍ୟ ଚେସ୍ ଆସୋସିଏଶନ ଏବଂ ମା’ ଉତ୍ତରେଶ୍ୱରୀ କ୍ଲବ ମିଳିତ ଆନୁକୂଲ୍ୟରେ ପିପିଲିଠାରେ ଚାଲିଥିବା ୪ର୍ଥ ରାଜ୍ୟ ଓପନ ରାପିଡ୍ ଚେସ୍ ଚାମ୍ପିୟନଶିପ୍ ରବିବାର ଉଦ୍ଯାପିତ ହୋଇଯାଇଛି। ମା’ ଉତ୍ତରେଶ୍ୱରୀ ଟେମ୍ପଲ ହଲ୍ଠାରେ ଅନୁଷ୍ଠିତ ୭ ରାଉଣ୍ଡ ବିଶିଷ୍ଟ ଏହି ପ୍ରତିଯୋଗିତାରେ ଭୁବନେଶ୍ୱରର ସୌମ୍ୟରଞ୍ଜନ ମିଶ୍ର ଓ ପ୍ରବୋଧ କୁମାର ମିଶ୍ର ସମାନ ୬ ପଏଣ୍ଟ ହାସଲ କରିଥିଲେ ହେଁ ବୁକୋଲୋଜରେ ସୌମ୍ୟ ପ୍ରଥମ ସ୍ଥାନ ଅଧିକାର କରିବା ସହ ଚାମ୍ପିୟନ ହୋଇଥିଲେ। ସୌମ୍ୟରଞ୍ଜନଙ୍କର ଏହା ହେଉଛି ୬୦ତମ ଟାଇଟଲ।
କଟକର ରବୀନ୍ଦ୍ର କୁମାର ଓଝା (୫.୫ ପଏଣ୍ଟ) ତୃତୀୟ ହୋଇଛନ୍ତି। ଅନ୍ୟମାନଙ୍କ ମଧ୍ୟରେ ହର୍ଷିତ ରଞ୍ଜନ ସାହୁ (କଟକ), ବିଭୂତି ଭୂଷଣ ଦାସ (ପୁରୀ), ଜ୍ଞାନରଞ୍ଜନ ପ୍ରଧାନ (ଦାଣ୍ଡମୁକୁନ୍ଦପୁର) ଯଥାକ୍ରମେ ୪ର୍ଥ, ୫ମ ଓ ୬ଷ୍ଠ ସ୍ଥାନ ଅଧିକାର କରିଥିଲେ। ସେହିପରି ରାଜେନ୍ଦ୍ର କୁମାର ସାହୁ (ଭୁବନେଶ୍ୱର)୭ମ, ସ୍ଥିତପ୍ରଜ୍ଞ ସାହୁ ୮ମ (ଜଟଣୀ), ମାନସରଞ୍ଜନ ପରିଡ଼ା ୯ମ (ଭୁବନେଶ୍ୱର) ଓ ଅଶୋକ କୁମାର ମହାନ୍ତି (ଭୁବନେଶ୍ୱର) ୧୦ମ ସ୍ଥାନରେ ରହିଥିଲେ। ସ୍କୁଲ ଛାତ୍ରମାନଙ୍କୁ ସ୍ବତନ୍ତ୍ର ପୁରସ୍କାର ପ୍ରଦାନ କରାଯାଇଥିଲା। ଉଦ୍ଯାପନୀ ଉତ୍ସବରେ ପୁରୀ ଭାଜପା ସଭାପତି ଆଶ୍ରିତ ପଟ୍ଟନାୟକ, ସରପଞ୍ଚ ଦ୍ରୌପଦୀ ପୃଷ୍ଟି, ଓଡ଼ିଶା ରାଜ୍ୟ ଚେସ୍ ଆସୋସିଏଶନ ଗେମ୍ସ ନିର୍ଦ୍ଦେଶକ ଦେବାଶିଷ ପାଣିଗ୍ରାହୀ ମା’ ଉତ୍ତରେଶ୍ୱରୀ କ୍ୱଲର ସମ୍ପାଦକ ମନୋରଞ୍ଜନ ପରିଡା ଓ ସଭାପତି ସୁଜିତ କୁମାର ପ୍ରଧାନ ପ୍ରମୁଖ ଯୋଗ ଦେଇ ପୁରସ୍କାର ବିତରଣ କରିଥିଲେ।
