ଲେହ, ୮।୯: ଦେଶରେ କରୋନା ମହାମାରୀ ସଂକ୍ରମଣ ଜାରି ରହିଥିବାବେଳେ ଏବେ ବିପଦ ଉପରେ ବିପଦ ଆସିବାରେ ଲାଗିଛି। ଏଲ୍ଏସିରେ ଭାରତ ଚାଇନା ମଧ୍ୟରେ ଉତ୍ତେଜନା ବଢ଼ିବାରେ ଲାଗିଛି। ୪୫ ବର୍ଷ ପରେ ପୁଣି ଥରେ ଏଠାରେ ସମାନ ସ୍ଥିତି ସୃଷ୍ଟି ହୋଇଛି। ୧୯୭୫ରେ ଭାରତ ଚାଇନା ଏଲ୍ଏସିରେ ଗୁଳି ଚାଳନା ନ କରିବାକୁ ଚୁକ୍ତିବଦ୍ଧ ହୋଇଥିଲେ। ତେବେ ଅଗଷ୍ଟ ୩୧ଠାରୁ ଏଥିରେ ବ୍ୟତିକ୍ରମ ଘଟିଛି। ଗତ ୮ ଦିନ ମଧ୍ୟରେ ଦ୍ୱିତୀୟ ଥର ପାଇଁ ଏଲ୍ଏସିରେ ଦୁଇପକ୍ଷ ମଧ୍ୟରେ ଗୁଳି ଚାଳନା ହୋଇଛି। ଅଗଷ୍ଟ ୩୧ରେ ଗୁଳି ଚାଳନା ହୋଇଥିଲା। ଏବେ ପୁଣି ସୋମବାର ବିଳମ୍ବିତ ରାତ୍ରରେ ଏଭଳି ଘଟଣାର ପୁନରାବୃତ୍ତି ଘଟିଛି। କିଛି ଚାଇନା ସୈନ୍ୟ ପୂର୍ବ ଲଦାଖ ସେକ୍ଟରରେ ଭାରତୀୟ ଅନ୍ତର୍ଜାତୀୟ ସୀମା ଆଡ଼କୁ ଆସୁଥିଲେ। ଏହାକୁ ନେଇ ଭାରତୀୟ ଯବାନଙ୍କ ପକ୍ଷରୁ ସତର୍କ ସୂଚନା ଜାରି କରାଯାଇଥିଲା। ଭାରତୀୟ ଯବାନଙ୍କ ପକ୍ଷରୁ ଫାଙ୍କା ଗୁଳି ଚାଳନା କରାଯାଇଥିଲା। ଏହାର ଜବାବରେ ଚାଇନା ପକ୍ଷରୁ ଶୋପାଓ ମାଉଣ୍ଟେନ୍ ଟପ୍ରୁ ଭାରତୀୟ ପୋଷ୍ଟ ଆଡ଼କୁ ଗୁଳି ଚାଳନା କରାଯାଇଥିବା କୁହାଯାଉଛି। ଭାରତୀୟ ଯବାନଙ୍କ ପକ୍ଷରୁ ମଧ୍ୟ ପାଲଟା ଗୁଳି ଚାଳନା କରାଯାଇଥିଲା। ଦୁଇପକ୍ଷରୁ କାହାକୁ ଲକ୍ଷ୍ୟ କରି ଗୁଳି ଚାଳନା କରାଯାଇ ନ ଥିବା ଜଣାପଡ଼ିଛି। ପରେ ଚାଇନା ସୈନ୍ୟ ପଛକୁ ହଟି ଯାଇଥିଲେ। କିଛି ସମୟରେ ମଧ୍ୟରେ ସ୍ଥିତି ନିୟନ୍ତ୍ରଣକୁ ଆସିଥିବା କୁୁହାଯାଉଛି। ଲଦାଖର ଏଲ୍ଏସିରେ ଥିବା କଳା ଟପ୍, ହେଲମେଟ୍ ଟପ୍ ସମେତ ପେଙ୍ଗୋଙ୍ଗର କେତେକ ଅଞ୍ଚଳ ଭାରତର କବ୍ଜାରେ ରହିଛି। ଏହାକୁ ନେଇ ଚାଇନା ଉଦ୍ବେଗ ପ୍ରକାଶ କରୁଛି। ରଣନୀତି ଦୃଷ୍ଟିକୋଣରୁ ଏସବୁ ଅଞ୍ଚଳ ଭାରତ ପାଇଁ ବେଶ୍ ଗୁରୁତ୍ୱପୂର୍ଣ୍ଣ। ଦୁଇପକ୍ଷଙ୍କ ମଧ୍ୟରେ ଉତ୍ତେଜନା ପ୍ରକାଶ ପାଇବାପରେ ଏବେ କୂଟନୈତିକସ୍ତରରେ ସମସ୍ୟାର ସମାଧାନ ଲାଗି ଉଦ୍ୟମ ଜାରି ରହିଛି। ସୂଚନାଯୋଗ୍ୟ,ଗତ ୧୫ ଜୁନ୍ଠାରୁ ଏଲ୍ଏସିରେ ଦୁଇପକ୍ଷଙ୍କ ମଧ୍ୟରେ ହୋଇଥିବା ସଂଘର୍ଷରେ ୨୦ ଜଣ ଭାରତୀୟ ଯବାନ ଶହୀଦ୍ ହୋଇଥିଲେ। ଏହାପରେ ଭାରତ ସମେତ ବହୁ ଦେଶରେ ଚାଇନା ବିରୋଧରେ କଟକଣା ଆରମ୍ଭ ହୋଇଛି।
