ମାଞ୍ଚେଷ୍ଟର, ୩।୭(ପି.ଟି.): ଇଂଲଣ୍ଡ ବିପକ୍ଷ ପ୍ରଥମ କ୍ରିକେଟ ଟେଷ୍ଟ ପୂର୍ବରୁ ଓ୍ବେଷ୍ଟଇଣ୍ଡିଜ ଦଳ ସହ ଯୋଗ ଦେଇଛନ୍ତି କୋଚ୍ ଫିଲ୍ ସିମନ୍ସ। ସମ୍ପର୍କିୟଙ୍କ ଅନ୍ତ୍ୟେଷ୍ଟିକ୍ରିୟାରେ ଯୋଗ ଦେବାପରେ ସେ କ୍ୱାରାଣ୍ଟାଇନରେ ରହିଥିଲେ। କୋଭିଡ-୧୯ ଟେଷ୍ଟ ନେଗେଟିଭ୍ ଆସିବାପରେ ସେ ଗୁରୁବାର ଦଳରେ ପୁନଃ ଯୋଗ ଦେଇଛନ୍ତି ବୋଲି କ୍ରିକେଟ ଓ୍ବେଷ୍ଟଇଣ୍ଡିଜ ପକ୍ଷରୁ ପ୍ରକାଶ କରାଯାଇଛି। ପ୍ରଥମ ଟେଷ୍ଟ ପୂର୍ବରୁ ଏବେ ଓ୍ବେଷ୍ଟଇଣ୍ଡିଜ ଦଳର ୪ ଦିନିଆ ଓ୍ବାର୍ମଅପ୍ ଗେମ୍ ଚାଲିଛି। ସିମନ୍ସ ଓ୍ବାର୍ମଅପ୍ରେ ଖେଳାଳିଙ୍କ ପ୍ରଦର୍ଶନକୁ ଅନୁଧ୍ୟାନ କରିବା ସହ ଟେଷ୍ଟ ପାଇଁ ପ୍ରସ୍ତୁତ କରିବେ। ପ୍ରକାଶ ଯୋଗ୍ୟ ଯେ, ଜୈବ-ସୁରକ୍ଷିତ ଅଞ୍ଚଳରୁ ବାହାରକୁ ଯାଇ ଶ୍ୱଶୂରଙ୍କ ଅନ୍ତ୍ୟେଷ୍ଟିରେ ଯୋଗ ଦେଇଥିବାରୁ ସିମନ୍ସଙ୍କୁ କୋଚ୍ ପଦରୁ ବହିଷ୍କୃତ କରାଯାଉ ବୋଲି ବୋର୍ଡର ଜଣେ ସଦସ୍ୟ ଦାବି କରିଥିଲେ। ମାତ୍ର ୫୭ ବର୍ଷୀୟ ସିମନ୍ସଙ୍କୁ ବୋର୍ଡର ସମର୍ଥନ ମିଳିଥିଲା। ସେ ଅନୁମତି ନେଇ ବାହାରକୁ ଯାଇଥିଲେ ବୋଲି ଓ୍ବେଷ୍ଟଇଣ୍ଡିଜ ବୋର୍ଡ ସଭାପତି ରିକି ସ୍କେରିଟ ପ୍ରକାଶ କରିଥିଲେ। ଓ୍ବେଷ୍ଟଇଣ୍ଡିଜ ଦଳ ଏବେ ଇଂଲଣ୍ଡରେ ୨ ଦଳରେ ବିଭକ୍ତ ହୋଇ ଓ୍ବାର୍ମଅପ୍ ମ୍ୟାଚ ଖେଳିବା ସହ ନିଜକୁ ପ୍ରସ୍ତୁତ କରୁଛି। ଜୁଲାଇ ୮ରେ ସାଉଥାମ୍ପଟନଠାରେ ପ୍ରଥମ ଟେଷ୍ଟ ସହ ଅନ୍ତର୍ଜାତୀୟ କ୍ରିକେଟ ଆରମ୍ଭ ହେବ।
