ନୂଆଦିଲ୍ଲୀ,୧୧।୭: ଭାରତର ଟେଷ୍ଟ ଏବଂ ଏକଦିବସୀୟ ଅଧିନାୟକ ଶୁବମନ ଗିଲଙ୍କୁ ୱିମ୍ବଲଡନରେ ରୟାଲ ବକ୍ସରେ କିମ୍ବଦନ୍ତୀ ଭାରତୀୟ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର ଏବଂ ତାଙ୍କ ସ୍ତ୍ରୀ ଅଞ୍ଜଳିଙ୍କ ସହ ବସିଥିବାର ଦେଖାଯାଇଥିଲା। ଟେନିସ ମ୍ୟାଚ ଉପଭୋଗ କରୁଥିବା ତିନି ଜଣଙ୍କର ଏକ ଫଟୋ ସୋସିଆଲ ମିଡିଆରେ ଭାଇରାଲ ହେଉଛି। ଫଟୋକୁ ନେଇ ଅନେକ ଆଲୋଚନା ମଧ୍ୟ ହେଉଛି। ଫଟୋ ଦେଖି ଲୋକେ ଶ୍ୱଶୁର, ଶାଶୁ ଏବଂ ଜ୍ୱାଇଁ ଏକାଠି ବସିଥିବା କହୁଛନ୍ତି। ଗିଲ ତେନ୍ଦୁଲକରଙ୍କ ଝିଅ ସାରା ତେନ୍ଦୁଲକରଙ୍କୁ ଡେଟ କରୁଥିବା ପ୍ରାୟତଃ ଚର୍ଚ୍ଚା ହୋଇଥାଏ। କିନ୍ତୁ ଏହାର କୌଣସି ନିଶ୍ଚିତତା ନାହିଁ।
ଭାରତୀୟ ଦଳ ବର୍ତ୍ତମାନ ଇଂଲଣ୍ଡ ବିପକ୍ଷରେ ପାଞ୍ଚ ମ୍ୟାଚ ବିଶିଷ୍ଟ ଟି-୨୦ ସିରିଜ ଖେଳୁଛି। ସିରିଜର ଶେଷ ମ୍ୟାଚ ଆଜି ଖେଳାଯିବ ଏବଂ ଏହା ପରେ ୧୪ ଜୁଲାଇରୁ ତିନି ମ୍ୟାଚ ବିଶିଷ୍ଟ ଦିନିକିଆ ସିରିଜ ଆରମ୍ଭ ହେବ। ବିରାଟ କୋହଲି ଏବଂ ରୋହିତ ଶର୍ମାଙ୍କ ଭଳି କିମ୍ବଦନ୍ତୀ ଖେଳାଳି ଶୁବମନ ଗିଲଙ୍କ ଅଧିନାୟକତ୍ୱରେ ଏକଦିବସୀୟ ସିରିଜ ଖେଳିବେ।
ଏପର୍ଯ୍ୟନ୍ତ ତାଙ୍କ ଅନ୍ତର୍ଜାତୀୟ କ୍ୟାରିଅରରେ, ଗିଲ ୪୧ ଟେଷ୍ଟ, ୬୪ ଦିନିକିଆ ଏବଂ ୩୬ ଟି-୨୦ ଅନ୍ତର୍ଜାତୀୟ ଖେଳିଛନ୍ତି। ସେ ଟେଷ୍ଟରେ ୨୯୬୯ ରନ, ଏକଦିବସୀୟରେ ୩୧୯୧ ରନ ଏବଂ ଟି-୨୦ ଅନ୍ତର୍ଜାତୀୟରେ ୮୬୯ ରନ କରିଛନ୍ତି। ତିନୋଟି ଫର୍ମାଟରେ ସେ ୨୧ ଶତକ ଏବଂ ୨୯ ଅର୍ଦ୍ଧଶତକ ହାସଲ କରିଛନ୍ତି।
SACHIN × GILL AT WIMBLEDON 😍
– Two generations of Indian batting. pic.twitter.com/utSkSdd1Yj
— Johns. (@CricCrazyJohns) July 10, 2026
Dharitri – Odisha’s No.1 Odia Daily
