ଲକ୍ଷ୍ନୌ,୭।୧୦: ଶ୍ରେୟସ ଆୟରଙ୍କ ଧୂଆଁଧାର ଶତକ ବଳରେ ୱେଷ୍ଟଇଣ୍ଡିଜ ବିପକ୍ଷ ପ୍ରଥମ ଟି-୨୦ରେ ଭାରତ ୮ ଉଇକେଟରେ ବଡ଼ ବିଜୟ ହାସଲ କରିଛି। ଲକ୍ଷ୍ନୌର ଏକାନା ଷ୍ଟାଡିୟମରେ ୱେଷ୍ଟଇଣ୍ଡିଜ ପ୍ରଥମେ ବ୍ୟାଟିଂ କରି ୧୭୧ ରନ କରିଥିବା ବେଳେ ଭାରତ ମାତ୍ର ୧୪.୪ ଓଭରରେ ଲକ୍ଷ୍ୟ ହାସଲ କରିନେଇଥିଲା। ୱେଷ୍ଟଇଣ୍ଡିଜ ପକ୍ଷରୁ ଶାଇ ହୋପ ୫୨ ଏବଂ ଶେରଫେନ ରଦରଫୋର୍ଡ ୫୬ ରନ କରି ଅର୍ଦ୍ଧଶତକ ହାସଲ କରିଥିଲେ। ଫଳରେ ଦଳ ୧୭୧ ରନର ଚ୍ୟାଲେଞ୍ଜିଂ ସ୍କୋର ଛିଡ଼ା କରିଥିଲା।
୧୭୨ ରନର ଲକ୍ଷ୍ୟ ପିଛା କରିବାକୁ ଯାଇ ଭାରତର ଆରମ୍ଭ ଭଲ ହୋଇ ନ ଥିଲା। ସଞ୍ଜୁ ସାମସନ ୧୧ ଏବଂ ଅଭିଷେକ ଶର୍ମା ୨୧ ରନ କରି ଆଉଟ ହୋଇଥିଲେ। ମାତ୍ର ୩୫ ରନରେ ଦୁଇ ଓପନରଙ୍କୁ ହରାଇଥିଲା ଭାରତ। ଏହାପରେ କ୍ରିଜକୁ ଆସିଥିବା ଅଧିନାୟକ ଶ୍ରେୟସ ଅୟର ଇଶାନ କିଶନଙ୍କ ସହ ମିଶି ଇନିଂସକୁ ସମ୍ଭାଳିଥିଲେ। ଦୁହେଁ ମିଶି ଆଉ କୌଣସି ଉଇକେଟ ପଡ଼ିବାକୁ ଦେଇ ନ ଥିଲେ। ଶ୍ରେୟସ ମାତ୍ର ୪୩ ବଲରେ ୬ ଛକା ଓ ୧୦ ଚୌକା ସହ ଅପରାଜିତ ୧୦୨ ରନ କରିଥିଲେ। ଅନ୍ୟପଟେ ଇଶାନ କିଶନ ୩୭ ରନ କରି ଅପରାଜିତ ରହିଥିଲେ।
ଏହି ଶତକ ସହ ଶ୍ରେୟସ ଏକ ବଡ଼ ରେକର୍ଡ ନିଜ ନାମରେ କରିଛନ୍ତି। ଅନ୍ତର୍ଜାତୀୟ ଟି-୨୦ରେ ସଫଳ ରନ ଚେଜ୍ରେ ସର୍ବାଧିକ ବ୍ୟକ୍ତିଗତ ସ୍କୋର କରିଥିବା ଭାରତୀୟ ବ୍ୟାଟର ହୋଇଛନ୍ତି ଅୟର। ଏହା ପୂର୍ବରୁ ଏହି ରେକର୍ଡ ୧୦୧ ରନ୍ର ପାଳି ସହ କେଏଲ ରାହୁଲଙ୍କ ନାମରେ ଥିଲା।
ଶ୍ରେୟସ ଅୟର ୱେଷ୍ଟଇଣ୍ଡିଜ ବିପକ୍ଷରେ ଅନ୍ତର୍ଜାତୀୟ ଟି-୨୦ରେ ଦ୍ରୁତତମ ଶତକ ହାସଲ କରିଥିବା ଭାରତୀୟ ବ୍ୟାଟର ହୋଇଛନ୍ତି। ସେ ମାତ୍ର ୪୨ ବଲରେ ଶତକ ପୂରଣ କରିଥିଲେ। ଏହି ଶତକ ସହ ଅୟର ଆଉ ଏକ ବିଶେଷ ତାଲିକାରେ ସାମିଲ ହୋଇଛନ୍ତି। ଭାରତୀୟ ଅଧିନାୟକ ଭାବେ ଅନ୍ତର୍ଜାତୀୟ ଟି-୨୦ରେ ଶତକ ହାସଲ କରିଥିବା ସେ ତୃତୀୟ ଖେଳାଳି। ତାଙ୍କ ପୂର୍ବରୁ ରୋହିତ ଶର୍ମା ଓ ସୂର୍ଯ୍ୟକୁମାର ଯାଦବ ଅଧିନାୟକ ଭାବେ ଟି-୨୦ରେ ଶତକ ହାସଲ କରିଥିଲେ।
ଶ୍ରେୟସଙ୍କ ନାମରେ ଆଉ ଏକ ବଡ଼ ରେକର୍ଡ ଯୋଡ଼ିଛି। ଅନ୍ତର୍ଜାତୀୟ ଟି-୨୦ରେ ଲକ୍ଷ୍ୟ ପିଛା କରୁଥିବା ବେଳେ ଶତକ ହାସଲ କରିଥିବା ସେ ପ୍ରଥମ ଭାରତୀୟ ଅଧିନାୟକ ହୋଇଛନ୍ତି। ଏହା ପୂର୍ବରୁ ରନ ଚେଜ୍ରେ ଭାରତୀୟ ଅଧିନାୟକଙ୍କ ସର୍ବାଧିକ ବ୍ୟକ୍ତିଗତ ସ୍କୋର ୯୪ ରନ ଥିଲା। ୨୦୧୯ରେ ୱେଷ୍ଟଇଣ୍ଡିଜ ବିପକ୍ଷରେ ବିରାଟ କୋହଲି ଏହି ଇନିଂସ ଖେଳିଥିଲେ। ଶ୍ରେୟସଙ୍କ ଅପରାଜିତ ୧୦୨ ରନ୍ର ବିସ୍ଫୋରକ ଇନିଂସ ଭାରତକୁ ଦ୍ରୁତ ରନ ଚେଜ ସହ ବଡ଼ ବିଜୟ ଦେଇଥିବା ବେଳେ ତାଙ୍କ ନାମରେ ଏକାଧିକ ରେକର୍ଡ ମଧ୍ୟ ଯୋଡ଼ି ହୋଇଛି।
Dharitri – Odisha’s No.1 Odia Daily
