ଲକ୍ଷ୍ନୌ,୫।୮: ଉତ୍ତର ପ୍ରଦେଶର ଲଲିତପୁର ଜିଲାରୁ ସାମ୍ନାକୁ ଆସିଛି ଭକ୍ତି, ସେବା ଓ ସଂସ୍କାରର ଏକ ପ୍ରେରଣାଦାୟକ ଚିତ୍ର । ବାର କସ୍ବାର ମୋତିଖେଡ଼ା ଗ୍ରାମର ବାସିନ୍ଦା ଖୁସୀରାମ ପାଲ ନିଜ ବୃଦ୍ଧ ମାତା-ପିତାଙ୍କୁ ପାଲିଙ୍କିରେ ବସାଇ ପ୍ରାୟ ୧୫ କିଲୋମିଟର ପାଦରେ ଚାଲି ପ୍ରସିଦ୍ଧ ଝୁମରନାଥ ଧାମରେ ଭଗବାନ ଭୋଳେନାଥଙ୍କ ଦର୍ଶନ କରାଇଛନ୍ତି । ତାଙ୍କର ଏହି ଅନନ୍ୟ ସେବାଭାବ ପୌରାଣିକ ଶ୍ରବଣ କୁମାରଙ୍କ କାହାଣୀକୁ ପୁଣିଥରେ ମନେ ପକାଇଦେଇଛି ।
ଶ୍ରାବଣ ମାସ ଅବସରରେ ମାରୁତୀଧାମ, ମୋତିଖେଡ଼ାରୁ ଏହି ଯାତ୍ରା ଆରମ୍ଭ ହୋଇଥିଲା। ଯାତ୍ରା ପୂର୍ବରୁ ଖୁସୀରାମ ନିଜ ମାତା-ପିତାଙ୍କୁ ନୂଆ ବସ୍ତ୍ର ପିନ୍ଧାଇଥିଲେ। ପରେ ସେମାନଙ୍କୁ ଅଲଗା ଅଲଗା ପାଲିଙ୍କିରେ ବସାଇ ନିଜ କାନ୍ଧରେ ବୋହି ଯାତ୍ରା ଆରମ୍ଭ କରିଥିଲେ। ଯାତ୍ରା ସମୟରେ ଆଗରେ ଢୋଲ-ନଗଡ଼ା ବାଜୁଥିବା ବେଳେ ପଛରେ ବହୁ ସଂଖ୍ୟକ ଗ୍ରାମବାସୀ ‘ହର ହର ମହାଦେବ’ ଧ୍ୱନି ଦେଇ ସାମିଲ ହୋଇଥିଲେ। ସମଗ୍ର ରାସ୍ତାରେ ଭକ୍ତି ଓ ଉତ୍ସାହର ପରିବେଶ ଦେଖିବାକୁ ମିଳିଥିଲା।
ଖୁସୀରାମ ପାଲ କହିଛନ୍ତି, ତାଙ୍କ ପାଇଁ ମାତା-ପିତା ହିଁ ସାକ୍ଷାତ ଭଗବାନ। ଦୀର୍ଘ ଦିନ ଧରି ସେ ନିଜ କାନ୍ଧରେ ବୋହି ମାତା-ପିତାଙ୍କୁ ଝୁମରନାଥ ଧାମରେ ଭଗବାନ ଶିବଙ୍କ ଦର୍ଶନ କରାଇବାକୁ ଇଚ୍ଛା ରଖିଥିଲେ। ଶ୍ରାବଣ ମାସରେ ତାଙ୍କର ଏହି ଇଚ୍ଛା ପୂରଣ ହୋଇଛି।ବିଭିନ୍ନ ସ୍ଥାନରେ ତାଙ୍କୁ ଗ୍ରାମବାସୀମାନେ ଯାତ୍ରାକୁ ସ୍ୱାଗତ କରିଥିଲେ। ସୋସିଆଲ ମିଡିଆରେ ମଧ୍ୟ ଏହି ଘଟଣା ବେଶ ଚର୍ଚ୍ଚାର ବିଷୟ ପାଲଟିଥିବା ବେଳେ ଖୁସୀରାମଙ୍କ ସେବାଭାବକୁ ସମସ୍ତେ ପ୍ରଶଂସା କରୁଛନ୍ତି।
ଏବେ ପବିତ୍ର ଶ୍ରାବଣ ମାସ ଚାଲିଥିବାରୁ ସାରା ଦେଶରେ ଶିବଭକ୍ତଙ୍କ ଭିଡ଼ ଦେଖିବାକୁ ମିଳୁଛି। ଭକ୍ତମାନେ ଗଙ୍ଗାଜଳ ଆଣି ଭଗବାନ ଶିବଙ୍କ ଜଳାଭିଷେକ କରୁଛନ୍ତି। କାଉଡ଼ିଆଙ୍କ ଭକ୍ତିମୟ ଯାତ୍ରାରେ ପରିବେଶ ଉତ୍ସବମୁଖର ହୋଇଉଠିଛି। ଶ୍ରାବଣର ଦ୍ୱିତୀୟ ସୋମବାର ୧୦ ଅଗଷ୍ଟରେ ପଡ଼ୁଥିବା ବେଳେ ୧୧ ଅଗଷ୍ଟ, ମଙ୍ଗଳବାର ଶିବରାତ୍ରି ପାଳନ କରାଯିବ । ସେହି ଦିନ ମଧ୍ୟ ବହୁ ସଂଖ୍ୟାରେ ଶିବଭକ୍ତଙ୍କ ସମାଗମ ହେବ ବୋଲି ଆଶା କରାଯାଉଛି ।
