ଇସଲାମାବାଦ,୮।୧୧: ଦେଶ ତଥା ସମଗ୍ର ବିଶ୍ୱରେ ଦୀପାବଳି ପର୍ବ ଅତ୍ୟନ୍ତ ଉତ୍ସାହର ସହ ପାଳନ କରାଯାଉଛି। ଆମର ପଡ଼ୋଶୀ ଦେଶର ପ୍ରଧାନମନ୍ତ୍ରୀ ଶେହବାଜ ସରିଫ ଦୀପାବଳି ଅବସରରେ ଶୁଭେଚ୍ଛା ଜଣାଇଛନ୍ତି। ‘ଏକ୍ସ’ (X) ରେ ଏକ ପୋଷ୍ଟ ମାଧ୍ୟମରେ, ପାକିସ୍ତାନ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ ସରିଫଙ୍କ ବାର୍ତ୍ତା ଉଦ୍ଧୃତ କରି କହିଛି: ‘ଦୀପାବଳିର ଏହି ଆନନ୍ଦଦାୟକ ଓ ଶୁଭ ଅବସରରେ, ମୁଁ ବିଶ୍ୱବ୍ୟାପୀ ହିନ୍ଦୁ ସମ୍ପ୍ରଦାୟକୁ ଏବଂ ବିଶେଷ ଭାବରେ ପାକିସ୍ତାନରେ ବସବାସ କରୁଥିବା ହିନ୍ଦୁ ସମ୍ପ୍ରଦାୟକୁ ହୃଦୟର ସହିତ ଅଭିନନ୍ଦନ ଓ ଶୁଭେଚ୍ଛା ଜଣାଉଛି।’
ସେ ଆହୁରି ମଧ୍ୟ ଲେଖିଛନ୍ତି ଯେ, ଦୀପାବଳି ଘୃଣା, ଅସହିଷ୍ଣୁତା ଏବଂ ନିରାଶାର ଅନ୍ଧକାର ଉପରେ ଆଲୋକର ବିଜୟକୁ ପ୍ରତିପାଦିତ କରେ। ଆଲୋକର ଏହି ପର୍ବ ମାନବୀୟ ସମ୍ପର୍କ ଏବଂ ସାମାଜିକ ଜୀବନରେ ଶାନ୍ତିପୂର୍ଣ୍ଣ ସହ-ଅସ୍ତିତ୍ୱକୁ ପ୍ରୋତ୍ସାହିତ କରିବାର ଏକ ଗଭୀର ବାର୍ତ୍ତା ପ୍ରଦାନ କରେ। ଏକ ଉଜ୍ଜ୍ୱଳ, ସମୃଦ୍ଧ ଏବଂ ଆଶାପୂର୍ଣ୍ଣ ଭବିଷ୍ୟତ ଉପରେ ଅଟଳ ବିଶ୍ୱାସ ରଖିବା ଦୀପାବଳିର ଅନ୍ୟତମ ଗୁରୁତ୍ୱପୂର୍ଣ୍ଣ ଦିଗ ଅଟେ।
ଶେହବାଜ ସରିଫ କହିଛନ୍ତି ଯେ ପାକିସ୍ତାନର ହିନ୍ଦୁ ସମ୍ପ୍ରଦାୟ ଆମ ଦେଶର ଏକ ଗୁରୁତ୍ୱପୂର୍ଣ୍ଣ ଏବଂ ଅବିଚ୍ଛେଦ୍ୟ ଅଙ୍ଗ। ଆମ ଦେଶର ସାମାଜିକ, ସାଂସ୍କୃତିକ ଏବଂ ଅର୍ଥନୈତିକ ବିକାଶରେ ସେମାନଙ୍କର ଅମୂଲ୍ୟ ଅବଦାନକୁ ଯେତେ ପ୍ରଶଂସା କଲେ ମଧ୍ୟ କମ ହେବ। ଆମ ସମାଜରେ ବିଦ୍ୟମାନ ବିଭିନ୍ନ ସାଂସ୍କୃତିକ ଓ ଧାର୍ମିକ ପରମ୍ପରା ଏକ ମୂଲ୍ୟବାନ ସାମାଜିକ ଐତିହ୍ୟ ଗଠନ କରେ। ପାକିସ୍ତାନ ନିଜର ଧାର୍ମିକ ଏବଂ ସାଂସ୍କୃତିକ ବିବିଧତାକୁ ନେଇ ଗର୍ବ ଅନୁଭବ କରେ।
ପାକିସ୍ତାନ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (PMO) ପକ୍ଷରୁ ଜାରି ଏକ ବାର୍ତ୍ତାରେ ଉଲ୍ଲେଖ କରାଯାଇଛି ଯେ, ପାକିସ୍ତାନର ସମ୍ବିଧାନ ସଂଖ୍ୟାଲଘୁ ସମ୍ପ୍ରଦାୟର ଧାର୍ମିକ ଏବଂ ନାଗରିକ ଅଧିକାରର ସୁରକ୍ଷା ପାଇଁ ଗ୍ୟାରେଣ୍ଟି ପ୍ରଦାନ କରେ। ଧର୍ମ, ବିଶ୍ୱାସ, ବର୍ଣ୍ଣ କିମ୍ବା ଜାତିଗତ ପରିଚୟ ନିର୍ବିଶେଷରେ, ସମସ୍ତ ନାଗରିକଙ୍କ ଅଧିକାର, ମର୍ଯ୍ୟାଦା ଏବଂ ଧାର୍ମିକ ସ୍ବାଧୀନତାକୁ ସୁରକ୍ଷିତ ରଖିବା ପାଇଁ ସରକାର ସମ୍ପୂର୍ଣ୍ଣ ପ୍ରତିଶ୍ରୁତିବଦ୍ଧ। ଧାର୍ମିକ ସଦ୍ଭାବନା, ପାରସ୍ପରିକ ଏକତା ଏବଂ ପରସ୍ପର ପ୍ରତି ସମ୍ମାନ ବୃଦ୍ଧି କରିବା ଆମ ସମସ୍ତଙ୍କର ମିଳିତ ଦାୟିତ୍ୱ।
ଉକ୍ତ ବାର୍ତ୍ତାରେ ଆହୁରି ମଧ୍ୟ କୁହାଯାଇଛି ଯେ, ଏକ ଶାନ୍ତିପୂର୍ଣ୍ଣ, ଅନ୍ତର୍ଭୁକ୍ତିମୂଳକ ଏବଂ ସମୃଦ୍ଧ ରାଷ୍ଟ୍ର ଗଠନ କରିବା ଆମ ସମସ୍ତଙ୍କର ସାମୂହିକ ସଂକଳ୍ପ ଅଟେ। ଏପରି ଏକ ସମାଜ ଯାହା ବିଭିନ୍ନ ସଂସ୍କୃତି ଓ ପରମ୍ପରାକୁ ଆପଣାଇଥାଏ, ଶାନ୍ତିପୂର୍ଣ୍ଣ ସହ-ଅସ୍ତିତ୍ୱର ନୀତିକୁ ପାଳନ କରେ ଏବଂ ନିଜର ସମସ୍ତ ନାଗରିକଙ୍କ ପାଇଁ ଶିକ୍ଷାଗତ ଓ ଅର୍ଥନୈତିକ କ୍ଷେତ୍ରରେ ସମାନ ସୁଯୋଗ ସୁନିଶ୍ଚିତ କରେ।
ଏହି ପୋଷ୍ଟରେ କୁହାଯାଇଛି ଯେ, ଏହି ବିଶେଷ ଅବସରରେ ଆସନ୍ତୁ ବିଭିନ୍ନ ଧର୍ମ ମଧ୍ୟରେ ସଦ୍ଭାବନାକୁ ପ୍ରୋତ୍ସାହିତ କରିବା, ଭ୍ରାତୃତ୍ୱର ବନ୍ଧନକୁ ସୁଦୃଢ଼ କରିବା ଏବଂ ଶାନ୍ତି, ସହନଶୀଳତା ତଥା ପାରସ୍ପରିକ ବୁଝାମଣା ଉପରେ ଆଧାରିତ ଏକ ଉଜ୍ଜ୍ୱଳ ଭବିଷ୍ୟତ ଗଢ଼ିବା ପାଇଁ ମିଳିମିଶି କାର୍ଯ୍ୟ କରିବାର ନିଜ ସାମୂହିକ ସଂକଳ୍ପକୁ ପୁନଃ ଦୃଢ଼ କରିବା। ମୁଁ ଆଶା କରେ ଯେ, ଦୀପାବଳି ପାଳନ କରୁଥିବା ସମସ୍ତ ପାକିସ୍ତାନୀ ହିନ୍ଦୁମାନେ ଏହି ଆନନ୍ଦମୟ ପର୍ବର ଉତ୍ସାହପୂର୍ଣ୍ଣ ପରମ୍ପରାଗୁଡ଼ିକୁ ମନଭରି ଉପଭୋଗ କରିବେ ଏବଂ ସମାଜରେ ଶାନ୍ତି, ସଦ୍ଭାବନା, ଖୁସି, ସମୃଦ୍ଧି ଓ ଆଶାର ବାର୍ତ୍ତା ପ୍ରସାରିତ କରିବେ।
