ମୁମ୍ବାଇ,୧୧।୧୦ : ନିର୍ବାଚନ ଆୟୋଗ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ଦଳକୁ ବାଲାସାହେବଚି ଶିବସେନା ନାମ ଦେଇଥିଲେ। ମଙ୍ଗଳବାର ଦଳର ନିର୍ବାଚନୀ ଚିହ୍ନ ଭାବେ ଦୁଇଟି ଖଣ୍ଡା ସହ ଢାଲ ପ୍ରଦାନ କରିଛନ୍ତି। ମହାରାଷ୍ଟ୍ରର ଅନ୍ଧେରୀ ଉପନିର୍ବାଚନରେ ଶିନ୍ଦେ ଏବଂ ଉଦ୍ଧବ ଠାକରେ ଗୋଷ୍ଠୀଙ୍କୁ ଭିନ୍ନ ଚିହ୍ନ ଏବଂ ଦଳୀୟ ନାମ ପ୍ରଦାନ କରାଯାଇଛି।
ଯଦି ଦଳ ନଭେମ୍ବର ୩ରେ ହେବାକୁ ଥିବା ଅନ୍ଧେରୀ ପୂର୍ବ ବିଧାନସଭା ଆସନରେ ପ୍ରତିଦ୍ୱନ୍ଦ୍ୱିତା କରିବାକୁ ନିଷ୍ପତ୍ତି ନିଏ, ତେବେ ଚିହ୍ନକୁ ବ୍ୟବହାର କରିପାରିବ। ମହାରାଷ୍ଟ୍ର ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କୁ ଏକ ଚିଠିରେ ଆୟୋଗ ଏହି ସୂଚନା ଦେଇଛନ୍ତି।
ଏକ ନିରପେକ୍ଷ ନିର୍ବାଚନ ଚିହ୍ନ ଭାବରେ ଏହାକୁ ଘୋଷଣା କରିବାକୁ ନିଷ୍ପତ୍ତି ନେଇଥିବା ଆୟୋଗ କହିଛନ୍ତି। ଶିନ୍ଦେ ଦଳ ନିର୍ବାଚନ ଚିହ୍ନ ପାଇଁ ବିକଳ୍ପ ଭାବରେ ପିପଲ ଗଛ, ଦୁଇଖଣ୍ଡା ସହିତ ଢାଲ ଏବଂ ସୂର୍ଯ୍ୟ ବିଷୟରେ ଉଲ୍ଲେଖ କରିଥିଲେ।
