ନୂଆଦିଲ୍ଲୀ,୩।୧୦: କଂଗ୍ରେସ ଅଧ୍ୟକ୍ଷ ପ୍ରାର୍ଥୀ ଶଶି ଥରୁର ଏବେ ପ୍ରଚାରରେ ବ୍ୟସ୍ତ ଅଛନ୍ତି। ସୋମବାର ସେ ତାଙ୍କ ପ୍ରତିଦ୍ୱନ୍ଦ୍ୱୀ ମଲ୍ଲିକାର୍ଜୁନ ଖାର୍ଗେଙ୍କ ସହ ସହମତ ହୋଇ କହିଛନ୍ତି,ଉଭୟ ପରସ୍ପର ସହ ନୁହେଁ ବରଂ ଭାରତୀୟ ଜନତା ପାର୍ଟି (ଭାଜପା) ସହିତ ଲଢିବାକୁ ପଡିବ। ଶଶି ଥରୁର ଟୁଇଟ୍ କରି ଲେଖିଛନ୍ତି, ମୁଁ ଖାର୍ଗେ ଜିଙ୍କ ସହ ଏକମତ ଯେ, କଂଗ୍ରେସର ସମସ୍ତ ଲୋକ ପରସ୍ପର ବଦଳରେ ଭାଜପା ସହିତ ପ୍ରତିଦ୍ୱନ୍ଦ୍ୱିତା କରିବା ଉଚିତ୍। ଆମ ମଧ୍ୟରେ କୌଣସି ଆଦର୍ଶଗତ ପାର୍ଥକ୍ୟ ନାହିଁ।
ଥରୁର କଂଗ୍ରେସର ଅସନ୍ତୁଷ୍ଟ ନେତାଙ୍କ ଗୋଷ୍ଠୀ ‘ଜି-୨୩’କୁ ନେଇ ଚର୍ଚ୍ଚା କରିଛନ୍ତି। ସେ ମଧ୍ୟ ଏହି ଗୋଷ୍ଠୀର ସତ୍ୟତାକୁ ପ୍ରକାଶ କରି କହିଥିଲେ ଯେ, ସେପରି କିଛି ନାହିଁ ଏବଂ ଏହା ଗଣମାଧ୍ୟମ ଦ୍ୱାରା ପ୍ରସ୍ତୁତ ଏକ କାହାଣୀ। ଏହି ଗୋଷ୍ଠୀ କଂଗ୍ରେସ ଅଧ୍ୟକ୍ଷ ସୋନିଆ ଗାନ୍ଧୀଙ୍କୁ ଏକ ଚିଠି ଲେଖି ଦଳରେ ସଂସ୍କାର ଆଣିବାକୁ କହିଥିଲେ।
କଂଗ୍ରେସ ଅଧ୍ୟକ୍ଷ ନିର୍ବାଚନ ପାଇଁ ନାମାଙ୍କନ ପ୍ରକ୍ରିୟା ଶେଷ ହୋଇଛି। ବର୍ତ୍ତମାନ ନାମାଙ୍କନ ପ୍ରତ୍ୟାହାର ପାଇଁ ଅକ୍ଟୋବର ୮ ହେଉଛି ଶେଷ ତାରିଖ। ଏକରୁ ଅଧିକ ପ୍ରାର୍ଥୀ ହେଲେ ଅକ୍ଟୋବର ୧୭ରେ ନିର୍ବାଚନ ହେବ ଏବଂ ୧୯ରେ ଫଳାଫଳ ଆସିବ।
