ବରଗଡ଼ ଅଫିସ,୨୯।୮: ବରଗଡ଼ ଜିଲା ଅତାବିରା ଥାନା ପୋଲିସ ସୋମବାର ବ୍ରାଉନ ସୁଗର ଜବତ କରିବା ସହ ୩ଜଣଙ୍କୁ ଗିରଫ କରିଛି। ଗିରଫ ଅଭିଯୁକ୍ତମାନେ ହେଲେ, ବରଗଡ଼ ପୌର ପରିଷଦ ଅଧୀନ ମାଲପଡାର ଅମଜଦ ଖାନ(୩୦), ଅଜୟ ପଟେଲ(୨୫), ପ୍ରଧାନ ପଡାର ମହମ୍ମଦ ଅଲତାବ (୨୫) । ସେମାନଙ୍କ ପାଖରୁ ୧୦୯.୫ ଗ୍ରାମ ବ୍ରାଉନ ସୁଗର, ବ୍ୟବହୃତ ୟାମାହା ବାଇକ (ନଂ-ଓଡି ୧୭ଜି ୪୩୪୦), ୨ଟି ମୋବାଇଲ ଏବଂ ନଗଦ ୧୧୫୦ ଟଙ୍କା ଜବତ ହୋଇଛି । ଏ ନେଇ ଅତାବିରା ଥାନାରେ ଏକ ମାମଲା (ନଂ-୨୯୯) ରୁଜୁ ହୋଇଛି। ବରଗଡ ଜିଲା ପୋଲିସ ମୁଖ୍ୟାଳୟ ସମ୍ମିଳନୀ କକ୍ଷରେ ସୋମବାର ଅନୁଷ୍ଠିତ ଏକ ଖବରଦାତା ସମ୍ମିଳନୀରେ ଏସପି ସ୍ମିତ ପି. ପରମାର୍ ସୂଚନା ଦେଇ କହିଥିଲେ, ଗିରଫ ଅଭିଯୁକ୍ତମାନେ ଜବତ ବାଇକ୍ ଯୋଗେ ସମ୍ବଲପୁରରୁ ବରଗଡ଼କୁ ବ୍ରାଉନ ସୁଗର ଧରି ଆସୁଥିବା ନେଇ ପୋଲିସକୁ ସୂଚନା ମିଳିଥିଲା। ସେହି ସୂଚନାକୁ ଆଧାର କରି ଅତାବିରା ଥାନା ଆଇଆଇସି ଅନିଲ କୁମାର ପ୍ରଧାନଙ୍କ ନେତୃତ୍ୱରେ ଏକ ଟିମ୍ ସେଥିପ୍ରତି ନଜର ରଖିଥିଲା। ଅଭିଯୁକ୍ତମାନେ ଚକୁଳି ଫାର୍ମ ଛକକୁ ପହଞ୍ଚିବା ପରେ ପୋଲିସ ସେମାନଙ୍କୁ ଗିରଫ କରିଥିଲା। ଗିରଫ ଅଭିଯୁକ୍ତ ମାନଙ୍କୁ କୋର୍ଟ ଚାଲାଣ କରାଯାଇଛି। ଗିରଫ ଅଭିଯୁକ୍ତ ମାନଙ୍କ ବିରୋଧରେ ବରଗଡ ଟାଉନ ଥାନାରେ ପୂର୍ବରୁ ମାମଲା ରୁଜୁ ହୋଇଥିବା ତଦନ୍ତରୁ ଜଣାପଡିଛି ବୋଲି ଏସପି କହିଥିଲେ। ସେହିପରି ଜିଲାରେ ବେଆଇନ ନିଶା କାରବାର ଉପରେ ପୋଲିସ ସତର୍କ ଦୃଷ୍ଟି ରଖିଛି ଏବଂ ଏଭଳି କାରବାର ନେଇ କୌଣସି ସୂଚନା ପାଇଲେ ପୋଲିସକୁ ତୁରନ୍ତ ସୂଚନା ଦେବା ପାଇଁ ଏସ୍ପି ପରମାର୍ ପରାମର୍ଶ ଦେଇଛନ୍ତି।
