ସମଗ୍ର ବିଶ୍ୱ କରୋନା ବିରୋଧରେ ଯୁଦ୍ଧ କରୁଛି। ଦିନକୁ ଦିନ ଅବସ୍ଥା ଅଧିକ ଜଟିଳ ହେବାରେ ଲାଗିଛି। କରୋନା ସଂକ୍ରମିତଙ୍କ ସହ ମୃତ୍ୟୁ ସଂଖ୍ୟା ମଧ୍ୟ ଦ୍ରୁତ ଗତିରେ ବଢ଼ିଚାଲିଛି। କିଛି ମାସର ଲକ୍ଡାଉନ୍ ପରେ ଏବେ ଧୀରେ ଧୀରେ ସବୁ ଖୋଲିବାକୁ ଲାଗିଲାଣି। ତେବେ କିଛିଦିନ ପୂର୍ବେ ଅଷ୍ଟ୍ରେଲିୟାରେ କରୋନା ସଂକ୍ରମିତଙ୍କ ସଂଖ୍ୟା ପ୍ରାୟ ଶେଷ ହୋଇଯାଇଥିଲା। ଆଉ ପଜିଟିଭ ବାହାରୁ ନ ଥିଲା। କିନ୍ତୁ ହଠାତ୍ ଦେଶରେ କରୋନା ପଜିଟିଭଙ୍କ ସଂଖ୍ୟା ବଢ଼ିବାକୁ ଲାଗିଲା। ଯାହାଫଳରେ ଅଷ୍ଟ୍ରେଲିୟାର ଭିକ୍ଟୋରିଆ ସହରକୁ ପୁଣିଥରେ ଲକ୍ଡାଉନ୍ କରିବାକୁ ପଡ଼ିଲା। ଏଠାକୁ ବାହାରୁ ଆସୁଥିବା ପର୍ଯ୍ୟଟକଙ୍କ ପାଇଁ ଫାଇଭ୍ଷ୍ଟାର କ୍ୱାରାଣ୍ଟାଇନ ସେଣ୍ଟର ତିଆରି ହୋଇଛି। ତେବେ ଏଠାରେ ଥିବା ସିକ୍ୟୁରିଟି ଗାର୍ଡଙ୍କ ପାଇଁ ପୁଣିଥରେ କରୋନା ବ୍ୟାପିଥିବା ଜଣାପଡ଼ିଛି। କ୍ୱାରାଣ୍ଟାଇନ୍ ସେଣ୍ଟରରେ ରହୁଥିବା ଗେଷ୍ଟମାନଙ୍କ ସହ ଉକ୍ତ ଗାର୍ଡମାନେ ଖରାପ ସମ୍ପର୍କ ରଖୁଥିଲେ। ପରେ ଘରକୁ ଯାଉ ପରିବାର ସହ ଅନ୍ୟ ସମସ୍ତଙ୍କ ସହ ମିଳାମିଶା କରୁଥିଲେ। ଫଳରେ କରୋନା ଚାରିଆଡେ ବ୍ୟାପିବାକୁ ଲାଗିଲା। ତେବେ ହଠାତ୍ କରୋନା ବ୍ୟାପିବାର କାରଣ ବିଷୟରେ ଯାଞ୍ଚ କରାଯିବାରୁ ସମସ୍ତ ଘଟଣା ସମ୍ମୁଖକୁ ଆସିଲା। ପରେଟେଷ୍ଟ କରିବା ପରେ କ୍ୱାରାଣ୍ଟାଇନ ସେଣ୍ଟରର ସମସ୍ତ ଗାର୍ଟ ପଜିଟିଭ ବୋଲି ଜଣାପଡ଼ିଲା। ମାର୍ଚ୍ଚ ୨୯ରୁ ବର୍ତ୍ତମାନ ପର୍ଯ୍ୟନ୍ତ ଏହି କ୍ୱାରାଣ୍ଟାଇନ ସେଣ୍ଟରରେ ୨୦ ହଜାରରୁ ଊର୍ଦ୍ଧ୍ୱ ଗେଷ୍ଟ ରହୁଥିବା ଜଣାପଡ଼ିଛି। ଉକ୍ତ ଗାର୍ଡମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ ବୋଲି ଜଣାପଡ଼ିଛି।
