ଛେଣ୍ଡିପଦା,୨୫।୬(ସ୍ବ.ପ୍ର.) ବର୍ଷ ବର୍ଷ ଧରି ଯେଉଁ ଆଉଁଳୀ ପ୍ରକଳ୍ପ ପାଣିରେ ହଜାର ହଜାର ହେକ୍ଟର ଜମିରେ ଫସଲ ହେଉଥିଲା ତାହା ଉପରୁ ଚାଷୀ ଏବେ ଭରସା ତୁଟାଇବାକୁ ବସିଲେଣି। କାରଣ ଉକ୍ତ ପ୍ରକଳ୍ପରୁ ବାହାରିଥିବା କେନାଲର ବିଭିନ୍ନ ଶାଖା କେନାଲ ପୋତି ହୋଇପଡ଼ିଲାଣି। ଏ ନେଇ ଚାଷୀମାନେ ବାରମ୍ବାର କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରୁଥିଲେ ମଧ୍ୟ ପୁନରୁଦ୍ଧାର କିମ୍ବା ମରାମତି ଦିଗରେ ଧ୍ୟାନ ଦିଆଯାଉ ନାହିଁ। ଫଳରେ ଆଉଁଳୀ ପାଣି ଏବେ ଚାଷକୁ ନିଅଣ୍ଟ ପଡ଼ୁଥିବା ଚାଷୀମାନେ ଅଭିଯୋଗ କରୁଛନ୍ତି।
୧୯୬୪ ମସିହାରେ ଅନୁଗୋଳ ଜିଲା ଛେଣ୍ଡିପଦା ବ୍ଲକ କଣଲୋଇ ପଞ୍ଚାୟତରେ ଆଉଁଳୀ ଜଳସେଚନ ପ୍ରକଳ୍ପ ନିର୍ମାଣ କରାଯାଇଥିଲା। ଏହି ପ୍ରକଳ୍ପରୁ ଦୀର୍ଘ ୩୦ କିଲୋମିଟରରୁ ଊର୍ଦ୍ଧ୍ୱ କେନାଲ ନିର୍ମାଣ କରାଯିବା ସହିତ ୪ଟି ପାଣି ପଞ୍ଚାୟତ ମାଧ୍ୟମରେ ୨୨୭୧ ହେକ୍ଟର ଜମିକୁ ଜଳର ସୁବଣ୍ଟନ କରାଯାଉଥିଲା। ଫଳରେ କର୍ଣ୍ଣପାଳ, କଣଲୋଇ, ନୂଆଗାଁ, ଭାଲିଆସର, ଡଙ୍କାପାଳ, ମାରୁଢ଼ିପ, ତେଲିସାହି, ଜରିପାଳ ଆଦି ଅଞ୍ଚଳରେ ରବି ଋତୁରେ ୫୨୫ ହେକ୍ଟର ଓ ଖରିଫ ଋତୁରେ ୧୭୪୬ ହେକ୍ଟର ଜମିରେ ଚାଷ ହୋଇପାରୁଥିଲା। କିନ୍ତୁ ଉପଯୁକ୍ତ ରକ୍ଷଣାବେକ୍ଷଣ କରା ନ ଯିବାରୁ ମାଇନର, ସବ୍ମାଇନର ତଥା ଶାଖା କେନାଲଗୁଡିକ ପଙ୍କ, ମାଟି ଓ ବାଲି ଆଦିରେ ପୋତିହୋଇ ପଡିଛି। ଫଳରେ ପାଣି ପ୍ରବାହରେ ବାଧା ସୃଷ୍ଟି ହେଉଥିବା ଚାଷୀ ମହଲରେ ଅଭିଯୋଗ ହେଉଛି। ଅନେକ ସବ୍ମାଇନର କେନାଲର ତଳମୁଣ୍ଡରେ ଆବଶ୍ୟକ ଅନୁଯାୟୀ ପାଣି ପହଞ୍ଚୁ ନାହିଁ। ଏହାର ମରାମତି ନିମନ୍ତେ ଅଞ୍ଚଳବାସୀ ଦୀର୍ଘଦିନ ହେବ ବିଭାଗୀୟ କର୍ତ୍ତୃପକ୍ଷଙ୍କ ନିକଟରେ ଦାବି କରୁଥିଲେ ମଧ୍ୟ ପଦକ୍ଷେପ ନିଆଯାଉ ନ ଥିବାରୁ ଚାଷୀମାନଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି। ଏ ନେଇ ପାଣି ପଞ୍ଚାୟତ ସମିତି ଅଧ୍ୟକ୍ଷ ଗୋବିନ୍ଦ ଚନ୍ଦ୍ର ସାହୁ କହିଛନ୍ତି, ୮ବର୍ଷ ହେବ କେନାଲର ଜରୁରୀ ମରାମତି ଓ ରକ୍ଷଣାବେକ୍ଷଣ ପାଇଁ ଟଙ୍କା ଆସୁନାହିଁ। ଯଦ୍ୱାରା ଜଳସେଚନ କରିବାରେ ଅସୁବିଧା ହେଉଛି। ଏପରିକି ପାଣି ପଞ୍ଚାୟତ ଶୀର୍ଷ ସମିତିର ବିନା ପରାମର୍ଶରେ ନିମ୍ନମାନର କେନାଲ ନିର୍ମାଣ କରାଯାଉଥିବାରୁ ମାଇନର କେନାଲରୁ ଶାଖା କେନାଲଗୁଡିକୁ ଠିକ୍ ଭାବେ ପାଣି ଯାଇପାରୁ ନାହିଁ। ବାରମ୍ବାର ଅଭିଯୋଗ କଲେ ମଧ୍ୟ ଶୀର୍ଷ ସମିତିକୁ ଅନୁଦାନ ମିଳୁନାହିଁ। ଏ ସମ୍ପର୍କରେ ଜଳସେଚନ ଯନ୍ତ୍ରୀ ଦିଲୀପ କୁମାର ରଥ କହିଛନ୍ତି, ଏବେ କେନାଲର ମରାମତି ନିମନ୍ତେ ଶୀର୍ଷ ସମିତିକୁ ଅନୁଦାନ ଆସୁନାହିଁ। ଟଙ୍କା ଆସିଲେ ତୁରନ୍ତ ପ୍ରଦାନ କରାଯିବ ଏବଂ ମାଇନର ଓ ସବ୍ମାଇନର କେନାଲଗୁଡିର ମରାମତି କାର୍ଯ୍ୟ ଏକ ସପ୍ତାହ ମଧ୍ୟରେ ଶେଷ କରାଯିବ ବୋଲି ଯନ୍ତ୍ରୀ ରଥ ପ୍ରକାଶ କରିଛନ୍ତି।
