କେସିଙ୍ଗା,୫ା୭(ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକ ଅନ୍ତର୍ଗତ ବେଲଖଣ୍ଡି ପଞ୍ଚାୟତର ପଲସାପଡ଼ା ଗ୍ରାମରେ ଡ୍ରେନ୍ ପୋତି ହୋଇଯିବାରୁ ଗାଁ ରାସ୍ତାରେ ପାଣି ଜମିରହିଥିଲା। ଗାଁ ରାସ୍ତାରେ ଡ୍ରେନ୍ ପାଣି ଜମା ରହିବାରୁ ଗମନାଗମନ କ୍ଷେତ୍ରରେ ଘୋର ସମସ୍ୟା ହେଉଥିଲା। ଲଗାତର ଦୁଇଦିନ ବର୍ଷା ହେବା ଦ୍ୱାରା ଜମିବାଡ଼ିରେ ପାଣି ଜମିଗଲାଣି। ଗାଁ ରାସ୍ତାରେ ପାଣି ଜମି ରହୁଛି। ଗ୍ରାମବାସୀ ବେଲଖଣ୍ଡି ସରପଞ୍ଚ ଶୁଶାନ୍ତ ବାଗଙ୍କୁ ଏନେଇ ଅଭିଯୋଗ କରିଥିଲେ। ସରପଞ୍ଚ ସୁଶାନ୍ତ ବାଗ ଡ୍ରେନ୍ ସଫା କରିବାକୁ ଶ୍ରମିକ ଖୋଜି ଥିଲେ। କିନ୍ତୁ ଚାଷଦିନରେ ଶ୍ରମିକ ନ ମିଳିବାରୁ ନିଜେ ଉଦ୍ୟମ କରି ଅଳିଆ ଆବର୍ଜନା ଭର୍ତ୍ତି ହୋଇଥିବା ଡ୍ରେନ୍କୁ ସଫା କରିଥିଲେ। ବେଲଖଣ୍ଡି ସରପଞ୍ଚ ସୁଶାନ୍ତ ବାଗ ନିଜେ ଜଣେ ଦିବ୍ୟାଙ୍ଗ ବ୍ୟକ୍ତି । ମାତ୍ର ସେ ନିଜ ଚିନ୍ତା ନ କରି ଡ୍ରେନ ସଫା କରିବା ପାଇଁ ନିଜ ସରଞ୍ଜାମ ଧରି ବାହାରି ପଡ଼ିଥିଲେ। ଫଳରେ ତାଙ୍କ ଏହି ଗ୍ରାମ ଏବଂ ପଞ୍ଚାୟତ ପାଇଁ ପ୍ରେମ ଭାବନା ଏବଂ ଉଦାରତା ଦେଖି ଗ୍ରାମର ଅନ୍ୟ କିଛି ବ୍ୟକ୍ତି ମଧ୍ୟ ବାହାରି ସରପଞ୍ଚ ମହୋଦୟଙ୍କୁ ସହଯୋଗର ହାତ ବଢ଼ାଇ ଡ୍ରେନ ସଫା କରିବା ସହିତ ପାଣି ନିଷ୍କାସନ କରିଥିଲେ। ପୂର୍ବରୁ ମଧ୍ୟ ସରପଞ୍ଚ ବେଲଖଣ୍ଡି ପଞ୍ଚାୟତରେ ଅନେକ ଭଲ କାର୍ଯ୍ୟ କରି ଆସିଥିବାବେଳେ ଯଦି ନିଜ ପଞ୍ଚାୟତରେ କୌଣସି ବ୍ୟକ୍ତିର ମୃତ୍ୟୁ ହୋଇଯାଏ ତେବେ ହରିଶ୍ଚନ୍ଦ୍ର ଯୋଜନା ମାଧ୍ୟମରେ ପ୍ରଶାସନର ଟଙ୍କାକୁ ଅପେକ୍ଷା ନକରି ପ୍ରଥମେ ନିଜ ବ୍ୟକ୍ତିଗତ ଟଙ୍କାରୁ ମୃତକଙ୍କ ପରିବାରଙ୍କୁ ଶେଷକୃତ୍ୟ ସମ୍ପନ୍ନ ପାଇଁ ୩ ହଜାର ଟଙ୍କା ପ୍ରଦାନ କରଥିବା ନଜିର ରହିଛି। ଏଥିସହ ନିଜ ପଞ୍ଚାୟତରେ କୌଣସି ଅସହାୟ ଏବଂ ଗରିବ ପରିବାରଙ୍କୁ ନିଜ ପକ୍ଷରୁ ଆର୍ଥିକ ସହ ଅନ୍ୟାନ୍ୟ ସହାୟତା କରିବା ମଧ୍ୟ ପଞ୍ଚାୟତବାସୀ କୁହନ୍ତି। ଫଳରେ ବେଲଖଣ୍ଡି ପଞ୍ଚାୟତରେ ସରପଞ୍ଚ ସୁଶାନ୍ତ ବାଗ ନିଜ କାର୍ଯ୍ୟକାଳରେ ବ୍ଲକଠୁ ନେଇ ଜିଲାର ଅନେକ କାର୍ଯ୍ୟକ୍ରମରେ ସମ୍ମାନିତ ମଧ୍ୟ ହୋଇଛନ୍ତି।
