ବମ୍ବେ: ନିଜର ଫିଟ୍ନେସ୍କୁ ନେଇ ଦବଙ୍ଗ ଖାନ୍ ସଲମାନ୍ ବେଶ ଯତ୍ନବାନ। ପ୍ରଶଂସକମାନଙ୍କୁ ମଧ୍ୟ ସେ ଫିଟ୍ ରହିବାକୁ ପ୍ରେରଣା ଦିଅନ୍ତି। ସେ ସୋସିଆଲ ମିଡିଆରେ ଓ୍ବାକ୍ଆଉଟ୍ ସମୟର ଗୋଟିଏ ଫଟୋ ଶେୟାର କଲେ ଲକ୍ଷାଧିକ ଲୋକ ତାକୁ ପସନ୍ଦ କରନ୍ତି। ହେଲେ ଏବେ ଠିକ୍ ଓଲଟା ହୋଇଛି। ନିଜର ଇନ୍ଷ୍ଟା ଆକାଉଣ୍ଟରେ ସଲମାନ୍ ଗୋଟିଏ ଫଟୋ ଶେୟାର କରି କଟାକ୍ଷ ଶୁଣୁଛନ୍ତି।
ଜିମ୍ରେ ଶଟ୍ଲେସ୍ ହୋଇ ବସିଥିବା ବେଳର ଫଟୋ ଶେୟାର କରିଛନ୍ତି ସଲମାନ। ଏଇ ଏବେ ଓ୍ବାକ୍ଆଉଟ୍ ସାରିଲି ବୋଲି ସେ କ୍ୟାପ୍ସନ ଲେଖିଛନ୍ତି। ଏହାପରେ ସୁଶାନ୍ତଙ୍କ ପ୍ରଶଂସକମାନେ ତାଙ୍କୁ ଭତ୍ସନା କରୁଥିବା ଦେଖାଯାଉଛି। କେହି କେହି ତାଙ୍କୁ ଅନ୍ଫଲୋ କରିଥିବା କହିଥିବା ବେଳେ ଭଗବାନ ସବୁ ଦେଖୁଛନ୍ତି, ଏଥର ତୁମେ ବଞ୍ଚିପାରିବ ନାହିଁ ବୋଲି ଲେଖିଛନ୍ତି। କେବଳ ଭିକାରୀମାନେ କାମ ପାଇବା ଲାଗି ତୁମର ପ୍ରଶଂସା କରିବେ ବୋଲି ମଧ୍ୟ ଜଣେ ବ୍ୟବହାରକାରୀ ଲେଖିଥିବା ଦେଖିବାକୁ ମିଳିଛି।
କହିରଖୁଛୁ, ନିକଟରେ ସୁଶାନ୍ତ ସିଂ ରାଜପୁତ ଆତ୍ମହତ୍ୟା କରିବା ପରେ ନେପୋଟିଜିମ୍କୁ ନେଇ ସ୍ବର ଉଠିଛି। ସୁଶାନ୍ତଙ୍କ ପ୍ରଶଂସକମାନେ ଫିଲ୍ମ ନିର୍ମାତା କରନ୍ ଜୋହରଙ୍କଠାରୁ ଆରମ୍ଭ କରି ସଲମାନ୍ ଖାନ୍, ସୋନମ କପୁର, ସୋନାକ୍ଷୀ ସିନ୍ହାଙ୍କ ଭଳି କଳାକାରଙ୍କୁ କଟାକ୍ଷ କରୁଛନ୍ତି। ଏଥିରେ ବ୍ୟତିବ୍ୟସ୍ତ ହୋଇ ସୋନମ ନିଜର କମେଣ୍ଟ ସେକ୍ସନ ବନ୍ଦ କରିଦେଇଥିବା ବେଳେ ସୋନାକ୍ଷୀ ଟୁଇଟର ଛାଡ଼ିବାକୁ ବାଧ୍ୟ ହୋଇଛନ୍ତି।
