ନୂଆଦିଲ୍ଲୀ,୨୭।୪ : ଆୟୁର୍ବେଦ ଡାକ୍ତରମାନେ ଏମବିବିଏସ କରିଥିବା ଡାକ୍ତରଙ୍କ ଭଳି ସମାନ କାମ କରନ୍ତି ନାହିଁ। ତେଣୁ ସେମାନେ ସମାନ ଦରମା ପାଇବାକୁ ହକଦାର ନୁହଁନ୍ତି । ଏକ ମାମଲାର ଶୁଣାଣି ବେଳେ ସୁପ୍ରିମକୋର୍ଟ ଏହା କହିଛନ୍ତି। ସୁପ୍ରିମକୋର୍ଟ ଗୁଜରାଟ ହାଇକୋର୍ଟଙ୍କ ଆଦେଶକୁ ଖାରଜ କରି ଦେଇଛନ୍ତି ଯେଉଁଥିରେ କୁହାଯାଇଥିଲା, ଆୟୁର୍ବେଦ ଡାକ୍ତରମାନେ ଏମବିବିଏସ ଡାକ୍ତରଙ୍କ ଭଳି ସମାନ ଦରମା ପାଇବେ।
ଜଷ୍ଟିସ ଭି ରାମାସୁବ୍ରମଣ୍ୟମ ଏବଂ ଜଷ୍ଟିସ ପଙ୍କଜ ମିତ୍ତଲଙ୍କ ଏକ ବେଞ୍ଚ ଏହି ମାମଲାର ଶୁଣାଣି କରୁଛନ୍ତି। ସର୍ବୋଚ୍ଚ ଅଦାଲତ କହିଛନ୍ତି,ସ୍ବାଭାବିକ ଯେ ଉଭୟ ପ୍ରକାରର ଡାକ୍ତର ସମାନ ଦରମା ପାଇବେ ନାହିଁ। କାରଣ ସେମାନେ ସମାନ କାମ କରନ୍ତି ନାହିଁ। ସୁପ୍ରିମକୋର୍ଟ କହିଛନ୍ତି, ଆୟୁର୍ବେଦ ଡାକ୍ତରମାନେ ଏପରି କାର୍ଯ୍ୟ କରିପାରିବେ ନାହିଁ ଯାହା ଆଲୋପ୍ୟାଥି ଡାକ୍ତରମାନେ ଜରୁରୀକାଳୀନ ଡ୍ୟୁଟି ଏବଂ ଟ୍ରମା କେୟାରରେ କରିବାକୁ ସକ୍ଷମ ଅଟନ୍ତି। ଏହା ସହିତ କୋର୍ଟ ଆହୁରି ମଧ୍ୟ କହିଛନ୍ତି, ଆୟୁର୍ବେଦ ଡାକ୍ତରମାନେ ଜଟିଳ ଅସ୍ତ୍ରୋପଚାରରେ ସହଯୋଗ କରିବା ସମ୍ଭବ ନୁହେଁ। ମାତ୍ର ଏମବିବିଏସ ଡାକ୍ତରମାନେ ଅସ୍ତ୍ରୋପଚାରରେ ସାହାଯ୍ୟ କରିପାରିବେ ।
ସୁପ୍ରିମକୋର୍ଟ ସ୍ପଷ୍ଟ କରିଛନ୍ତି, ଯଦିଓ ବିକଳ୍ପ ଔଷଧ ପ୍ରଣାଳୀର ଗୌରବମୟ ଇତିହାସ ରହିଛି, ଆଧୁନିକ ଯୁଗରେ ଏଭଳି ଡାକ୍ତରମାନେ ଅସ୍ତ୍ରୋପଚାର କରିବାରେ ସକ୍ଷମ ନୁହଁନ୍ତି କିମ୍ବା ସହଯୋଗ କରିବାରେ ସକ୍ଷମ ନୁହଁନ୍ତି। କୋର୍ଟ କହିଛନ୍ତି, ’ସମସ୍ତଙ୍କୁ ଜଣା, ଏମବିବିଏସ ଡାକ୍ତରମାନଙ୍କୁ ସାଧାରଣ ଡାକ୍ତରଖାନାରେ ଓପିଡିରେ ଶହ ଶହ ରୋଗୀଙ୍କୁ ଦେଖିବାକୁ ପଡିଥାଏ। କିନ୍ତୁ ଆୟୁର୍ବେଦ ଡାକ୍ତରଙ୍କ କ୍ଷେତ୍ରରେ ତାହା ନୁହେଁ। ଆୟୁର୍ବେଦ ଡାକ୍ତର ଏବଂ ସ୍ବଦେଶୀ ଔଷଧର ଆବଶ୍ୟକତାକୁ ଚିହ୍ନିବା ଏବଂ ଏହାର ବିକାଶର ଆବଶ୍ୟକତା ଜରୁରୀ। ମାତ୍ର ଆମେ ସତ୍ୟକୁ ଭୁଲି ପାରିବୁ ନାହିଁ ଯେ ଉଭୟ ବର୍ଗର ଡାକ୍ତର ସମାନ ଦରମା ପାଇବା ପାଇଁ ସମାନ କାମ କରୁନାହାଁନ୍ତି। ସୂଚନାଯୋଗ୍ୟ, ୨୦୧୩ ମସିହାରେ ଗୁଜରାଟ ହାଇକୋର୍ଟ ଏକ ନିଷ୍ପତ୍ତି ନେଇଥିଲେ, ଏମବିବିଏସ ପ୍ରତିପକ୍ଷଙ୍କ ପରି ଆୟୁର୍ବେଦ ଡାକ୍ତରମାନେ ମଧ୍ୟ ଟିକ୍କୁ ବେତନ କମିଶନ ଅନ୍ତର୍ଗତ ସମାନ ଦରମା ପାଇବାକୁ ହକଦାର।
